Rorêlna le beiseina
66
1 LALPA chun hieng hin a tih:“Van khi ka lalthrungpha a na,
Hnuoi hi ka ke nghatsan a nih.
Khaw lai am ka in ding chu,
In mi bawlpek ta ding a na?
Khaw lai hmun hrim hi’m a na,
Kei ka chawl theina ding chu?
2 Thil iengkim hi ka kuta siem,
Ka’n umtir vong a ni naw maw?
“Hi hi ka mi hlut zawng a nih:
Lungrila inngaitlawm hlak mi,
Lungrila insîr ngawi ngawi mi,
Ka thu inzaa inthin hlak mi.
3 Sienkhom hienghai ngaia chu,
Bawngchal thata inhlàn amanih,
Mihriem thata inthawi amanih,
A danglamna a um chuong nawh.
Beramte inhlàn amanih,
Ui rĕk hlum inhlàn amanih,
Bu le bâl inhlàn amanih,
Vok thisen inhlàn amanih,
Rimtui an raw amanih,
Milim an biek amanih,
Thil danglamah an ruot nawh.
An nuom nuomin thil an thaw a,
Thil porchè an thawhai chun,
An lungril a suklawm hlak.
4 Ka koin an mi don naw a,
Ka biekin an mi ŭksak nawh.
Ka mithmuah thilsuol thaw a,
Ka theida zawng an thaw leiin,
Kei khomin indoi loin
Na takin hrem tawl ka ta,
An lo trithawng tak thil chu,
An chungah intlungtir ka tih.”
5 A thu tri-a inthin hlakhai,
LALPA thu hi lo ngaithla ro:
“Ka hming leia theidatu le,
Hnawltu cheu in unauhai chun,
LALPA chu ropuina leh,
Hung inlang mol raw se chu,
In lawm chie am hang en ei tih’
Tiin an trong khum cheu kha.
Sienkhom la muolpho an tih.
6 Khawpui buoi ri chu ngai ro,
Tempula an rihàu chu!
An suol dan ang phú pei a,
A hmêlmahai thungrultu,
LALPA chèt ri a ni chu!
7 “Nau hasè tuor hman lo a,
Nau nei ta thut ang elin,
A nat hung intran hmain,
Nau a hring a ni chu tie!
8 Chuong ang thil chu tuin am,
Hrein an hmu hlak hrim a?
Ni khat sung thilthu chauin,
Ram a pieng hlak am a ni?
Mit khap kar khom tling loin,
Hnam a pieng hlak am a ni?
Nisienlakhom Zion chun,
Nau hasè a tuor tran chauin,
A nauhai a hring tlat si!
9 Nau nei hun chen thruoi tlungin,
Nau ka’n hringtir naw ding maw?
A hring hun a tlung phing leh,
A sul ka khârpèk ding maw?”
Tiin LALPA chun a hril.
10 “A hmangaitu po po chun,
Jerusalem chu hlimpuiin,
Ama sûntu po poin,
Nasa takin lawmpui ro.
11 A trângah inbeitirin,
A nene’n chawm tlei a ti cheu;
Fâwpin ne kuong kuong in ta,
A tui tam chu lawm in tih”
Tiin in LALPA chun a hril.
12 Hi hi LALPA chun a hril:
“Remna chu vadung angin,
A kuom tieng luong lut a ta,
Vadungte lèt ang elin,
Hnam tinhai hausakna chu,
A kuongah luong liem a ta;
Chuonghai chu tlàn tang in ta,
A kutin pom a ti cheu a,
A mal chungah chuong in tih.
13 Nuin nau a’n awi angin,
Kei khomin inawi ka ti cheu;
Jerusalema chun muong takin,
In um ta ding a ni si” tiin.
14 Chu thil chu in hmu pha chun,
In lungril lawm tang a ta,
In ruhai khom hlobet angin,
Hung inno dur dur a tih.
A siehlawhai chunga chun,
LALPA kut chu um a ta,
A hmêlmahai chunga chun,
A lungsen suklang a tih.
15 A lungsen hrîk thla ding le
Meichoka zilhau tawl dingin,
En ta, mei leh LALPA a hung;
A tawlailirhai khom chu,
Thrawngaleivir ang a nih.
16 A meichok le kawlhnâmin,
Mihriemhai chungah rorêlna,
LALPA chun hung chelek a ta,
Mi tam tak sukhlum a tih.
17 “Inthien le insukthienghlim dinga huona fehai le anni laia voksa le mazu sa le sa porchè fatuhai chu an rêngin bohmang tlàng an tih,” tiin LALPA chun a hril. 18 “An thilthawhai le an suongtuohai ka hriet a, hnam tin le trong tina mihai chu lawr khawm dingin ka hung trèp a nih; chuongchun hung an ta, ka ropuina hmung an tih. 19 “Chun, anni lai inchikna inentir ka ta, hlaa la um sunhai chu hnam tin- Tarsis mihai, Libia mihai, thal kap thiem Lydia mihai, Tubal le Grik mihai le thlierkar hla taka um, ka hming inthangzie la hre ngai lo le ka ropuizie la hmu ngai lohai- kuoma chun tir ka ta, hnamhai kuoma chun ka ropuizie puong dar an tih. 20 Israel thlahaiin an thil inhlànhai chu bûr le bèl thienghlim taka LALPA Tempula an hung lak lut hlak ang hin, LALPA kuoma thilhlân dingin hnam tin laia inthokin in unauhai po po chu sakor chunga dam, tawlailira dam, thuomhnaw phurna tawlailira dam, sabengtung le sanghawngsei chunga dam chuongin, ka tlâng thienghlim, Jerusalemah ka hung thruoi khawm ding a nih. 21 Chuonghai laia threnkhat chu thiempu ding dam le Levi chi-a ding damin ruot ka tih”, LALPA chun a tih. 22 “Van tharhai le hnuoi thar ka siem ding chu ka hmaah um zing a ta, in thlahai le in hminghai khom um zing bok a tih. 23 Thla thar ni zat le Sabat ni zàtin mi po po chu chibai mi buk dingin ka hmaah hung zut zut an tih. 24 Fe suok an ta, ka laka helhai ruong chu en an tih; an ngèhai chu thi naw ni a, mei khom chu sukmitin um bok naw ni a, mi po poin tirdakum ting an tih” tiin LALPAN a hril.