5 Amazia chun Judahai chu a ko khawm a, Juda le Benjamin hnama mi po po chu an sungkuo dungzui peiin sangkhat chunga kawmandara dam le zakhat chunga kawmandara dam a ruot a, kum sawmhni le chung tieng, fei le phaw chawi thei po a tiem a, râl do thei mi nuoithum an um a. 6 Chu bâkah, Israel rama mi hrât le huoisen nuoikhat chu tangkaruo kilogram sangthum le zali sêngin a ruoi bok a. 7 Nisienlakhom, a kuomah Pathien mi, mi pakhat a hung a, “Aw lalpa, Israel sipaihai hi thruoi sa naw rawh. Israel mihai lai LALPA a um ta naw a, Efraim-hai lai khom a um ta bok nawh. 8 Fein huoisen takin va bei khom ni ta hrim la, i hmêlmahai hmaah Pathienin suktlawm tho a ti che, hnè theitu le suktlawm theitu chu Pathien a ni si a” a ta.

9 Amazia chun Pathien mi kuomah, “An leh, Israel sipaihai ka ruoina tangkaruo zozai kha iem ka law ta ding a na?” a ta. Pathien mi chun, “LALPAN a nêka tam lem dai a pêk thei che” a ta. 10 Chuongchun, Amazia chun Efraim rama inthoka sipai hung po po chu an in tieng a tirkir ta vong a. Anni chu Judahai chunga chun an lung a sen hle a, lungsen takin an kìr a.

11 Amazia chun zâm loin a sipaihai chu Chi Ruom tieng a panpui a, chu taka chun Seir mi singkhat an that a. 12 A hringin mi singkhat an man bok a, rawl koah an thruoi a, rawla chun an nam thlak a, an tla dar pheng phung a. 13 Chuong lai chun Amazia-in hung ve phal loa sipai a tir kirhai khan Judai rama khuohai, Samaria inthoka Beth Horon chenin an bei a, mi sangthum an that a, rallak tam tak an hawn bok a.

14 Edomhai rûn zoa Amazia a hung kir chun Seir mihai pathienhai chu a hung hawn a, a pathiena dingin a’n din a, chibai a bûk a, rimtui dam a’n hlàn a. 15 Chu lei chun Amazia chungah LALPA lung a chok a, a kuomah zawlnei a tir a, ama chun, “Hieng hnam danghai pathien, i kuta inthoka a mihai khom san suok thei hlei lo chu ieng ding hrima i biek am a na?” a ta. 16 A hril lai zing chun lalin, “Lal kuoma thurawn petu dingin tuin am a siem che a? To vat rawh! Ieng leiin am i hringna i chàn ding?” a ta. Zawlnei chun, “Hienga i thaw lei le ka thu i ngaithlak nuom naw leiin Pathienin sukbohmang che a tum a nih ti ka hriet” a ta, a to ta a.

17 Juda lal Amazia-in a remruotpuituhai a rawn hnungin Israel lal Jehu naupa Jehoahaz naupa Joash kuomah, “Hung la, hmaisanah hang inmel rum ei tih” tiin chona thu a thon a. 18 Israel lal Joash chun Juda lal Amazia kuoma chun, “Lebanon tlanga hlingin Lebanon tlanga sidar thing kuomah, ‘I naunu kha ka naupa nuhmeiah inneitir raw khai’ tiin thu a’n cha a. Lebanon tlanga chun ram sa a hung a, hling chu an hung chîl thlûk ta dêr a. 19 Nang hin ‘Ngai ta, Edom ka hnè bân dèr’ tiin i uong a ni hi tie! I inah intom trok trok la thra lem ding bah. Ieng dinga nang le Judai ram chopa sietna ding chok suok i tum am a na?” tiin mi a tir ve a.

20 Nisienlakhom, Amazia chun a lo ngaithlak nuom nawh; Edomhai pathien a biek leia Pathienin Judai ram chu a hmêlmahai kuta a pèk theina dinga a thaw a ni si a. 21 Chuongchun, Israel lal Joash chu a hang fe a, Juda lal Amazia le chun Judai ram Beth Semes khuoah hmaisanah an inmel ta ngei a. 22 Judahai chan chu Israelhai chan nêkin a hung se lem leiin Judahai chu mi tin mani in tieng an tlàn kir ta vong a. 23 Israel lal Joash chun Juda lal, Ahazia naupa Joas naupa Amazia chu Beth Semes-a chun a man a, Jerusalemah a thruoi a, Jerusalem kul chu Efraim kul kotkhara inthoka kul bang meter zahni vela sei chu a sukchim a. 24 Obed-Edom enkolna hnuoia um LALPA Tempula ro sie khawmnaa rangkachak le tangkaruo le bûr le bèl um po po le lal ina um po po chu a lâk a, mi hrên ding a man bok a, Samaria khuo tieng a kîr nawk ta a.

25 Juda lal Joash naupa Amazia chu Jehoahaz naupa Israel lal Jehoash thi hnungin kum sawm le kum nga a la dam a. 26 Amazia inlal laia thil tlung danghai chu, a bula inthoka a tawp chenin, Juda lalhai le Israel lalhai chanchin inziekna buah a chuong. 27 Amazia-in LALPA zui a bansana inthokin Jerusalema chun ama chu an phierruk a, Lakis khuoah a tlân a, mi an inhnottir a, chu taka chun an that a. 28 A ruong chu sakorin an inphur kirtir a, a pi le puhai kuomah Juda khawpuia chun an phûm ta a.