Juda lal Ahazia
22
1 Kha hmaa Jerusalem hung rûntu Arab mihai le an inkoppuihaiin Jehoram naupahai laia an mi tlum tak Ahazia ti lo chu an that fai vong leiin, Jerusalem mihai chun Jehoram nau mi tlum tak Ahazia chu Judai ram lalah an siem a, a hung inlal tran ta a. 2 A hung inlal chun Ahazia chu kum sawmhni le kum hnia mi a na, Jerusalemah kum khat a’n lal a, a nu hming chu Athalia a na, ama chu Omri tunu a nih.3 Ahazia khom chun Ahab sungkuohai lampui chu a hraw ve a, thil suol thaw dinga keithruoitu chu a nu a nih. 4 Ahab sungkuohai ang bokin LALPA mithmuah thil suol a thaw a, a pa thi hnungin Ahab sungkuo danghai chu thurawn a lakna le a chunga sietna intluntu an nih. 5 Gilead biela Ramot khuoa Aram lal Hazael do dinga Ahazia-in Israel lal Ahab naupa Joram a fepuina san khom anni thurawn a lak lei a nih. Chu taka chun Joram chu Aram mihaiin an lo inhliem a. 6 Aram lal Hazael a va donaa Ramot-a an lo inhliem chu insukdam dingin Jezreel-ah a hung kir a. Juda lal Jehoram naupa Ahazia chu Ahab naupa Joram hliem kan dingin Jezreel-ah a zu fe a. 7 Ahazia-in Joram a zu kan lai chun a chungah Pathienin sietna a hung intlungtir a. Ahazia a hung tlung chun Ahab sungkuo suksetu dinga LALPA hriek nal Nimsi naupa Jehu chu tuok dingin Joram chun Ahazia chu a fepui a. 8 Jehu-in Ahab sungkuo chunga rorelna a kengkaw laiin Judai rama lal nauhai le Ahazia enkoltu a sungkuohai leh a hmu a, a that tawl a. 9 Ahazia chu an zong a, Samaria-a inbiruk chu an hmu a, an man a, Jehu kuomah an hung thruoi a, an that a. “A lungril po poa LALPA zong hlak Jehosafat naupa a ni si a” an ti leiin a phùmin an phùm a. Chuongchun, Ahazia sungkuoa inthokin lal nina chel theia hrât mi an nei ta naw a.
Juda lalnu Athalia
10 Ahazia nu Athalia chun a naupa thi a hriet charin Juda sungkuoa lalhai po po chu that chimit tumin hmä a lâk a. 11 Ahazia naupa Joas ruok chu lal Jehoram naunu Jehoseba chun lal nau a that dinghai laia inthok chun a lak hmang a, a dontunu leh a pindanah a thup a. Chuonga lal Jehoram naunu Jehoseba, Ahazia farnu le thiempu Jehoiada nuhmeiin Joas a thup lei chun Athalia-in a that ve thei ta naw a. 12 Athalia-in ram rorelna kum ruk a chel sung po chun Pathien tempulah anni kuomah a thup rùk a nih.