3 “Bawngchal amanih, beram amanih mihaiin LALPA kuoma a hung inhlăn taphot chu a dăr dam, a khâk bawr ve ve le a sûng po chu thiempu sa ding a nih. 4 In bu le bâl, uoiin le hriek in thar suok hmasa tak dam le in beram laia a hmul in vaw hmasa tak dam chu thiempu in pêk bok ding a nih. 5 LALPA in Pathienin LALPA hminga rongbawla um kumkhuo dinga in hnam po po laia anni le an thlahai chu a thlang an ni si a.

6 “Levi mi tu khomin in umna Israel rama ieng khuo khom suoksan a, LALPAN a la ruot ding hmunah châk taka a hung inpĕm chun, 7 chu taka LALPA hmaa rongbawla um a unauhai, a Levi chanpuihai ang bokin LALPA a Pathien hmingin rong a bawl ding a nih. 8 An sungkuo thil nei a zor man chu hmu sien khom, thiempu danghai chanpuol dong ang chu dong ve tho a tih.

9 “LALPA Pathienin a pĕk chêu ram in lŭt pha chun, chu taka hnamhaiin thil tirdakum an thaw hlak chu in thaw ve ding a ni nawh. 10 Mani naupa amanih naunu amanih meia inhlăntu dam, aien chǐng le thrumvâwr chîng dam, mitvaidawi thiem dam, dawithiem dam, 11 dawi vêttu dam, ramhuoi zawl ruoitu dam, rău ko thiem dam le mithi inbiekpui chîng mihai chu nangni lai an um ding a ni nawh. 12 Hieng thil thawtu taphot chu LALPAN a tirdak a, hieng ang chǐng dăn tirdakum an chǐng leiin LALPA in Pathien chun hieng hnamhai hi in hmaah a hnot suokpĕk ding chêu a nih. 13 LALPA in Pathien hmaah soisel bo in ni ding a nih.

14 “In hlu suok ding hnamhai chun aien thiem le thrumvâwr chînghai thu an ngaithlak hlak a, nangni ruok chun chuong anga in thaw ve chu LALPA in Pathienin a phal nawh. 15 LALPA in Pathien chun nangni laia inthokin keima ang bok zawlnei a hung tirpèk ding chĕu a nih, a thu lo ngaithla ro. 16 Horeb tlanga mipui in pungkhawm ni khan, ‘LALPA kan Pathien rawl chu min hriettir ta naw la, hi mei rapthlâk tak hi mi’n hmutir ta naw rawh, thi rawi kan tih’ tiin LALPA in Pathien chu in ngĕn a ni kha. 17 LALPA chun ka kuomah, ‘An thu hril chu a thra. 18 An unauhai laia inthokin nangma ang zawlnei indinpêk ka tih. A băuah ka thu sieng ka ta, hril dinga thu ka pĕk taphot chu ama chun anni chu hril a tih. 19 Ka hminga hriltu zawlnei băua thu ka siehai ringnawtu chu a chungthu keiman ngaituong ka tih. 20 Amiruokchu, ka hminga hril dinga thu ka pĕk ni lo hriltu zawlnei amani le pathien dang hminga hriltu zawlnei taphot chu in sukhlum ding a nih’ a ta.

21 “Tuhin lungrilin, ‘Ieng tin am thu chu LALPA hril a ni le ni naw ti kan hriet thei ding?’ tiin in indon a ni thei. 22 Zawlneiin LALPA hmingin thu a hril a, a thil hril chu a hung tlung naw a, a hlawtling naw bok chun, chu chu a nih LALPA hril naw thu chu. Chu zawlnei chun ringvănga a hril mei mei a nih. Ama chu in trì ding a ni nawh.