Juda lal Uzzia
26
1 Juda mi po po chun kum sawm le kum ruk mi Uzia chu an thruoi a, a pa Amazia aiin lalah an siem a. 2 Ama chun a pa Amazia thi hnungin Elath khuo chu a bawl thra a, Judai ramah a sie lut nawk a. 3 Uzia a hung inlal chun kum sawm le kum ruk mi a na, Jerusalemah kum sawmnga le kum hni ro a rêl a. A nu chu Jerusalem mi, a hming Jekolia a nih. 4 A pa Amazia thilthaw ang pei thaw vein LALPA mithmuah thil thra a thaw hlak a. 5 Zekaria dam sung po chun Pathien tri dingin a zirtir a, Pathien a zong hlak a, LALPA a zong sung po chun Pathienin a sukhmuingil pei a.6 Filistinhai a rùn a, Gath kul hai, Jabne kul hai, Asdod kul hai a sukchim a. Asdod khaw kawla khuohai le Filistinhai rama khaw threnkhathai chu a’n din thar a. 7 Pathienin Filistinhai laka le Gur Baala um Arabhai le Meunhai laka chun a thrangpui a. 8 Amon mihai chun Uzia lakah sie an hung chawi hlak a. A hung hràt ta hlè leiin Aigupta ram chenin a hming a hung inthang ta a. 9 Uzia chun Jerusalem kul kila kotkhar le ruom tienga kotkhar le kul kawina bang hrula chun in insang a bawl a, kulin a’n huon khum a. 10 Thlalera khom in insanghai a bawl a, ran tam tak a nei leiin tlang thrut le zawla hai chun tuikul tam tak a siem a. Lohma tieng ngaina mi tak a ni leiin tlang ram le ram thratna hmuna a lohai le grêp huona hai chun sinthawtu a sor treu a.
11 Uzia chun indo dinga inpei zing sipai tam tak a nei a, chuonghai chu lal thoktu Hanania inrawina hnuoiah an um a, lekha ziektu Jeiel le hotu Maaseia hai chun a pawl pawlin an inchik thlap a. 12 Chuong sipaihai chunga chun kawmandar sanghni zaruk an um a. 13 An hnuoia chun raldo thiem thralh mi nuoithum sangsari zanga, hmêlma laka lal ta dinga hrat taka dotu ding, an um a. 14 Uzia chun a sipai po po ta dingin phaw hai, fei hai, thir lukhum hai, thalngul hai, vomvira deng ding lungte hai a buotsai a. 15 Kulbing sanga hmang ding le kul kil tina inthoka thal kapna ding le lung lien tak tak vor suokna ding mi themthiemhai siem khawlhai chu Jerusalemah a sie treu a. A hming chu ram tinah a hung inthang a, a hung hrât hlè chenin nasa taka thrangpuiin a um a.
Uzia hremin a um
16 Nisienlakhom, a hung hrat hnung chun a hung chapo ta hle a, chu chu ama phûr thlutu a hung ni ta a. LALPA, a Pathien chungah thil suol a thaw a, maichàmah rimtui raw dingin LALPA tempulah a lût a. 17 Thiempu Azaria chun a zui a, mi huoi tak tak LALPA thiempu sawmriet an thrang bok a. 18 Anni chun Lal Uzia chu hmaisanah an khap a, a kuomah, “Uzia, LALPA ta dinga rimtui raw hi nangma thaw ding a ni nawh, rimtui raw dinga ser hrang Aron thlaa mi thiempuhai thaw ding a ni lem. Hmun Thienghlima inthok hin suok vat rawh. LALPA chungah thil suol i thaw a nih. LALPA Pathien laka chawimawi i hlawna ding khom a ni nawh” an ta.
19 Lal Uzia chu a lung a sen a, rimtui rawna ding mei lakna chu a chawi a. Chuonga thiempuhai chunga LALPA Tempula maicham hmaa a lungsen lai chun a bawkah a hung inphàr suok ta a. 20 Thiempu laltak Azaria le thiempu danghaiin an hang en chun a bawka phâr um chu an hmu a, inrang takin an hawl suok nghal a. LALPAN a hrem leiin ama ngei khomin fe suok a nuom ta hrim a. 21 Chuongchun, Uzia chu a thi ni chenin a’n phàr a, a’n phàr leiin lal ina inthokin a suok a, in hranah a um a, LALPA Tempulah a lut thei ta naw bok a. A naupa Jotham chu a ram mipuihai chunga rorêltu le optuin lal inah a um ta a.
22 Uzia inlal sunga thil tlung danghai chu a bula inthoka a tawp chenin Amoz naupa zawlnei Isaiin a ziek. 23 Uzia chu a pi le puhai kuomah a chawl a, mihaiin “Ama chu phâr a nih” an ti leiin a pi le puhai zalna kawl hnaia lalhai thlan hmuna chun an phùm a. A naupa Jotham chun a lalna chu a hung hluo ta a.