Dîl bula zeng sukdam
5
1 Chu hnung chun Judahai kŭt pakhat a um a, Isu khom Jerusalemah a hang fe a. 2 Jerusalema Berâm Kotkhar an ti bula chun dîl a um a, chu dîl chu Aramik trongin Bethesda an ta, tuolpûk panga a nei a. 3 Chu taka chun tui hung phul hun inchănin damnaw mitdel, kebai le zeng tam tak an zâl khup a. 4 A châng chăngin Lalpa vantirko a hung trum a, dîl tui chu a chokphul a, damnaw tu khom tui phul laia dila inchawm thla hmasa tak chu ieng ang natna nei khom an dam pei hlak a.a5 Chu taka chun kum sawmthum pariet zet zeng tah mi pakhat a um a. 6 Isun a zăl lai a hmu a, chuong ang chun sawt tak a um tah ti a hriet a, “Dam i nuom am?” a ta. 7 Zeng chun, “Pu, tui a hung phul pha dîla mi sietu ding mi ka nei si naw a, lŭt ka tum sŭngin mi dangin an mi lŭt khal nawk pei hlak annawm” a ta. 8 Isun a kuomah, “Tho la, i puonpha la la, lawn ta rawh” a ta. 9 Zeng chu a dam ta nghal a, a puonpha a lâk a, a lawn el tah a. Chu ni chu Sabat a nih.
10 A dampa kuoma chun Judahaiin, “Sabat a ni hi, i puonpha i chawi a thieng nawh” an ta. 11 Ama chun, “A mi sukdamtuin ‘I puonpha la la, lawn ta rawh’ a mi tih annawm” tiin a don tawl a. 12 Anni chun, “‘I puonpha la la, lawn ta rawh’ titu che chu tu’m a na?” an ta. 13 Ama chun tu’m a nih ti a hriet dêr si nawh, Isu hlak mipui inzi nuoi nuoi lai chun a pil hmang ta dai si.
14 Chu hnung chun Isun ama chu Tempulah a hmu a, a kuomah “Ngai rawh, i lo dam tah hi, suol nawk ta ngai naw rawh, chuong naw chun i chungah thil thra naw nawkzuol hung tlung rawi a tih” a ta. 15 Ama chu a fe a, a sukdamtu chu Isu a nih ti Judahai chu a va hril a. 16 Sabat nia chuong ang thil a thaw lei chun Judahaiin Isu chu an sukdŭdă tah a. 17 Isu chun anni chu a don a, “Ka Pain tu chen hin sin a thaw zing a, kei khomin ka thaw a nih” a ta. 18 Chuleiin Judahaiin ama chu sukhlum an tum nawkzuol a, Sabat a bawsiet lei chau khom ni loa Pathien a Paah inbûk a, Pathien tluka a’n siem leiin.
Isu thuneina
19 Isun anni chu a don a, “Thu dik tak ka hril chêu hi. Naupa hin Pain a thaw a hmu chauh naw chu ama khâtin ieng khom a thaw thei naw a, Pain a thaw ang ang chu Naupa khomin a thaw a nih. 20 Pain Naupa a hmangai a, a thilthaw iengkim a’n entir a, mak in ti dingin hieng nĕka thil ropui lem khom hi la’n entir a tih. 21 Pain mithi keithoa a sukhring nawk angin, Naupa khomin a nuom nuom a sukhring el a nih. 22 Pain tu chungthu khom a rĕlpĕk naw a, Naupa kuomah rorêlna a pêk vong a nih; 23 mi po poin Pa an inzà anga Naupa an inzàna dingin. Tu khom Naupa inzà naw chun ama tirtu Pa an inzà naw a nih.
24 “Thudik tak ka hril chêu hi, tu khom ka thu hrea a mi tirtu ring chun chatuon hringna a nei a, thiem naw a chang ta naw a, thinaa inthoka suokin hringnaah a lût ta lem a nih. 25 Thudik ka hril chêu hi, a hun a hung tlung ding a na, tu khom hin a tlung ta mêk a; mithihaiin Pathien Naupa rawl hrieng an ta, a hre taphot hring an tih. 26 Pa chu amaa hringna hnâr a ni angin Naupa khom amaa hringna hnâr nina a pek. 27 Mihriem Naupa a ni leiin a kuomah rorêl theina thu a pêk bok.
28 “Hieng hi makti naw ro, mithi lo zăl tah po poin a rawl an hriet hun la tlung a ta, 29 thlăna inthokin hung suok vong an ta, thil thra thawtuhai chu hringna chang dingin tho nawk an ta, thil suol thawtuhai ruok chu thiem naw chang dingin tho nawk an tih. 30 Keima khâtin ieng khom ka thaw thei nawh, hrila ka um ang peiin ro ka rĕl a, ka rorêl khom a’n dik a nih, keima ditzawnga thaw tum loa a mi tirtu ditzawng chauh thaw ka tum leiin.
Isu thu inhriettir
31 “Mani chanchin inhriettir ni lang chu, ka thu inhriettir chu ringsan tlâk ni naw nih. 32 Amiruokchu, ka thu mi hung inhriettirtu mi dang a um a, ka thu a hung inhriettir chu a’n dik ti khom ka hriet. 33 Johan kuomah mi in tir a, ama chun thutak a lo hril tawl ta chêu kha. 34 Mihriem hrietpuina ka pom lei ni loin, sandama in um theina dingin chuong chu ka hril a ni lem. 35 Johan chu khawnvar var tak a na, a varah hlim taka chĕng hri khom in nuom a. 36 Sienkhom, Johan thu hrietpuina nêka poimaw lem hrepuitu ka nei. Pain sin hlen dinga a mi pêkhai, tuta ka thaw lai mêk hin Pain kei a mi tir ngei a nih ti a’n hriettir a nih. 37 A mi tirtu Pa ngei chun ka thu a’n hriettir bok a nih. A rawl iengtik lai khom in hriet ngai naw a, a hmêl in hmu ngai bok nawh. 38 A thu khom lungrilah in pai zing nawh, a tir hi in ring naw leiin. 39 Pathien lekha thuhai ngun takin in inchŭk hlak, chuonghai chun chatuon hringna pe thei cheua in ngai leiin. Chuong lekha thuhai chu ka aia ka thu inhrietirtu an nih. 40 Chuong sà khom chun hringna nei dingin ka kuomah in hung nuom si nawh.
41 “Mihriem inpàk hlaw hi ka thil hnot a ni nawh. 42 Nangni ka hriet cheu. Lungrilin Pathien in hmangai nawh ti ka hriet. 43 Ka Pa hmingin ka hung a, in mi lo pom si nawh; mi dang mani hminga hung chu ni sien, ama chu lo pom in tih. 44 Pathien tak um sun chawimawi hlaw tuma thrang la si loa nangni inchawimawi ton ringot in lawm hin iengtin am ring thei in ta? 45 Pa kuomah keiin ka hĕk chêu ring naw ro, nangni hêktu chu in beisei innghatna Mosie a nih. 46 Mosie in ring dăm chu ni sien, kei khom mi ring in tih, ama chun ka chanchin a nih a ziek. 47 A thu ziek in ring si naw chun iengtin am ka thu hril ring hrim in ta?” a ta.