Thiempu Jehoiada chun an kuomah, “LALPAN Davida thlahai chungchanga thu a lo tiem tah angin, lal naupa chu lalah a um ding a nih. 4 In thaw dan ding chu hieng hi a nih: Sabat nia diutia hung nangni thiempuhai le Levihai chun hmun thuma threa hmun khatin kotpui in veng ding a nih. 5 Hmun thuma threa hmun khat chu lal inah um in ta, hmun thuma threa hmun khat dang chun kul kotkhar veng in ta, mipui chu LALPA Tempul inhuon sung tuolah an um ding a nih. 6 Rongbawla um thiempuhai le Levihai chauh naw chu tu khom LALPA Tempulah an lut ding a ni nawh. Anni chu lut le suok thei dinga ser thienghlim an ni a, mi dang ruok chun LALPAN an chana a pek hmun seng chu an veng ding a nih. 7 Levihai chu mani hriemhrei chawi sengin, inring sain lal bulah um an tih. Mi dang, Tempula hung lut taphot chu in that pei ding a nih. Lal lut le suok chu in zui pei bok ding a nih” tiin thu a pêk a.

8 Levihai le Judahai po po chun thiempu Jehoiada hril ang tak chun an thaw a, mani rawihai po, Sabat nia diuti ding pawl le awl ding pawl chu an thruoi a, thiempu Jehoiada kuomah an fe a, thiempu Jehoiada chun diuti zo tahai khom chu a’n trintir nawh. 9 Chun, kawmandarhai kuoma chun LALPA tempula um Davida feihai le phaw lien le phaw chinhai chu a pêk a. 10 Vengtu sipaihai chun hriemhrei chawi sengin, Tempul sim tieng panga inthoka hmar tieng chenin, maichàm le Tempul hrûla chun an ngir huol mup a.

11 Jehoiada le a nauhai chun lal naupa Joas chu an hung thruoi suok a, lallukhum an inkhumtir a, lalhaiin thuthlung le dan le thupek an kengkaw ding hai inziekna bu chu an pêk a, lalah an puong a, hriek an nàl a, “Lal chu dam sawt raw se” tiin an khèk a.

12 Vengtu sipaihai le mipuihaiin lal chawimawia an inzi mur mur ri Athalia-in a lo hriet chun LALPA Tempula mipuihai lai chun a va fe a. 13 A hang en a, an thaw hlak dan anga kotkhar ban hrûla ngir lal thar chu a hmu a, sipai kawmandarhai le tawtawrawt mûttuhai chu lal bula chun an ngìr a, chu rama mihai chu an hlim êm êm a, tawtawrawt an mût an mût a, hla saktuhai chun rimawi tinrêng tumin inpakna hla an sak a. Athalia chun a puon a pot thler a, “Phierrukna! Phierrukna!” tiin a khêk a.

14 Thiempu Jehoiada chun ama nu chu man dingin sipai za kawmandarhai chu thu a pêk a, “LALPA ina chu that lo ding” a lo ti tah leiin, an kuomah, “Sipaihai kara khan hung thruoi suok unla, a zuitu taphot chu that sa ro” a ta. 15 Lal in huonga sakor lutna kot a tlung chun an man a, chu taka chun an that a.

16 Mipuihai chu LALPA mihai an hung nina dingin Jehoiada chun LALPA le lal le mipuihai inkarah thuthlung a siem a. 17 A ram mipuihai po po chu Baal tempulah an fe a, an sukchim a, maichamhai le milimhai chu an vuok nawi vong a, Baal thiempu Matan chu maichàm hmaa chun an that a. 18 Mosie dan bua ziek anga hlim taka hla sak puma LALPA Tempula pumraw thilhlân inhlàntu dinga Davida thupèk anga Levi chia mi thiempu an lo hmang hlakhai thlahai ngei chu LALPA tempul enkaitu dingin Jehoiada chun a sie tawl nawk a. 19 Thiempu Jehoiada chun LALPA Tempulah mi porche tu khom an lut nawna dingin LALPA Tempul kotkhar vengtu dingin vengtu sipai a ruot bok a. 20 Chun, sipai kawmandarhai, khawnbawlhai, mipuihai chunga rorêltuhai le a ram mipuihai po po chu a thruoi a, LALPA Tempula inthokin lal chu an hung thruoi thlak a, vengtu sipaihai lutna kot chuonchunga chun lutin lal inah an fe a, lal chu a lalthrungphaah an inthrungtir a. 21 Chu rama mi po po chu an lawm a, Athalia chu lal inah kawlhnàma an that ta leiin khawpuia buoina chu a rè ta a.