5 LALPAN lal Azaria chu a thi chenin phar hriin a hrem a, in hranah a um a, a naupa Jotham chun lal in chu a enkol a, a ram mihai chu ro a rèlpek a. 6 Azaria inlal laia thil tlung danghai le a thilthawhai chu Juda lalhai inlal lai chanchin inziekna lekhabuah a chuong. 7 Azaria chu a thlahai kuomah a chawl a, Davida khawpuia chun an phŭm a, a naupa Jotham chun a lalna chu a hung hluo ta a.

8 Juda lal Azaria inlala inthoka kum sawmthum le kum rietnaa chun Jeroboam naupa Zekaria chu Samaria-ah Israel lalin a hung inthrung a, thla ruk a’n lal a. 9 A pa ang bokin LALPA mithmuah thil suol a thaw a. Israelhai thil suol inthawtirtu Nebat naupa Jeroboam lampui hraw chu an kiengsan nawh.

10 Jabes naupa Salum chun Zekaria chu a phier ruk a, mipui hmaah a bei a, a that a, a hmunah lalin a hung um a. 11 Zekaria inlal sunga thil tlung danghai chu Israel lalhai inlal lai chanchin inziekna lekhabuah a chuong. 12 Chuongchun Jehu kuoma LALPAN, “I thlahai chu suon lina chenin Israel lalthrungphaah inthrung an tih” tia a lo hril chu a hung tlung kim tah a nih.

13 Juda lal Uzia inlala inthoka kum sawmthum le kum kuonaa chun Jabes naupa Salum chu Israel lalah a hung inthrung a, Samaria-a inthokin thla khat a’n lal a. 14 Chun, Gadi naupa Menahem chu Tirza khuoa inthokin Samaria-ah a fe a, Salum chu a that a, a hmunah lalin a hung um ta a. 15 Salum inlal sunga thil tlung danghai le a thil phier rukhai chanchin chu Israel lalhai inlal lai chanchin inziekna lekhabuah a chuong.

16 Chuong lai chun Menahem chu Tirzaa inthokin a suok a, Tipsa khuoin kot an lo hongpek nuom naw leiin a khuo le a se vel po po chu a bei a, a suksiet vong a, nuhmei inrâi lai phîng chenin a phir thlêr vong a.

17 Juda lal Azaria inlala inthoka kum sawmthum le kum kuonaa chun Gadi naupa Menahem chu Israel lalah a hung inthrung a, Samaria-ah kum sawm ro a rèl a. 18 LALPA mithmuah thil suol a thaw a, Israelhai thil suol inthawtirtu Nebat naupa Jeroboam lampui hraw chu a’n lal sung po poin a petsan nawh.

19 Asuria lal Pul, Tiglath-Pilesar an ti bok chun ram chu a hung rûn a, Menahem chun a rama ama lalna a suknghet theina dinga thrangpuitu dingin tangkaruo kilogram singthum le sangli pein a lo tlon a. 20 Tangka a pèk chu Menahemin Israela rama mi hausa pakhat peiah tangka sekel sawmnga seng phùt luia a’n thawtir a nih. Chuongchun, Asuria lal chu a ramah sawt um loin a kir nawk ta a.

21 Menahem inlal sunga thil tlung danghai le a thilthawhai po po chu Israel lalhai inlal lai chanchin inziekna lekhabuah a chuong. 22 Menahem chu a thlatuhai kuomah a chawl a, a naupa Pekahia chun a lalna chu a hung hluo ta a.

23 Juda lal Azaria inlala inthoka kum sawmnganaa chun Menahem naupa Pekahia chu Israel lalah a hung inthrung a, Samaria-a inthokin kum hni a ro rèl a. 24 Pekahia chun LALPA mithmuah thil suol a thaw a, Israelhai thil suol inthawtirtu Nebat naupa Jeroboam suolna chu a’n kiengsan ngai nawh. 25 A sipai hotuhai laia pakhat, Remalia naupa Peka chun ama chu a phier ruk a, Gilead mi sawmnga thruoiin Samaria-a lal in kul sungah Pekahia chu Argob le Arie hai leh a that a, Peka chu lalin a hung um ta a. 26 Pekahia inlal laia thil tlung dang le a thilthawhai po po chu Israel lalhai inlal lai chanchin inziekna lekhabuah a chuong.

27 Juda lal Azaria inlala inthoka kum sawmnga le kum hninaa chun Remalia naupa Peka chu Samaria-ah Israel lalin a hung inthrung a, kum sawmhni ro a rèl a. 28 Ama chun LALPA mithmuah thil suol a thaw a, Israelhai thil suol inthawtirtu Nebat naupa Jeroboam suolna chu a’n kiengsan ngai nawh.

29 Israel lal Peka inlal lai chun Asuria lal Tiglat-Pilesar chun Ijon hai, Abel Bet Maaka hai, Janoa hai, Kedes hai le Hazor khuohai po po dam, Gilead le Galili biel le Naftalia ram chenin a lak vong a, a ram mihai chu Asuria ramah salin a thruoi a. 30 Juda lal Uzia naupa Jotham inlal kum sawmhninaa chun Ela naupa Hose chun Remalia naupa Peka chu a phier ruk a, a bei a, a that a, a lalna chu a hung hluo ta a.

31 Peka inlal sunga thil tlung danghai le a thilthawhai po po chu Israel lalhai inlal lai chanchin inziekna lekhabuah a chuong.

32 Israel lal Remalia naupa Peka inlala inthoka kum hninaa chun Uzia naupa Jotham chu Juda lalah a hung inthrung a. 33 A hung inlal chun kum sawmhni le kum nga mi a na, Jerusalemah kum sawm le kum ruk a’n lal a. A nu hming chu Jerusa a na, Zadok naunu a nih. 34 A pa Uzia ang bokin LALPA mithmuah thil thra a thaw a. 35 Amiruokchu, hmunsanga bawlhmunhai chu a la sukbo chuong naw a, Israelhaiin chu taka chun thilhlan inhlan le rimtui raw an la thaw zing. Jotham chun LALPA tempul lutna korkhar sakhnung lem chu a siem thra a.

36 Jotham inlal laia thil tlung danghai le a thilthawhai po po chu Juda lalhai inlal laia an chanchin inziekna lekhabuah a chuong. 37 Chuong lai hun chun Aram lal Rezin le Remalia naupa Peka chu Judahai bei dingin LALPAN a tir tran ta a. 38 Chun, Jotham chu a thlatuhai lai a chawl a, a pi le puhai lai Davida khawpuia chun an phŭm a, a naupa Ahaz chun a lalna chu a hung hluo ta a.