Paula Jerusalemah
21
1 Kan inthrè thei hrâm hnung chun longin kan suok a, Kaws thlierkar kan ban a, a zingah Rodi thlierkar kan tlung a, chu taka inthokin Patar kan tlung a. 2 Foiniki rama fe ding long pakhat kan hmu a, kan chuong a, kan fe nawk ta pei a. 3 Kupra thlierkar kan hmu a, voi tieng pangah kan fe pel a, Suria ram panin Tura khuo kan tlung a, chu taka chun longa an thuomhnaw phurhai chu an lăk thlăk ding a na. 4 Zirtir umhai kan zong suok a, an kuomah ni sari kan chăm a; anni chun Thlarau hrilin Paula chu Jerusalema fe lo dingin an ngĕn a. 5 Chu zoa chun kan suok nawk a, zirtirhai chun an rêngin, an nuhmei le nauhai leh, kotsuo chenin an min thla a, tuipui kama chun dingthrathruonin kan trongtrai a. 6 Chuongchun, chibai kan inbŭk a, anni chu in tieng an kǐr nawk tah a. 7 Tura-a inthok chun longin Tolemai khuo kan tlung a, unauhai chibai malamin an kuomah ni khat kan chăm a. 8 A zingah kan suok nawk a, Kaisari khuo kan tlung a, Chanchin Thra hriltu Filip inah kan innghat a; ama chu upa pasarihai laia mi kha a nih. 9 Nau nunghak pali a nei a, Pathien thu an hril hlak a. 10 Ni sawt nâw te kan chăm a, kan chăm sungin Judai rama inthokin zawlnei pakhat Agaba a hung thla a. 11 Kan kuomah a hung a, Paula kawngchŭn chu a lâk a, ama kut le ke a zem a, “Jerusalema Judahaiin hieng ang hin hi kawngchŭn neitu hi khuop an ta, Jentelhai kutah peng an tih, Thlarau Thienghlimin a tih” a ta.12 Chuong thu kan hrietin keini le chu khuoa mihai chun Paula chu Jerusalema fe lo dingin kan ngên rak a. 13 Paula chun, “Ieng dinga ka thla sukse dinga in trap in trap am a na? Lalpa Isu hming lei chun khuop chau ni loin thi chen khom ka huom annawm” a ta. 14 Kei her ruol a ni naw phing chun, “Lalpa thu thu ni raw se” tiin kan ma tah a.
15 Chu hnung chun kan insiem a, Jerusalemah kan hang fe a. 16 Kaisari khuoa zirtir threnkhatin an mi zui a, kan tlungna ding Nason inah an mi thruoi a; ama chu Kupra thlierkara zirtir hmasahai laia mi a nih.
Paulan Jakob a sir
17 Jerusalem kan tlung chun unauhaiin hlim takin an mi lo lawm a. 18 A zinga chun Paula rawiin Jakob inah kan lêng a, Kohran upa po po khom an lo um a. 19 Paulan anni chu chibai a buk zoin a rongbawlna hmanga Jentelhai laia Pathienin thil a thaw danhai chu kim takin a ripawt a. 20 Unauhaiin chuong thu an hriet chun Pathien an inpak a. Paula kuoma chun, “Unaupa, Judahai laia ringtu an tam takzie i hmu a, ei Dan ngaina tak vong an ni si a. 21 Nangin Jentelhai laia Juda um po po chu Mosie Dan bansan a, an nauhai ser tan lo ding le Judahai dan zawm lo dingin i zirtir hlak ti mi hril kan hriet a. 22 I hung tlung ti an hriet ngei ding a ni si a, ieng tin am thaw tang ei ta? 23 Chuleiin, kan hril ang che hin thaw rawh. Keini lai hin thutiem neia lai pasal pali an um a. 24 Chuonghai chu thruoi la, anni ruol chun inthien ve la, an sêng po po tumpêk rawh, an lu an vaw theina dingin. Chuonga i thaw chun mi po poin i chanchin an hriet hi khêl a na, nang ngei khomin Dan zawmin Dan ang takin i la khawsa pei a nih ti hrieng an tih. 25 Jentelhai laia ringtuhai chungthu ruok chu, milim biekna sa fak lo ding, sa thisen fak lo ding, sa rêk hlum sa fak lo ding ti le inngai bansan ding ti thu kan rêlhai chu kan hung thon ta kha” an ta.
26 Chuongchun, a zînga chun chuonghai chu Paulan a thruoi a, anni ruol chun a’n thien ve tah a. Chun, Tempulah a lût a, an inthien zo ni ding le an hming kipa hlanbiekna a’n hlànpèk ding ni chu thiempu a’n hriettir a.
Tempulah Paula an man
27 Ni sari a tling ding trêpin Asia rama Judahaiin Paula chu Tempulah an hmu a. Mipui po po chu an infui por a, an man tah a. 28 “Israel mihai, mi thrangpui ro! Hi pa hi ei chipuihai, ei Dan hai le hi hmun hi dodal zawnga hmun tina mihai inchuktir hlaktu a na; tu khom hin Tempulah Grik mihai a lŭtpui a, hi hmun thienghlim hi a sukporchè a nih” an ta. 29 Efesi khaw mi Trofim chu a hmain khawpuiah Paula leh an hmu a, ama chu Tempulah Paulan a hung thruoi amanih an ti a nih.
30 A khuoin an phĕk buoi a, kil tina inthokin mi an hung tlăn khawm a, Paula chu Tempula inthokin an hnŭk suok a, kothai an khăr ta nghal a. 31 That an tum lai chun Jerusalem an phêk buoi ti Roman sipai kawmandarin a lo hriet a. 32 Chuongchun, ofisar le sipai iemani zat thruoiin a tlan thla nghal a, mipuiin kawmandar le sipaihai an hmu chun Paula vuok chu an ma tah a. 33 Kawmandar chun a hung hnai a, Paula chu a man a, khaidiet pahni inbuntir dingin thu a pêk a, tu’m a ni le iem a thaw ti a’n don bok a. 34 Mipui chu a thren thu khatin an khĕk a, a thren thu dangin an khêk bok a. Buoina sosang lei chun an thu chinchang a hriet thei naw a, kulbingah thruoi lût dingin thu a pêk a. 35 Kailawn an tlung chun mipuiin an baw nasat èm leiin Paula chu sipaihaiin an chawi tung a. 36 Mipui po po chun, “Sukhlum ro” tiin an khĕk dur dur a.
37 Kulbinga an thruoi lut tawm chun Paulan kawmandar kuomah, “I kuomah thu bau khat chauh hril thei ka ti?” a ta. Ama chun, “Grik trong i thiem a ni maw? 38 Chuong a ni chun, Aigupta mi pakhat, kha hma deua helna chok suok a, firfiek sang li ruol thlalera thruoitu kha i ni naw maw?” a ta. 39 Paula chun, “Kei chu Juda mi, Kiliki ram Tarsa khaw mi ka na, khaw narana mi ka ni nawh. Lunginsiet takin mipui kuomah thu mi’n hriltir rawh” a ta. 40 A remti phing leh Paula chu kailawna chun a ngir a, mipui chu to dingin a kutin a zâp a, an to ta thrup a, Aramik tronginb thu a hril ta a.