6 Sanhedrina inthrunghai chu a thren Sadukai, a thren Farisai an nih ti Paulan a hriet leiin inring takin, “Unauhai, kei khom hi Farisai mi, Farisai naupa ka na, mithi thonawk ka beiseina thua rorêltu hmaa ngîr ka ni hih” a ta. 7 Chu thu a hril zo chun Farisaihai le Sadukaihai chu an insĕl buoi a, Sanhedrin chu an inthrè tah a. 8 Sadukaihai chu thonawkna dam, vantirko dam le thlarau dam a um ring naw pawl an na, Farisaihai ruok chun chuong po po chu a um an ring bok si a. 9 Chuongchun, an ri a se ta hle a, Farisaihai tienga mi Dan zirtirtu threnkhat chu an ngìr a, “Hi pa chunga hin thil indik lo ieng khom kan hmu nawh, Thlarauin amanih vantirkoin amanih an inbiekpui khom lo ni ta rĕng sien, chu chu iem a na?” tiin an thrang a. 10 An insĕl buoi deu deu leiin sipai kawmandar chun Paula chu an kei nawi neng a’n lau a, anni laia inthoka zu la suok a, kulbinga thruoi dingin sipaihai chu thu a pêk a.

11 Chu zân chun Lalpa chu Paula bulah a hung ngîr a, “Huoi takin um rawh; Jerusalema ka thu i hril ang bok hin Rom khawpuia khom i hril ding a nih” tiin a hril a.

12 Zingkar chun Paula that dan ding phierin Judahai a rûkin an inkhawm a, an that hma khat chu ieng khom faa dawn lo dingin an inkhăm a. 13 Chuonga phierrutu chu mi sawmli nêka tam hiel an nih. 14 Thiempu laltak le upahai kuomah an fe a, “Paula kan that hma chun ieng khom fa lo dingin khŭn takin kan inkhâm a nih. 15 Chuleiin, nangni le Sanhedrinin a chungthu chieng nawk zuola indon fel in nuom thu suonlama hmangin, Paula chu in kuoma hung thruoi thla dingin kawmandar kuomah hang hni ro, a hung tlung thlăk hmaa that dingin kan inpei zing a nih” an ta.

16 Nisienlakhom, Paula farnu naupain that tuma an lo inchăn rŭk thu chu a lo hriet rŭk a, a hang fe a, kulbing sungah a lut a, Paula chu a hril a. 17 Paula chun sipai zahotu laia pakhat a ko a, “Hi tlangval hin kawmandar kuoma hril ding iemani a nei” a ta. 18 Chuongchun, kawmandar kuoma chun an thruoi a, “Tâng pakhat Paula khan a mi ko a, hi tlangval hi i kuoma hung thruoi dingin a ngên a, thu iemani hril ding che a nei a ni awm” a ta. 19 Kawmandar chun a kutah chelin a thruoi bing a, a rûkin, “Mi hril ding i nei chu iem a na?” a ta. 20 Ama chun “Paula chungchang thu chieng nawk zuola indon an nuom thu suonlama hmangin zîngah Sanhedrin hmaa hung thruoi thla dingin Judahaiin hung ngĕn chê an remti tlăng a. 21 Nisienlakhom, an thu lo awi naw rawh; anni lai mi sawmli nêka tamin an inchân zing a nih. Paula an that hmâ khat chu faa dawn lo dingin an inkhăm a. Tu hin i thu nghâkin, inpei sa zingin an um a nih” a ta. 22 Kawmandar chun, “Hi thu hi i mi hril ti tu kuoma khom hril dêr naw rawh” a ta, tlangval chu a’n fetir tah a.

23 Sipai zahotu pahni a ko a, “Voi zan dar kuoa Kaisari-a^b fe dingin sipai zahni le sakor chungchuong mi sawmsari le fei chawi mi zahni buotsai ro. 24 Chun, Paula chuongna ding sakor buotsai bok inla, him takin Lârsap Felik kuomah in tlungpui ding a nih” a ta. 25 Hieng hin lekha a ziek a:

26 Klaudia Lusia-in:

27 Hi pa hi Judahaiin an man a, an that hman trêp laiin sipai thruoiin ka zu fe a, ka san suok a. 28 That an tum san hriet ka nuom leiin an Sanhedrin hmaah ka thruoi a. 29 An Dan iemani thua an hêk a nih ti ka hmu suok a, sienkhom thina khop amanih lung in intàngna khop amanih thil suol a thaw ka hmu naw a. 30 Judahaiin that tumin an phierruk ti miin an mi hril charin i kuomah ka hung tir thlâk nghal a nih. A hêktuhai khom a chunga thu poi an nei taphot chu i hmaa hril dingin ka’n hriettir tawl bok” tiin.

31 Chuongchun, sipaihai chun a thupêk angin a zân a zănin Paula chu an thruoi a, Antipatri khuo an tlungpui a. 32 A zinga chun sakor chungchuong mihai chun Paula chu an thruoi pei a, sipai danghai ruok chu an kulbing tieng panin an kǐr nawk a. 33 Kaisari an tlung chun Governor kawlah lekha chu an pĕk a, Paula chu a hmaah an thruoi a. 34 Governor chun a tiem zoin khaw laia inthoka hung am ti a’n don a, Kiliki rama mi a ni thu a hriet tah a. 35 “A hêktuhai che an hung tlung pha i thu chu ngaituong ka tih” a ta, Heroda praitorianah^c sie a, vêng dingin thu a pêk a.