Stefan thuhril
7
1 Chun, thiempu laltak chun, “An hêkna che hi a’n dik am?” tiin a’n don a. 2 Stefan chun, “Unauhai le pahai, lo ngaithla ro. Ei pu Abraham chu Haran khuoa a um hmaa Mesopotamia rama a chĕng lai khan, ropuina Pathien chu a kuomah a hung inlăr a. 3 ‘I ram le i mihai maksan la, ram ka la’n entir ding che chu pan rawh’ tiin a hril a. 4 Chuongchun, Kaldai rama inthokin a suok a, Haran-ah umhmun a khuor a. A pa thi hnungin chu taka inthok chun tuta ei chĕngna rama hin Pathienin a’n pĕm lŭttir a. 5 Pathien chun ram hluo ding kepha bok tiet khom a pêk nawh. Amiruokchu, Abraham chu nau nei lo a la ni zing laiin, ama le a thlahai kuomah hi ram hi pĕk a tiem a. 6 Pathienin hieng ang hin a hril a nih: ‘I thlàhai chu mi ramah la mikhuol an ta, kum zali lai mi bawiah umin, sukdudain um an tih. 7 Bawia siemtu ding hnam chu keima ngeiin la ngaituong ka ta; chu hnunga chun suok an ta, hi hmuna hin ka rong la bawl an tih’ a ta. 8 Pathienin Abraham kuomah sertan thuthlung kha a thlung a. Chuong ang tak chun naupa Isak a nei khan ni riet niah a ser a tanpek a. Isak chun naupa Jakob a nei a, Jakobin naupa sawmpahni, ei thlatuhai kha, a nei a.9 “Thlatuhai khan Josefa chu an thǐk leiin Aigupta ram tieng salin an zor a; nisienlakhom Pathien a kuomah a um a, 10 a rinum tuor po poa inthokin a san suok pei a. Josefa chu varnain a’n thuom a, Faraw ditsakna hlaw theiin a siem a, Aigupta ram le lal insunga hotuah a siem a. 11 Chun, Aigupta le Kanan ram pumah trăm a hung tla a, an tuor nasa hle a, ei thlatuhai chun făk ding hrim an nei ta naw a. 12 Aigupta ramah făk ding a um ti Jakobin a hriet chun ei thlatuhai chu a tir suok a, chu chu an fe hmasakna tak a nih. 13 An fe voi hninaa chun Josefa chu a unauhai kuomah an puong suok a, Faraw khomin Josefa sunghai chu a hriet ve tah a. 14 Chuongchun, Josefa chun a pa Jakob le a unauhai po po chu a’n kotir a, an rêngin sawmsari panga vêl an nih. 15 Jakob chu Aigupta ramah a zu fe a, chu taka chun ama le ei thlatuhai chu an thi a, 16 an ruong chu Sekem khuo chen an zawn tlung a, Abrahamin Sekem khuoa Hamor nauhaia inthoka tangka suma an chawk thlâna chun an phŭm tah a.
17 “Abraham kuoma Pathien thutiem kha a tlung ding lai chun eini mihai chu Aigupta ramah an pung hrât ĕm êm a, an tam ta hle a. 18 Aigupta rama chun lal dang, Josefa hre lo, a hung inlal a. 19 Ama chun ei chipuihai chu dawhain a thaw a, a sukdùdà a, thawluinain an nautehai chu thi dingin a’n peitir pei a. 20 Chuong lai chun Mosie a hung pieng a, Pathien mithmuah naute ditum tak a na, anni inah thla thum sung chu an umpui a; 21 an ina inthoka an sie suok hnungin Faraw naunuin a lâk a, ama nau dingin a nei tah a. 22 Mosie chu Aigupta ram varna po po a’n chuktir a, thu le hla thiem le mi thilthaw thei tak a hung ni tah a.
23 “Mosie chu kum sawmli a niin a unau Israel nauhai chu kan trûlin a hriet a. 24 A va kan chun Aigupta miin anni laia pakhat a lo sukdùdà lai a hmu a, a san a, phubâ a lâkpĕk a, a sukdùdàtu chu a that a. 25 Mosie chun Pathienin ama kut hmangin a unauhai chu a san suok ding ti chu a mihaiin an hriet amani a sawn a, sienkhom an lo hriet si naw a.
26 “A zinga chun Israel mi pahni insuol lai chu Mosien a hmu a, threl tumin, “Puhai, unau in ni kha, ieng leia insuknat in tum am a na?” a ta. 27 A soisatu lem chun Mosie chu a nam lĕng a, “Kan chungah hotu le rorêltuah tuin am a sie che? 28 Zani ta Aigupta mi i sukhlum ang khan mi sukhlum ve i tum a ni maw?” a ta. 29 Chu thu lei chun Mosie chu a tlân hmang a, Midian ramah sawt tak a va thang a, chu taka chun naupa pahni a nei a.
30 “Chun, kum sawmli an voi hnungin thlalĕr hmun Sinai tlăng bulah chîmbuk chok hmangin a kuomah vantirko a hung inlăr a. 31 Mosien a thil hmu chu mak a ti ĕm êm a. En chieng tuma a va pan hnai chun Lalpa rawlin, 32 “Kei hi i thlatuhai Pathien, Abraham hai, Isak hai, Jakob hai Pathien chu ka nih’ a hung ti a. Mosie chu triin a’n thin a, a en ngam ta naw a. 33 Lalpa chun a kuomah, ‘I pheikhok kha hlîp rawh, i ngirna kha hmun thienghlim a nih. 34 Aigupta rama ka mihai an sukrimsikzie ka hmu zing a, an inrŭm ri khom ka hriet zing a, anni thruoi suok dingin ka hung trum a nih. Hung ta, Aigupta ramah tir kir ka ti che’ a ta.
35 “Chu Mosie, ‘hotu le rorêltuah tuin am a siem che’ tia an hnâwl ngei chu, Pathienin hotu le sansuoktu dingin, chîmbuka a kuoma inlâr vantirko hmangin a hung tir tah a nih. 36 Ama chun anni chu a thruoi suok a, Aigupta rama dam, Tuipui Sena dam, thlalĕra dam kum sawmli sung lai thilmak le inchiknahai thawin a thruoi a. 37 Chu Mosie chu annawm Israel nauhai kuoma, ‘Pathienin keima ang in unauhai laia mi zawlnei la siempêk a ti chêu’ titu kha. 38 Ama chu a nih ei thlatuhai, thlalĕra pung khawmhai laia thrang ve le Sinai tlanga a betu vantirko kuoma inthoka einihai kuoma inhlàn sawng pei ding thu hringhai dongtu kha. 39 Ei thlatuhai chun a thu an zawm nuom naw a, an hnăwl a, Aigupta tieng kîr nawk an nuom a. 40 Aron kuomah, ‘Aiguptaa inthoka mi thruoi suoktu Mosie hlak hi iem a chang tah ti khom kan hriet si nawh, kan hma thruoitu dingin pathienhai mi siempek rawh” an ta. 41 Chuongchun, bawngte lim an siem a, milim kuoma chun inthawina an inhlăn a, anni kuta siem chawimawina dingin lawmna an siem a ni khah. 42 “Chuongchun, Pathienin anni chu a nghatsan a, vana arasihai be dingin a pêk suok a; zawlnei lekhabua,
‘Aw, Israel, thlalĕra khan kum sawmli sung,
Hlănbiekna ran in mi’n hlan maw?
43 Molok puon in le in pathien Refan lim,
Arasi chu zawnin chibai in bŭk kha;
Chuleiin, Babulon khĕl ramah,
Salah intăngtir ka ti chêu Amo 5:25-27
ti ziek ang khan.
44 “Ei thlatuhai chun thlalera khan Pathien chêngna puon in an nei a, chu chu Mosie kuoma Pathienin siem dan dinga a hril le a lim a’n entir anga siem a nih. 45 Chu Pathien bâwkte ngei chu ei thlatuhaiin an som pei a, Pathienin Jentelhai a hnotsuokpek hnunga Josua rawia Kanan ram an hung hluo khan an somlut pei a, Davida hun chen khan a um ta zing a.
46 “Davida chun Pathien ditsakna a dong a, Jakob Pathien ta dingin in bawl phalna a hni a, 47 sienkhom Solomonin a bawlpek ta lem a. 48 Amiruokchu, Chunghnungtak ruok chu kuta bawl inah a um ngai nawh; zawlneiin,
49 Lalpan, ‘Van ka lalthrungpha a na,
Hnuoi ka ke innghatna a na,
In ieng am mi bawlpek in ta?
Ka chawlna hmun ding khom khaw lam?
50 Hieng po po hi ka kuta siem
An ni vong an naw maw? Isa 66:1-2
a tih ti-a a hril ang khan.
51 Mi kawmaw, lungril le naa sertan ve lohai, Thlarau Thienghlim chu in kal rop a, in thlatuhai ang bokin nangni khomin in thaw hlak. 52 In pi le puhaiin zawlnei suknomnat lo hrim tu am an nei a? Mi fel tak hung ding hrillawktuhai kha an that a; nangni hi tuta Ama inmantirtu le thattuhai chu in nih. 53 Vantirkohai hmanga pĕk Dan dongtu in na, sienkhom in zawm nuom si nawh” a ta.
Lungin Stefan an dĕng
54 Chuong thu chu an hrietin an lung a khei hle a, lungsenin hâ an răwt a. 55 Nisienlakhom, Stefan chu Thlarau Thienghlimin a sip a, van tieng a thlir zing a, Pathien chang tienga Isu ngîr a hmu a. 56 “Ngai ta u, van inhong ka hmu a, Pathien ropuina le Pathien chang tienga Mihriem Naupa ngîr khom ka hmuh” a ta. 57 Anni chun nâ hupin, inring taka khêkin, Stefan chu an bei hron a, 58 khuoa inthokin an hnûk suok a, lungin an deng a. Thuhretuhai chun an puon chu tlangval pakhat Saula an ti ke bula chun an dĕng khawm a. 59 Lunga an deng mur mur lai chun Stefanin “Lalpa Isu, ka thlarau la rawh” tiin a trongtrai a. 60 Chuongchun, a dingthrathruon a, “Lalpa, an thil suol thaw maw hi an chungah intlâktir naw rawh” a ta. Chu chu a hril zoin a in innghil tah a.