Sim dinga ngenna
5
1 Nangni Israel suongkuohai,Hi thu hi lo ngaithla ro,
Nangni sûnna thu a nih:
2 “Nunghak thienglàm Israel chu,
Tho nawk ta lo di’n a tlu ie!
A ramah maksanin a um a,
Kei thotu hrim a nei nawh.”
3 Lalpa PATHIEN chun a hril:
“Israel khawpuia inthoka,
Indoa fe sipai sangkhat lai,
Zakhat chauh kîr nawk an ta,
Zakhat fe suokhai lai khom,
Mi sawm chauh hung kǐr an tih.”
4 Israel sungkuohai kuomah,
LALPA chun hieng hin a hril:
“Mi zong unla, dam in tih.
5 Bethelah mi zong naw unla,
Gilgalah fe bok naw unla,
Beerseba pan bok naw ro.
Gilgal mihai chu salah man an ta,
Bethel khuo chu sukram an tih.”
6 LALPA zong ro, dam in tih.
Chuong anga in thaw naw chun,
Josefa in sungah mei suok a ta,
Bethel kang ram vong a ta,
Mei threltu nei naw ni hai.
7 Hlei nei taka ro rêl a,
Thudik hnuoia peituhai chun,
In du la hmu ngei in tih.
8 Siruk le sizucho hai siemtu,
Thim khom zing khawvara inleta,
Var khom zana inchangtirtu,
Tuipuia tuihai chu ko a,
Hnuoi chunga buok hlaktu hi,
A hming chu LALPA a na,
9 Mi hrathai a suktlawm a,
An kulhai a sukchim hlak.
10 Fel taka rorêltu chu theidain,
Thudik hriltu cheu in hmusit si.
11 Pasehai in sirde a,
An buhai in inchu thlàkpèk a.
Pakka in ropui in bawla chu,
Chu taka chun chêng naw ti niu;
Grep huon thra in siema chu,
A uoiin chu dawn naw ti niu.
12 Poi in tawk rawn tăkzie hai,
In suolziehai ka hriet vong.
Mi indik insukdŭda a,
Thamna lak in chîng bok a,
Pasehai chu rorêlnaah,
Thiem naw in inchangtir hlak.
13 Chuleiin mi fimkhur chun,
To an inchu a ni hih,
Hun thra naw lai a ni si a.
14 Suol nĕkin thil thra hnot ro,
In dam khawsuok theina dingin;
Chuongchun in hril ang hrimin,
LALPA, Iengkim Pathien chu,
In kuomah um zing a tih.
15 Suol theidain, thil thra dit unla,
Rorêlna fel fai kengkaw ro,
LALPA, Iengkim Pathien chun,
Josefa thla dam sunhai chu,
A lunginsiet thei tâkduoiin.
16 LALPA Iengkim Pathien,
LALPA chun hieng hin a tih:
“Kotthlĕr tinah trap khêk an ta,
Tuolzawl tinah inrûm an tih.
Loneituhai chu trap ding le
Lusûn thiemhai chun trap hla,
Inzawt dingin ko khawm an tih.
17 Grep huon tinah trap an tih,
Ka pal tlang ding a ni si a,”
Ti hi LALPA hril chu a nih.
LALPA Ni chu
18 LALPA ni nghâktuhai chung,
A va hang pik char char ngei de!
Ieng leia LALPA ni chu,
In nghăk hrim hrim am a na?
Chu ni chu var loin inthim a tih.
19 Sakeibaknei laka tlan suokin,
Savom a’n tuokpui ang el le,
Inah lut a, bang hang tawk a,
Rûlin a kut a lo chuk ang a nih.
20 LALPA ni chu var loin,
Inthima khom thim sa tak el,
Var zung hrim a lut nawna,
A ni ding an naw am a ni?
21 In kŭt hmanghai po po hi,
Theidain ka hmu dong a,
In inkhawmpui ropuia hai khom,
Lawmna hrim ka nei ta nawh.
22 Pumraw thilhlân in inhlànhai,
In bu le bâl thilhlanhai khom,
Lo pompek nawng ka ti cheu;
Ran thâu in inhlànhai khom,
Ienga ding khom ka ti nawh.
23 In hla sak ri ka ngai pei nawh,
In tringtrang ri ngaithla naw ning.
24 Sienkhom rorelna indik chu,
Vadung angin luong sienla,
Tui hnăr kang lo vadung angin,
Felna chu luong dem dem raw se.
25 Aw Israel sungkuohai,
Thlalera kum sawmli sung,
Ka thruoi sung po po cheu khan,
Hlanbiekna ding thilhlânhai,
In mi hung chawipek hlak maw?
26 In milim, lala inko Sakut le,
In arasi pathien Kaiuan hai chu,
An tempulhai leh in som pei a.
27 Chuleiin Damaska khêlah,
Salah ka thruoi ding cheu a nih”
Ti hi LALPA thu suok a na,
A hming Iengkim Pathien a nih.