Paula a pieng thar
9
1 Saula ruok chun Lalpa zirtirhai chu that dingin a la vau zui pei a. 2 ‘Lampui’ zuitu taphot chu a nuhmei a pasalin mana, Jerusalema a hung thruoi theina dingin Damaska-a sunagog hotuhai lekha ding thiempu laltak a va hni a. 3 Damaska pana a fe laiin, a tlung tawm trêpin thâwk le khatah êngin vana inthokin a vêlin a hung khaw var ta phŭt a. 4 Ama chu hnuoiah a tla a,a rawlin, “Saula, Saula, nangin ieng dinga i mi sukdŭdă am a na?” a hung ti a hriet a. 5 Ama chun “Lalpa, tu am i na?” a ta. Rawl chun, “I sukdŭdă Isu ka nih. 6 Tuhin tho la, khawpuiah lut rawh, i thaw ding lo hril an ti che” a ta. 7 A fepuihai chu hrilhai takin an ngǐr a, rawl chu an hriet a, sienkhom tu khom an hmu bok si nawh. 8 Saula chu a hung tho a, a hang meng a, ieng khom a hmu thei ta naw a. Chuongchun, kuta keiin Damaska khuoa chun an thruoi lŭt a. 9 Ni thum sung a mit a’n del a, ieng khom fain a dawn bok nawh.10 Damaska-a chun zirtir pakhat a hming Anania a um a. A kuomah Lalpa a hung inlăr a, “Anania” a hung ti a. Ama chun, “Lalpa, hi taka hin ka um” a ta. 11 Lalpa chun, “Kotthlêr Tlŭna um Juda inah fe la, chu taka chun Tarsa mi a hming Saula va’n don suok rawh. 12 Ama chun mi pakhat Anania hung a, a chungah kut innghat a, a mit sukvar dingin a mitthla a, chu ding chun a trongtrai zing a nih” a ta. 13 Anania chun, “Lalpa, hi pa hin Jerusalema i mi thienghlimhai chunga poi a tawk nasatzie ripawt tam tak ka dong tah a. 14 Hi taka khom hin i hming lamtu taphot man dingin thiempu lalhaia inthoka thu hmuin a hung a nih” a ta. 15 Lalpa chun, “Fe el rawh. Hi pa hi Jentalhai le an lalhai le Israel mipuihai kuoma ka hming phur luttu dinga ka hmangraw thlang a nih. 16 Ka hming leiin rinum ieng ang am a la tuor ding ama la’n hriettir ka tih” a ta. 17 Chuongchun, Anania chu a suok a, ina chun a va lut a, a chungah kut innghatin, “Unaupa Saula, i mit varna ding le Thlarau Thienghlima i sip theina dingin, i hungna lampuia i kuoma inlâr Lalpa Isu khan i kuomah a mi hung tir a nih” a ta. 18 Kâr loin a mita inthokin phuhlip ang a tla ta nghal a, a mit a hung var nawk tah a, a tho a, baptisma a chang tah a.
Saulan rong a bawl tran
19 Bu a fâk hnungin Saula chun a tha ngai a hung put nawk tah a. Damaskaa zirtirhai kuomah ni iemani zat a châm a. 20 Sunagoga hai chun Isu chu Pathien Naupa a nih ti a hril tran ta nghal a. 21 A thu hril hre taphot chun maktiin, “Hi pa hi Jerusalema Hming lamtuhai sukdŭdătu kha a ni naw am a ni? Hming lamtuhai chu mana thiempu lalhai kuoma thruoi tumin hi taka khom hin a hung an naw maw?” an ta. 22 Nisienlakhom Saula thu hril chun mi a hung hnĕ deu deu a, Isu chu Mesia ngei a nih ti chieng taka a hrilfie hlak leiin Damaskaa Judahai chu a sêl dong a, a sukchi-ai tawl hle a.
23 Ni iemani zăt hnunga chun Saula chu that tumin Judahaiin an phierruk a, 24 sienkhom an thiltum chu Saulan a lo hriet a. That tumin khawpui inhuonna kul kotkhara chun sŭn le zănin an inchăn a. 25 Nisienlakhom, zirtirhaiin ama chu an thruoi a, zăna chun bawmin kul bang puo tieng chun an thlak thla tah a.
Saula Jerusalemah
26 Saulan Jerusalem a hung tlung chun zirtirhai laia thrang ve a tum a, anni ruok chun zirtir a ni ve an ring thei naw a, an rêngin an trî hle a. 27 Barnaba ruok chun ama chu tirkohai kuomah a fepui a, lampuiah Lalpa a hmu a, Lalpan ama a biek thu le Damaska-ah Isu hming huoi taka a hril thuhai dam chu a hril tawl a. 28 Chuongchun, Saula chu anni lai chêngin, Lalpa hming chu huoi taka hrilin Jerusalema chun zalen takin a’n vâk vêl a. 29 Grik trong hmang Judahai kuoma chun thu a hril a, a’n sêlpui a, anni chun that an tum el tah a. 30 Unauhaiin chu chu an hrietin Kaisari khuoah an thruoi thlăk a, Tarsa khuo tieng an infetir ta dai a.
31 Chuongchun, Judai ram, Galili ram le Samari ram pumah kohran mihai chu muong takin an khawsa a, Thlarau Thienghlim chun sukhrâtin a sukphŭr tawl a, Lalpa chu tri dêka umin, an hung pung ta deu deu a.
Ainia sukdam thu
32 Peter inzin vêl chun Lidda khuoa mi thienghlimhai a zu sir a. 33 Chu taka chun mi pakhat Ainia, a zeng leia kum riet lai khuma zâl tah chu a hmu a. 34 Peter chun a kuomah, “Ainia, Isu Krista chun a sukdam ta che, tho la, i khum kha siem fel rawh” a ta. Chuongchun, a tho ta nghal a. 35 Lidda le Saron phaia um po po chun Ainia an hmu chun Lalpa tieng an ngha tawl tah a.
Dorka keitho thu
36 Chun, Jopa khuoah zirtir pakhat Tabithab a um a, a Grik hming chu Dorka a na, a umzie chu “sazukla tuoi’ tina a nih. Chu nu chu thil thra thawa inhmang mi le retheihai thrangpui hlaktu a nih. 37 Chuong lai chun ama chu a damnaw a, a thi el tah a, an insil fai a, pindan chunghnungah an inzăl a. 38 Lida chu Joppa khaw bul ela um a na, Lida khuoah Peter a um ti zirtirhaiin an hriet chun lunginsiet taka hung nghal dinga ngên dingin a kuomah mi pahni an tir a. 39 Peter chu anni le chun a fe a, in a tlung chun pindan chunghnunga chun an thruoi a, hmeithai po po chu a bulah an ngǐr a, an trap a, a dam laia Dorkain zakuo le thuomhnaw a siemhai chu an inentir a. 40 Peter chun an rêngin a’n suoktir a, dingthrathruonin a trongtrai a, mithi ruong tieng chu nghain, “Tabitha, tho rawh” a ta. Chuongchun, Tabitha chu a hung meng a, Peter chu a hmu a, a hung thrung suok tah a. 41 Peter chun a bânah a chel a, a kei tho a, chuongchun ringtuhai le hmeithaihai chu a ko a, damin an kuoma chun a thruoi a. 42 Chu chu Jopa khuoa mi po poin an hriet a, mi tam takin Pathien an ring tah a. 43 Peter chu Jopa khuoa chun savun siemtu Simon inah a tlung a, ni tam tak a châm a.