2 Judahai Bawkte Kŭt^a chu a hnâi tah a. 3 Isu unauhai chun a kuomah, “Hi hmun hi suoksan la, Judai ramah fe rawh, i zirtirhaiin i thilthaw hi an hmu theina dingin. 4 Hmingthang nuom siin tu khomin a rûkin thil an thaw ngai nawh. Hieng thil hi i thaw rau rau si chun khawvel hrietah intar lang ta la” an ta. 5 A unauhai ngei khomin ama chu an ring si nawh. 6 Isu chun, “Ka hun a la tlung nawh, nangni hun ruok chu a tlung zing a nih. 7 Chuleiin, khawvelin nangni a theida thei naw chêu, kei ruok chu a mi theida a, a thilthaw suol ka’n hriettir hlak leiin. 8 Kûta chun hang fe unla, kei chu la fe hri naw phot ka tih, ka hun a la tlung naw leiin” a ta.

9 Chuong thu chu an kuomah a hril a, Galili ramah a la châm zing a.

10 Kût hmang dinga a unauhai an fe hnungin ama khom tlang hriet loin a rûkin a hang fe a. 11 Kût lai chun ama chu Judahaiin an zong a, “Khaw lam a um?” tiin an indon a. 12 Mipui chun a chanchin an hril sup sup a. Threnkhatin “Mi thra a nih” an ta, a threnin “Teu lo e, mipui hlêmtu a nih” an ti bok a. 13 Judahai an tri leiin tu khomin a chungchang thu uolâu takin an hril ngam nawh.

14 Kût vanglai takin Isu chu Tempulah a hang fe a, a zirtir a. 15 Judahaiin, “Hi pa hin inchûkna nei si loin iengti lawm lawma hienga a hriet?” tiin makti takin an indon tuo a. 16 Isu chun, “Ka thu inchuktir hi keima âwm thu suok el a ni naw a, a mi tirtu zirtirna a ni lem. 17 Tu khom Pathien ditzawng thaw nuomtu chun ka thu inchuktir hi Pathiena inthoka suok am ka phuokfawm ti hrieng an tih. 18 Tu khom mani phuokfawm thu hriltu chun mani ropuina a zong a nih. A tirtu ropuina zongtu ruok chu mi thutak a na, amaa chun indik nawna hrim a um nawh. 19 Mosien Dan a pêk chĕu an naw maw? Sienkhom tu khomin in zawm nuom bok si nawh. Ieng leia mi that in tum?” a ta.

20 Mipui chun, “Ramhuoi zawl i ni hi; tuin am that a tum rêng rĕng che le?” an ta. 21 Isu chun, “Thilmak pakhat ka thaw a, inrêngin mak in ti a. 22 Mosien sertan thu a pêk lei chêuin (Mosie thaw tran ni loin in thlatuhai chîng tran a ni lem kha), Sabat ni khomin ser in tan hlak. 23 Mosie Dan bawsiet nawna dinga Sabat ni khoma naupang ser in tan hlak si chun, ieng dinga Sabat nia mi ka sukdam lei ela ka chungah in lung a sen bik? 24  Puo tieng inlang dan ringot thlir loin, indik takin thu rêl ro” a ta.

25 Jerusalema mi threnkhatin, “Hi pa hi that an tum kha a ni naw’m a nih? 26 En ta u, tlâng hrietin thu a hril a, tu khomin an kal si naw hi! Ama hi hotuhaiin Krista chu ni ngêiin an hriet tah tǐna amani ding maw? 27 Hi pa hi khaw lai mi am a nih ti ei hriet si a; Krista chu a hung pha chun a hungna chin tu khomin an hriet âwm top si nawh” an ta.

28 Tempula a zirtir lai zing chun Isun rawl inring takin, “Nangnin in mi hriet, khaw lai mi am ka nih ti khom in hriet. Nisienlakhom, keima thua hung ka ni nawh. A mi tirtu hi mi indik tak a na, ama chu in hriet nawh. 29 Kei ruok chun ama chu ka hriet; a kuoma inthoka hung ka na, ama mi tir ka nih” a ta. 30 Chuongchun, ama chu man an tum a, sienkhom a hun a la tlung naw leiin tu khomin a chungah kut an thlăk hri nawh. 31 Mipui laia mi tam tak ruok chun ama chu an ring a. “Mesia khom hung sien la, ama nêk hin inchikna thilmak a thaw rawn bik chuong ding am a nih?” an ti tawl a.

32 A chungthua mipui titi rŭk chu Farisaihaiin an hrietin, thiempu lalhai le Farisaihai chun Isu man dingin tempul vengtu an tir a. 33 Isun an kuomah, “Sawtnawte in kuomah la um hrǐng ka ta, chu zoah a mi tirtu kuomah fe’ng ka tih. 34 Nangnin mi zong in ta, mi hmu naw ti niu; ka umna dinga khom hung thei naw ti niu” a ta. 35 Judahai chun, “Ei hmu thei naw dingin hi pa hi khaw lai am fe a tum a ni ding maw? Grikhai laia eini mi inpêm darhai lai fein Grikhai chu zirtir a tum am a ni ding? 36 ‘Nangnin mi zong in ta, mi hmu si naw ti niu, ka umna dinga khom hung thei naw ti niu’ a ti hi ieng tina am ning a ta?” an ti tawl a.

37 Kût trumtriek ni ding, a nipui ni taka chun Isu a ngîr a, inring taka khêkin, “Tu khom dangchâr chu ka kuomah hung sien, dawn raw se. 38 Pathien lekha thuin a hril angin, tu khom kei mi ring chu a sunga inthokin hringna tui hung luong suok a tih” a ta. 39 Chu chu ama ringtuhaiin Thlarau an la chang ding thu a hrilna a nih. Thlarau chu pĕk a la ni hri nawh, Isu chu chawimawia a la um si naw leiin.

40 Chuong thu chu an hrietin mipui lai threnkhatin, “Hi pa hi zawlnei chu a ni ngei hi” an ti a. Mi dangin, “Hi pa hi Krista chu a nih” an ta. 41 Threnkhatin, “Krista chu Galili rama inthokin a hung suok ding maw? 42 Pathien thuin, ‘Krista chu Davida thla, Davida khuo Bethlehema hung pieng ding a nih’ a ti an naw maw?” an ta. 43 Chuongchun, ama leiin mipui lai inthrĕna a suok a. 44 Anni laia threnkhat chun man an nuom a, sienkhom tu khomin an tawk nawh.

45 Tempul vengtu-hai chu thiempu lalhai le Farisaihai kuoma chun an kǐr nawk a, anni chun, “Ieng dinga in hung thruoi naw?” an lo ta. 46 Tempul vengtuhai chun, “Hi mipa ang hrim hin tu khomin thu an la hril ngai nawh” tiin an don a. 47 Farisaihai chun, “Nangni khom a lo hlêm hman ve chêu a ni maw? 48 Hotuhai le Farisaihai laia mi tu khom ama ring an um nawh ti in hriet naw maw? 49 Dan khom hre lo mipuihai hi trongsephur an nih” tiin an khak a. 50 Anni laia pakhat Nikodem, kha hmaa Isu kuoma lêng tah khan, 51 “Ei Dan ang chun, miin a thiem thu a hril ngaithlâk zet hma le iem a thaw ti hriet chieng zet hma chun thiem naw inchangtir thei a ni’m a ni?” a ta. 52 Anni chun, “Nang khom Galili mi i ni ve am an tah? Pathien lekha thu ngun takin bi la, Galili rama inthokin zawlnei an suok ngai nawh ti hmung i tih” an ta.

53 Chuongchun, mi tin mani inah an inlawi ta seng a.