4 Chuongchun, zawlnei tlangval chu Ramoth Gilead-a chun a fe a. 5 A tlung chun sipai ofisar ruol thrung khawm a hmu a. “Kawmandar, i kuomah thucha hril ding che ka nei” a ta. Jehu chun, “A tu tak hi’m ie?” a ta, ama chun “Nangma kuomah” a ta. 6 Jehu chu a tho a, pindana chun an lut a, zawlnei chun a lu-ah hriek a bur a, “LALPA, Israel Pathienin hieng hin a tih: LALPA mipui, Israelhai chunga lal dingin hriek ka nàl che. 7 Ka siehlaw zawlneihai thisen le LALPA siehlawhai po po thisen phuba chu Jezebel laka ka lak theina dingin i pu Ahab sunghai chu i sukbohmang vong ding a nih. 8 Ahab sungkuo chu an ram ngei ding a nih. Israel rama mi Ahab thla pasal taphot chu, bawi le bawi naw khom, ka sukbohmang vong ding a nih. 9 Ahab sungkuohai chu Nebat naupa Jeroboam sungkuohai le Ahija naupa Baasa sungkuohai ang bokin siem ka tih. 10 Chun, Jezebel ruong chu Jezreel khaw kul bulah uiin fa’ng an ta, phûmtu ding hrim um naw ni hai’ tiin” a ta. Chuongchun, kot a hong a, a tlan suok ta nghal a.

11 A ruolhai kuoma Jehu a hung nawk chun an ni laia pakhat chun, “Iengkim a thra de maw? Ieng leia kha mi invêtpa kha i kuomah a hung tlat am a na?” a ta. Jehu chun, “Ama kha in hriet mi a na, a thu hril ding awm in hriet tho annawm” a ta. 12 Anni chun, “Hre teu hlak kan tim ie! Mi hang hril ta” an ta. Jehu chun, “Hi hi a thu mi hril chu a nih: ‘LALPAN hieng hin a tih: Israelhai chunga lalah hriek ka nàl che’ tiin” a ta. 13 Chuongchun, inrang takin an silpuonhai an hlip a, kailawn chunga chun an pha a, tawtawrawt an mût a, “Jehu lal a ni tah” tiin an khèk a.

14 Nimsi tupa, Jehosafat naupa Jehu chun Joram chu a phier tran ta a (Chu chu Joram le Israel mi po poin Aram lal Hazael laka Gilead biela Ramot khuo an veng lai a nih. 15 Lal Joram ruok chu Aram lal Hazael le an indonaah Aram mihaiin an inhliem a, insukdam dinga Jezreel khawa a kir nawk hun lai a nih). Jehu chun a ruolhai kuomah, “Keima tienga thrang in ni chun, hi thu hi Jezreel khawa an zu hril hman nawna dingin mi tu khom Ramot khuo insuoktir hrim hrim naw ro” a ta. 16 Chuongchun Jehu chu tawlailirah a chuong a, Jezreel tieng a pan a. Chu taka chun Joram chu nat khuma zâl a na, Juda lal Ahazia khom ama en dingin a zu fe a.

17 Jezreel kula ralvengtuin Jehu le a sipaihai hung thlak lai a hmu chun, “Sipai tuhai amanih hung thla ka hmuh” a ta. Joram chun, “Sakor chungchuong mi ko la, anni hmuok dingin tir la, ‘A thra tieng thu am a ni?’ tiin va’n don raw se” a ta. 18 Chuongchun, sakor chungchuong pakhat chu anni hmuok dingin a fe a, “Lalin, ‘A thra tieng thila hung am in ni?’ ti indon dingin a mi tir a nih” a ta. Jehu chun, “Chu chu nanga hriet ding ieng am a um a? Ka hnunga hin mi zui rawh” a ta. Râlvêngtu chun, “Ka mi tir chu a va tlung ngei a, sienkhom a hung kìr nawk chuong ta nawh. 19 Mi dang an tir nawk a, ama chun Jehu chu thu pangngai bok a’n don nawk a. Jehu chun, “Chu chu nanga hriet ding ieng am a um a? Ka hnunga hin mi hung zui rawh” a ti nawk a. 20 Ralvengtu chun, “Ka mi tir chu a va tlung ve ngei a, sienkhom a hung kìr chuong bik nawh. An thruoitu tawlailir khal dan saw Nimsi naupa Jehu khal dan a hoi khop el, mi invêt ang elin a khal hlak a nih” a ta.

21 Joram chun, “Ka tawlailir hung buotsai ro” tiin thu a pêk a, an hung buotsai zo chun anni tawlailir vé vè-ah Israel lal Joram le Juda lal Ahazia chu Jehu hmuok dingin an suok a, Jezreel mi Nabot huonah an intuok a. 22 Joramin Jehu a hmu chun, “A thra tieng thil am a ni, Jehu?” a ta. Ama chun, “I nu Jezebelin milim biek le dawi a chìng nasat sung hin thrat tieng thil iengtin am a um thei ding a na?” a ta. 23 Joram chun a tawlailir chu a kei her a, a tlân a, Ahazia kuomah, “Inhlĕmna a nih, Ahazia” a ta.

24 Chu phing leh Jehu chun a thalngul a kuoi a, Joram dar inchuktuonaah a kâp a, thal chun a lungah a thil tlang a, tawlailira chun a op ta ruop el a. 25 Jehu chun tawlailir tienga inrawitu Bidkar kuomah, “Va hnuk thla la, Jezreel mi Nabot huona ngei khan pei hawn rawh. Kha hmaa nang le kei, a pa Ahab tawlailir hnunga ei fe trum khan LALPAN hi thu hi a lo hril lawk tah a nih ti i hriet zing ka ring. 26 LALPAN, ‘Zani khan Nabot le a naupahai thisen suok ka hmu ngei annawm’ a ti kha. Chun, LALPA bokin, ‘Hi hmuna ngei hin ka thungrul ding che a nih’ a ti bok kha. Chuongchun, LALPA thu ang chun a ruong saw va la la, hi hmuna ngei hin dehawn rawh” a ta.

27 Juda lal Ahazia-in chuong thilhai a hmu chun Bet Hagan tieng a tlân tung a. Jehu chun a hnot a, “Ama khom kha that nghal ro” tiin a khêk a. Ibleam kawl, Gur panna tungah a tawlailira chuong chu an inhliem a, sienkhom Megido tieng a tlan hmang a, chu taka chun a thi a. 28 A siehlawhai chun tawlailirin Jerusalem tieng an phur tung a, Davida khawpuia a thlàna chun a thlatuhai lai an phûm a. 29 Ahazia chu Ahab naupa Joram inlala inthoka kum sawm le kum khatnaah Judahai chunga hung inlal tran a nih.

30 Chu zoah Jehu chu Jezreel-ah a fe a. A hung ti Jezebelin a lo hriet chun a mithai a lo nàl a, a sam dam a lo chei a, tukverah a dâk a. 31 Kul kotkhara Jehu a lut lai chun, “Mani puhai thattu Zimri, a thra tieng thu am a ni?” a lo ta. 32 Anni umna tukver tieng chu a hang en a, “Tu am ka tienga thrang? Tu am?” a ta. Mi tilre pahni pathum vel an hung dàk suok a. 33 Ama chun, “Khâ nu kha hung thè thla ro” a ta, an hung thè thlak a, a thisen inkhieng chun bang le sakorhai chu a per khum nuoi a, ama chu an lo chǐl a.

34 Jehu chu a lût a, fain a dawn a. “Trongsephurnu kha lo va ngaiven unla, lal naunu a ni si a, va phûm ro” a ta. 35 Phûm dinga an va fe chun a luru dam, a ke bawr dam le kutpha bawr dam chauh naw chu hmu ding a um ta naw a. 36 An hung kìr a, Jehu an va hril a, ama chun, “Hi hi LALPAN a siehlaw Tisbe mi Elija hmanga, ‘Jezreel hmuna ngei hin uihaiin Jezebel ruong chu la fa’ng an tih. 37 Jezreel hmuna ngei hin Jezebel taksa chu êk trawng angin, ‘Hi hi Jezebel a nih’ ti tu khom hriet thei lo dingin la’n dar a tih’ ti thu a hril kha a ni hi” a ta.