5 A zinga chun Juda hotuhai, upahai le Dan zirtirtuhai chu Jerusalemah an inkhawm a. 6 Chuonghai laia thrang chu thiempu laltak Anna hai, Kaiafa hai, Johan^a hai, Aleksandar hai, thiempu laltak sungkuoa mihai dam an nih. 7 Peter le Johan chu an hmaah an inngirtir a, “Ieng thilthawtheina le tu hmingin am hieng thil hi in thaw a na?” tiin an suosal a. 8 Peter chu Thlarau Thienghlimin a sip a, an kuomah, “Rorêltuhai le vantlang upahai, 9 voisun hin kebai chungah lunginsietna thilthaw inentir a ni lei le iengtia hung dam am a na ti thu hril dinga in mi ko a ni chun, 10 nangni po po le Israel mi po poin hre ro: in hemde tah, Pathienin mithi laia inthoka a keitho nawk tah Nazaret Isu Krista hmingin hi pa hi sukdam a na; tu hin in hmaah dam varin a ngir tah hi. 11 Ama chu a nih, nangni in bawltuhai lung hnawl, a bulthrut lungphum poimaw tak chu. 12 Tu dang kuoma khom sandamna a um nawh; van khup hnuoia mihriem hming sak lai mi sandam thei hming dang hrim hrim a um nawh” a ta.

13 Peter le Johan huoizie an hmu chun, lekha inchûk lo le mi naran el an nih ti an hriet si leiin, mak an ti hle a; Isu kuoma um hlak an nih ti an hriet tah a. 14 An sukdam, anni bula ngîr an en hlak chun hang soisel ding ieng khom an hmu bok si nawh. 15 Chuongchun, Sanhedrina inthokin an insuoktir a, anni rawi chu an inrawn khawm a. 16 “Hienghai hi iem ei law ding a na? Thilmak ropui tak an thaw ti Jerusalema mi po poin an hriet ta bok si a; eini khomin ei sêl thei ta naw a ni hi. 17 Nisienlakhom, miin an hriet dar nawkzuol nawna dingin tu kuoma khom hi hminga thu hril ta lo ding hin vau ei tiu” an ta. 18 Chuongchun, anni chu an ko nawk a, Isu hminga thu hril ta lo ding le inchuktir ta dĕr lo dingin thu an pĕk a. 19 Nisienlakhom, Peter le Johan chun an kuomah, “Pathien mithmuah nangni thu zawm am Pathien thu zawm a’n dik lem ti nangni inngaituo ro. 20 Keini chun thil kan hmu le hriethai hi hril loin kan um thei nawh” an ta. 21 Chun, anni chun nasa nawkzuola an vau hnungin an insuo tah a. An thilthaw leia mi po poin Pathien an inpak si leiin anni hrem dan ding thu chu an rĕl thlŭk thei naw a nih. 22 Mak taka an sukdam chu kum sawmli chuong hiela upa a ni ta bok si a.

23 Peter le Johan an insuo hnung chun an ruolhai kuomah an fe a, thiempu lalhai le upahai thu hril chu an hril sawng vong a. 24 Chu chu an hrietin, an rêngin inring takin Pathien kuomah an trongtrai a, “Aw Laltak, nang van hai, hnuoi hai, tuifinriet le a sunga thil um hai po po siemtu, 25 Thlarau Thienghlimin kan thlatu, i siehlaw Davida bau hmangin hieng thu hi a lo hril a:

27 Chuong ang tak chun hi khuoa hin i siehlaw thienghlim Isu, i hriek nâl chunga chun Heroda le Pontia Pilat hai chu Jentelhai le Judahai leh an inthuruol ta ngei a. 28 Nangin i thilthawtheina le dit dana thil hung tlung ding i ruot lawk anga intlungtir dingin an pung khawm a lo nih. 29 Lalpa, tuhin an mi vauh dan hi ngai ta, i thu hril ngam dingin i siehlawhai hi huoisenna pe rawh. 30 Mihai sukdam dingin i thilthawtheina kut suklang la, i siehlaw thienghlim Isu hmingin inchikna thilmakhai inthawtir bok rawh” an ta. 31 Chuonga an trongtrai zo chun an um khawmna in chu a hung inhnǐng a, an rêngin Thlarau Thienghlimin an sip a, huoi takin Pathien thu an hril tah a.

32 Ringtuhai chu lungril hmun khat le ngaituona hmun khatin an um a, an ni lai tu khomin an thil neihai chu ‘Ka tâ bǐk a nih’ an ti naw a, thil iengkim an intlăng a. 33 Tirkohai chun thilthawtheina nasa tak neiin Lalpa Isu thonawkna thu an hril hlak a, an rêngin malsawmna nasa tak an dong a. 34 Anni lai tu khom tlasam an um bok nawh. In amanih ram amanih an nei taphot an zor a, a man an hung chawi a, 35 tirkohai kuomah an inhlăn a, an mamaw ang peiin an insem hlak. 36 Josefa, tirkohaiin ‘Barnaba’ (Thlamuongna naupa) an ti, Levi chia mi, Kupra thlierkâra um khomin a ram a zor a, 37 a man chu hung chawiin tirkohai kutah a’n hlàn a.