Upa pasari thlang
6
1 Chuonga zirtirhai an hung pung pei hnung chun an ni tin fak le dawn sem thuah hmeithaihai an ngaithà bik tiin Grik trong hmang Judahai chu Aramika trong hmang Judahai chungah chun an chier a. 2 Sawm le pahnihai chun zirtirhai chu an ko khawm vong a, “Pathien thua rongbawlna thlathlama ni tin fak rongbawla kan buoi hi thil indik a ni nawh. 3 Chuleiin, unauhai, nangni laia Thlarau Thienghlim le varnaa sip mi nia in ngai mi pasari thlang suok unla, an kutah hieng sin hi inhlăn kan ta, 4 keini ruok chu trongtrai le thu rongbawlah inpumpêk tlat kan tih” an ta.5 Chu rotna chu thra an ti tlâng seng a. Chuongchun, Stefan, ringna le Thlarau Thienghlima sip hai, Filip hai, Prokora hai, Nikanor hai, Timon hai, Parmena hai, Antiokei mi le Juda saphun Nikola hai chu an thlang a. 6 Chuonghai chu tirkohai hmaah an inngǐrtir a, tirkohai chun an lu chungah kut innghatin an trongtraipĕk a. 7 Pathien thu chu a hung indar pei a, Jerusalemah zirtir an hung pung hrat ĕm êm a, thiempu laia mi tam tak khomin Ringna chu an pom ve tah a.
Stefan an man
8 Stefan chu Pathien lunginsietna le thilthawtheinain a sip a, mihai lai inchikna thilmak ropui tak tak a thaw hlak a. 9 Nisienlakhom, Kurini khuo le Aleksandria khuoa inthoka hung Juda mi threnkhat, ‘Salsuok Sunagog’b inti pawla thrang ve hlakhai le Kiliki ram le Asia rama Judahai chu an hung inthok a, Stefan chu an insĕlpui a, 10 sienkhom var taka a hril lei le a hrilpuitu Thlarau Thienghlim lei chun an sĕl hnê teu naw a. 11 Chuongchun. “Mosie le Pathien a hril siet kan hriet” tia intumtu ding a rûkin mi an thuhnè a. 12 Mipui le upahai le Danzirtirtuhai chu an infuipor a, Stefan chu an man a, Sanhedrin hmaah an thruoi a. 13 Hrepuitu tehlĕm an insiem a, chuonghai chun, “Hi pa hin ei Tempul thienghlim le ei Dan soisel a ma nawh. 14 ‘Nazaret Isun ei Tempul hi thriek a ta, Mosie mi pĕk ei hnam danhai po po hi a thlâk danglam vong ding a nih’ a ti kan hriet” an ta. 15 Sanhedrina inthrunghai chun Stefan chu an en thrup a, a hmêl chu vantirko hmêl angin an hmu a.