5 Isu chu a ngha vel a, mipui tam tak a kuom tieng pana hung a hmu chun Filip kuomah, “Hienghai fàk ding hi bei khaw lai am inchawng ei ta?” a ta. 6 Chu chu Filip fiena dinga a hril a nih, a thaw ding chu aman a hriet diem ta si a. 7 Filip chun, “Mi tinin tlawmtea an chang seng ding khom ni sien, puitling pakhat thla riet hlaw khomin dai naw nih” a ta. 8 A zirtir laia pakhat, Andri, Simon Peter unaupa chun, 9 “Hi taka hin naupang pakhat barli beipêr panga le ngate pahni chawi a um a, sienkhom mi hieng zozai lai hin chu chu ieng tham am ning a ta?” a ta.

10 Isun, “Mipuihai hi inthrungtir ro” a ta. Chu hmun chu hlobet hmun a na, patling ngot khom sangnga laia tam chu an inthrungtir a. 11 Isun beipêr chu a lâk a, lawmthu a hril zoin mipui thrunghai kuoma chun a sem a, chuong ang chun nga khom chu a sem bok a, an khop tawkin an chang seng a. 12 An fak khop chun zirtirhai kuomah, “Fàk mahlahai kha ieng khom inchek ral lo dingin rût khâwm vong ro” a ta. 13 Barli beipêr panga an fâk bàng an rût khawm chu bawm sawmpahni sip a nih. 14 Inchikna thilmak a thaw mipuiin an hmu chun, “Hi mipa hi Zawlnei, khawvela hung ding chu a ni ngei hi” an ta. 15 Lala siem lui dingin an hung inthok tum ti Isun a hrietin tlângah ama chauin a fe hmang nawk tah a.

16 Khuo a hung inhnu chun a zirtirhai chun dîl tieng an pan thla a, 17 chu taka chun Kapernaum pan dingin longah an chuong a, an inthok suok a, khuo khom a hung inthim tah a, Isu hlak chu a la hung tlung si nawh. 18 Thli na taka a hrâng leiin tui chu a fawn hlup hlup a. 19 Kilometer ruk vêl an inkar hnung chun Isu chu dîl chunga kea lawna long tieng hung pan an hmu a, an tri hle a. 20 Nisienlakhom ama chun, “Tri naw ro, kei ka nih” a ta. 21 Longa inchuongtir an nuom a, sienkhom an long chun an pan khawmuol chu a tlung ta nghal a.

22 A zînga chun dîl răla mipui la umhai chun long pakhat chau naw chu long dang an hmu naw a. Isu hlak chu a zirtirhai lai longah a chuong ve nawh ti le a zirtirhai chauh an fe ti an hriet bok si a. 23 Isun lawmthu a hril zoa bei an fâkna bul el dil kaia chun Tiberiaa inthokin long iemani zat an hung tlung a. 24 Isu le a zirtirhai chu chutaka chun an um ta nawh ti mipuiin an hmuin longahai chun an chuong a, Isu zongin Kapernaum tieng an pan a. 25 Dîl răl tieng Isu an va hmu chun, “Zirtirtu, ieng tik laiin am hi taka hin i lo tlung hman?” an ta. 26 Isun, “Thu dik tak hril ka ti chêu hi, inchikna thilmak in hmu leia mi zong in ni nawh, bei in făk khop leia mi zong in ni lem. 27 Bu bohmang nawk el hlak zongin inlap rak rak naw ro, chatuon hringna chen dai bu chu zong lem ro. Chu bu chu Mihriem Naupain pe’ng a ti chêu, chu dinga ama chu Pa Pathien namnghet a ni si a” a ta.

28 Chu phing leh anni chun, “Pathien dit dan anga a rong kan bawl theina dingin ieng am thaw’ng kan ta? ” tiin an indon a. 29 Isun, “Pathien rong in bawl dan ding chu hi hi a nih: a tir hi ring ro” a ta. 30 “An leh, kan hmua kan ring theina ding chèin inchikna thilmak ieng am thawng i ta? 31 Pathien lekha thua ‘Vana inthokin anni chu fak ding a pêk’ ti ang khan kan thlatuhaiin thlalĕrah manna an făk kha” an ta.

32 Isun, “Thudik tak ka hril chêu hi, vana inthokin Mosien bei a pek naw chêu, ka Pa a nih vana inthoka bei tak tak petu chĕu chu. 33 Pathien bei pĕk chu vana inthoka hung trum, khawvel ta dinga hringna petu hi a nih” a ta. 34 Anni chun, “Pu, chu bei chu mi pe rop rawh” an ta.

35 Isun, “Kei hi hringna bei chu ka nih; tu khom ka kuoma hung chu a phìng trâm ngai naw ni a, a mi ringtu chu a dang châr ngai bok naw nih. 36 Amiruokchu, ka hril ta chêu ang khan, in mi hmu taa chu in mi ring si nawh. 37 Pain a mi pĕk po chu ka kuomah hung an ta, ka kuoma hung taphot chu hnot suok naw ning. 38 Mani ditzawng thaw dinga văna inthoka hung ka ni naw a, a mi tirtu ditzawng thaw dinga hung trum ka ni lem. 39 A mi tirtu ditzawng chu hi hi a nih: Aman a mi pĕk po po tu khom inhmang loa ni kin nia ka keitho nawk vong hi. 40 Ka Pa ditzawng chu hi hi a nih: tu khom Naupa hmua ama ring taphotin chatuon hringna neia, anni chu ni kin nia ka keitho nawk chu” a ta.

41 “Vana inthoka bei hung trum chu ka nih” a ti leiin Judahai a chungah an chier a. 42 “Hi mipa hi Josefa naupa Isu kha a ni naw am a ni? A nu le pa khom ei hriet annawm. Ieng leia tuta ‘Vana inthoka hung trum ka nih’ dam a ti an lie?” an ta.

43 Isun a don a, “Chier chier naw ro. 44 Mi tirtu Pain ka kuom tieng a hîp naw chu tu khom ka kuomah an hung thei nawh; anni chu ni kin niah keitho ka tih. 45 Zawlneihaiin, ‘An rêngin Pathienin zirtir a tih” ti an lo ziek kha. Mi tin, Pa thu hre a, a kuoma inthoka inchûk taphot chu ka kuomah an hung hlak. 46 Pa hmu tah an um tina a ni nawh; Pathiena inthoka hung pa hi Pa hmutu um sun chu a nih. 47 Thudik tak ka hril chêu hi, a ringtu chun chatuon hringna a nei tah. 48 Kei hi hringna bei chu ka nih. 49 Inthlatuhaiin thlalĕrah manna an făk a, sienkhom an thi a. 50 Văna inthoka bei hung trum ruok hi chu a fa taphot thi naw ni hai. 51 Kei hi văna inthoka hringna bei hung trum chu ka nih. Hi bei hi tu khomin a fâk chun kumkhuoin hring zing a tih. Khawvel hringna dinga ka pĕk ding bei chu ka taksa hi a nih” a ta.

52 Chuongchun Judahai chu nasa takin an insĕl a, “Hi pa hin ieng tin am a taksa făk dingin mi pe thei a ta?” an ta.

53 Isun an kuomah, “Thu dik tak ka hril chêu hi; Mihriem Naupa taksa fa a, a thisen in dawn bok naw chun nangni khâtin hringna in nei si nawh. 54 Tu khom ka taksa fa a, ka thisen dawntu chun chatuon hringna a nei tah, keiin ni kin niah ama chu keitho bok ka tih. 55 Ka taksa hi bu tak tak a na, ka thisen hi dawn ding tak a nih. 56 Tu khom ka taksa fa a, ka thisen dawntu chu keimaah a um zing a, kei khom amaah ka um zing a nih. 57 Pa hring zing chun a mi tir a, Pa leiin kei khom ka hring a, chuong ang bokin tu khom mi fatu chu keia leiin hring ve’ng a tih. 58 Hi hi vana inthoka bei hung trum chu a nih. Inthlatuhaiin manna an făk a, an thi a, hi bei fatu ruok chu chatuonin hring a tih” a ta.

59 Kapernaum Sunagoga a zirtir laiin Isun hi thu hi a hril a nih.

60 A zirtir tam takin chuong thu chu an hrietin, “Hi hi thu khir tak a nih, tuin am awi thei an ta?” an ta.

61 Chu thua chun a zirtirhai an chier ti Isun a lungrilin a hriet a. “Hi thu hin a khei deu cheu am a ni? 62 Mihriem Naupa hi a umna ngaiah a kîr tung hmu lem inla chu ieng tin hielin am in ngai ding maw! 63 Hringna petu chu thlarau a nih; taksa chu ieng khom a ni nawh. Thu ka hrilhai cheu hi thlarau le hringna a nih. 64 Nisienlakhom, nangni lai a ring naw in um” a ta. A ring nuom lo ding le ama inmantirtu ding chu a tira inthokin Isun a hriet zing si a. 65 “Chu lei tak chun a nih in kuoma ‘Pain ka kuoma hung dinga a tihai naw chu tu khom ka kuomah an hung thei nawh’ ka ti kha” a ta.

66 Chu chena inthok chun a zuitu laia mi tam tak hnăr a kîr a, a kuomah an fe nawk ta naw a. 67 Chuongchun, sawm le pahnihai kuoma chun Isun, “Nangni khom fe hmang in nuom ve am?” a ta. 68 Simon Peterin a don a, “Lalpa, tu kuom dang am fe’ng kan ta? Nangin chatuon hringna thu i nei annawm. 69 Pathien Mi Thienghlim Krista chu i nih ti kan ring a, hriet khom kan hriet” a ta. 70 Isun an kuomah, “Nangni sawm le pahnihai hi keima thlang in ni naw’m a ni? Nangni laia pakhat hlak Diebol a ni nawk nghal bok leh!” a ta. 71 Simon Iskariot naupa Juda chu sawm le pahnihai laia pakhat ni sien khom a hnunga ama inmantirtu ding a ni si thu a hrilna a nih.