Juda lal Jotham
27
1 Jotham a hung inlal chun kum sawmhni le kum nga mi a na, Jerusalemah kum sawm le kum ruk a’n lal a. A nu chu Zadok naunu, a hming Jerusa a nih. 2 A pa Uzia-in a thaw ang bokin LALPA mithmuah thil thra a thaw hlak a, sienkhom a pa thaw angin LALPA Tempul sunga ruok chu a lut lui ve nawh. Mipuihai ruok chun thil tirdakum thaw an la chîng zing a. 3 Chun, LALPA Tempula kotkhar chunghnung lem chu a siem thra a, Ofel muola kul banghai chu thra takin a’n din thar nawk a. 4 Judai ram tlang pheia chun khuohai a’n din a, ramngaw hmuna hai chun kul le vĕngbûk insanghai a bawl bok a.5 Jotham chun Amon lal a do a, a hne a. Chu kum chun Amonhai chun tangkaruo kilogram sangthum zali, huit metric ton sangkhat le barli metric ton sangkhat an hung pèk a. Chuong zât bok chu a kum hnina le kum thumnaa khom Amonhai chun an hung pèk a. 6 LALPA a Pathien hmaa ringum taka kal a chawi leiin Jotham chu a hung hràt ta deu deu a.
7 Jotham inlal sunga thil tlung danghai, a râl do po po le a thilthaw danghai po po chu Israel le Juda lalhai chanchin inziekna buah a chuong. 8 Kum sawmhni le kum nga mi a niin a hung inlal a, Jerusalemah kum sawm le kum ruk a’n lal a. 9 Jotham chu a pi le puhai kuomah a chawl a, Davida khawpuia chun an phùm a, a naupa Ahaz chun a lalna chu a hung hluo ta a.