5 A lalna chu a suknghet phing leh a pa, lal thattu thoktuhai chu a that ve thung a. 6 Amiruokchu, Mosia Dan bua “Nauhai leiin pahai chu sukhlum ding a ni naw a, pahai leiin nauhai sukhlum ding a ni bok nawh, mi tin mani suol leiin an thi ding a nih” tia LALPA thupèk ang dungzuiin, a pa thattuhai nauhai ruok chu a that ve nawh. 7 Ama hin Chi Ruomah Edomhai mi singkhat a that a, an khawpui Sela a lâk a, Joktheel tiin a thlâk a, chu hming chu tu chen hin a la put zing.

8 Amazia chun Israel lal Jehu naupa Jehoahaz naupa Jehoas kuomah mi a tir a, “Hung la, hmai sanah hang inbei ei tih” tiin chona thu a thon a. 9 Israel lal Jehoas ruok chun Juda lal Amazia kuomah, “Lebanon tlanga hlingin Lebanon tlanga sidar thing kuomah, ‘I naunu kha ka naupa nuhmeiah inneitir raw khai’ tiin thu a’n cha a. Chun, ram sa huoi hi a hung a, hling chu a hung chìl thlùk a. 10 Nang hin Edom i hnè lei elin i lungril a chapo a ni hi tie! Hnèna i chang kha suongin intompui trok trok rawh. Nangma chopa Juda ram sietna ding ieng leia buoina chok suok i tum trâl trâl am a na?” tiin a lo don a.

11 Amiruokchu, Amazia chun a lo bengkhon nuom naw leiin Israel lal Jehoas chu a hang fe a, Juda lal Amazia le chun Judai ram Bet Semes-ah hmai intuoin an intuok a. 12 Juda chu Israel lakah a tlawm a, mi tin chu mani in tieng an tlan kìr ta vong a. 13 Israel lal Jehoas chun Juda lal Ahazia naupa Joas naupa Amazia chu Bet Semes-a chun a man a, Jerusalemah a kai tung a, Jerusalem kul chu Efraim Kotkhara inthoka a kil chen, meter zahni vela sei chu, a sukchim a. 14 LALPA Tempul le lal ina ro an siekhawmnaa mi rangkachak le tangka le bûr le bèl um taphot chu a lâk vong a, hrèn tăng ding mi iemani zàt a manhai leh an khawpui Samaria tieng a kir nawk ta a.

15 Jehoas inlal sunga thil tlung danghai le a thilthawhai le a hlen suokhai, Juda lal Amazia le an indo chanchinhai chu Israel lalhai inlal lai chanchin inziekna lekhabuah a chuong. 16 Jehoas chu a thlatuhai kuomah a chawl a, Samaria khawpuia chun Israel lalhai lai an phùm a. A lalna chu a naupa Jeroboam chun a hung hluo ta a.

17 Juda lal Joas naupa Amazia chu Israel lal Jehoahaz naupa Jehoas thi hnungin kum sawm le kum nga a la dam a. 18 Amazia inlal laia thil tlung danghai chu Juda lalhai inlal lai chanchin inziekna lekhabuah a chuong. 19 Jerusalemah an phier ruk a, Lakis-ah a tlan hmang a, Lakis-a chun mi an tir a, chu taka chun an that a. 20 A ruong chu sakorin an hung phur a, a thlatuhai lai Davida khawpuia chun an phùm a. 21 Juda mi po po chun Amazia naupa Azaria, kum sawm le kum ruk mi chu an thruoi a, lalah an siem a. 22 A thlatuhai kuoma Amazia a chawl hnungin Azaria chun Elath khuo chu a siem thra a, Judai ramah a lak lut nawk a.

23 Juda lal Joas naupa Amazia inlala inthoka kum sawm le kum nganaa chun Israel lal Jehoas naupa Jeroboam chu Samaria-ah Israel lalin a hung inthrung a, kum sawmli le kum khat ro a rèl a. 24 LALPA mithmuah thil suol tinrêng a thaw a, Israelhai thil suol inthawtirtu Nebat naupa Jeroboam suolna po po chu inkiengsan hrim a nei nawh. 25 LALPA, Israelhai Pathienin a siehlaw, Gath Hefer mi, Amitai naupa zawlnei Jona hmanga a lo hril tah angin, Hamath kawna inthoka Tuipui Thi chen chu Israel ramah a hui lut nawk a.

26 Israel mi tin, bawi khom bawi naw khomin rinumna nasa tak an tuor chu LALPAN a hmu a, thrangpuitu tu khom an um si nawh. 27 LALPA chun Israel hming chu van hnuoiah nuoi bo dinga a hril naw leiin, Jehoas naupa Jeroboam kut hmangin a san suok tawl a.

28 Jeroboam inlal sunga thil tlung danghai, a thilthawhai, a ral bei thuhai, Israel ta lo ni ta hlak, Hamath kawna inthoka Damaska chen Israel rama a hui lut nawk chanchinhai chu Israel lalhai inlal lai chanchin inziekna lekhabuah a chuong. 29 Jeroboam chu a thlatuhai kuomah a chawl a, a lalna chu a naupa Zekaria-in a hung hluo ta a.