3 Kum sari hnungin nuhmei chu Filistinhai rama inthokin a hung kìr a, a in le lo pekir dinga hni dingin lal kuomah a hung a. 4 Chu lai chu lalin Pathien mi siehlaw Gehazi kuoma, “Elisan thil ropui a thawhai po po chu mi hril rawh” tia a lo indon lai tak a nih. 5 Nuhmei naupa thi hnung Elisan a sukhring nawk thu Gehaziin a lo hril lai taka chu nuhmei ngei lal kuomah a hung a hmu chun, “Aw laltak, ka pu, hi nuhmei naupa hi annawm Elisan a sukhring nawk chu! Hi a naupa ngei hi annawm a sukhring nawk chu” a ta. 6 Lal chun nuhmei chu a chanchin a’n don a, ama chun a hril a. Chun, a thil hni chungchanga chun lal chun a thoktu pakhat kuomah, “A ta po po le a lo thar suok po po chenin, hi ram a suoksana inthoka a hung kir nawk chen sunga mi chu pe kìr vong rawh” a ta.

7 Elisa chu Damaska khuoah a fe a, Aram lal Ben Hadad chu a lo damnaw a, Pathien mi a hung thu chu an hril a. 8 Ama chun Hazael kuomah, “Thilpek chawi la, Pathien mi chu va hmu rawh. Ka natna hi ka dam suok thei ding am ti ama hmangin LALPA mi lo rawnpek rawh” a ta.

9 Hazael chu Elisa hmu dingin a fe a, Damaskaa an thil nei thra tinrêng, sanghawngsei sawmli phur tawk a chawi a, a hmaa chun a va ngîr a, “I naupa Ben Hadad, Aram lalin, ‘Ka damnaw hi ka thra suok nawk ding?’ ti indon dingin i kuomah a mi tir a nih” a ta. 10 Elisa chun, “Fe la, a kuomah, ‘Hung thra suok ngei i tih’ ti va hril rawh. Chun, a thi ngei ding thu khom LALPAN a mi hril a nih” a ta. 11 Hazael chu a vǐng chen hielin Elisa chun mit la son der loin a en a. Chu zoah Pathien mi chu a trap ta a.

12 Hazael chun, “Pu, ieng dinga i trap am?” a ta. Elisa chun, “Israelhai poi i la tawk nasat dingzie ka hmu tlang vong lei a nih. An kulhai rawpek i ta, an tlangvalhai kawlhnâmin that i ta, an naupanghai chu hnuoi vuoknan hmang i ta, nuhmei nau pai lai hai phing chen phir thlèr i tih” a ta.

13 Hazael chun, “Kei i siehlaw uicho mei mei hin chuong ang thil nasa chu ieng tin am a thaw thei ding?” a ta. Elisa chun, “Aram lal i la hung ni dingzie LALPAN a mi’n hmutir a nih” a ta. 14 Chuongchun, Elisa kuoma inthok chun a suok a, a pu kuom tieng chun a fe a. A pu Ben Hadad chun, “Elisan ieng tin am a lo hril che a?” a ta, ama chun, “‘Thra suok nawk mol a tih’ tiin a mi hril a nih” a ta. 15 Sienkhom a zinga chun puon sa tak hi tuiah a’n chie a, chu chun a hmaiah a hup hlum a, a lalna chu a hung hluo ta a.

16 Israel lal Ahab naupa Joram inlala inthoka kum ngana, Juda lala Jehosafat a thrang lai chun a naupa Jehoram chun a lalna chu a hung hluo a. 17 Juda lal a hung ni chun kum sawmthum le kum hni mi a ni a, Jerusalemah kum riet ro a rèl a. 18 Ahab sunghai ang bokin, Israel lalhai lampui hraw chu a hung hraw ve a, Ahab naunu chu nuhmeiah a nei a, LALPA mithmuah thil thra lo tak a thaw hlak a. 19 Amiruokchu, a siehlaw Davida leiin LALPAN Judai ram chu a suksiet nuom naw a, kumkhawa Davida le a thlahai ta dinga khawnvar inneitir zing chu a lo tiem ta si a.

20 Jehoram hun lai chun Edom mihai chu Judahai lakah an hel a, lal an insiem chop a. 21 Jehoram chu a tawlailir po po leh Zair khuoah a va fe a. Edomhai chun a tawlailir kawmandarhai leh an inhuol vong a, sienkhom zana chun an tawn tlang a, an suok thei hràm a, a sipaihai chu an in tieng seng an tlàn dar ta vong a. 22 Edomhai chu tu chen hin Judahai lakah an la hel ta zing a nih. Chuong lai bok chun Libna khuo khom an lo hel ve a.

23 Jehoram inlal laia thil tlung danghai le a thilthawhai chu Juda lalhai inlal lai chanchin inziekna lekhabuah a chuong a ni naw am a ni? 24 Jehoram chu a thlatuhai kuomah a chawl a, Davida khawpuiah an phùm a, a hmuna chun a naupa Ahazia chu lalin a hung um ta a.

25 Israel lal Ahab naupa Joram inlal kum sawm le kum hninaa chun Juda lal Jehoram naupa Ahazia chu a hung inlal tran a. 26 Ahazian ro a rèl tran chun kum sawmhni le kum hni mi a na, Jerusalemah kum khat ro a rèl a. A nu hming chu Athalia a na, Israel lal Omri tunu a nih. 27 Ahazia chun Ahab sungkuohai lampui hraw chu a hraw ve a Ahab sungkuohai angin LALPA mithmuah thil thra lo tak a thaw hlak a, Ahab sungkuohai makpa a nih.

28 Ahab naupa Joramin Ramoth-Gilead khawa Aram lal Hazael a hang beinaa chun Ahazia chu a thrang ve a, Aramhai chun Joram chu an lo inhliem a. 29 Aram lal Hazael a beinaah Joram chu Aram haiin Ramoth khuoa an lo inhliem tak lei chun insukdam dingin Jezreel khuoah a kîr nawk a. Jehoram naupa Juda lal Ahazia chu Ahab naupa Joram hliem chu kan dingin Jezreel khuo-ah a zu fe a.