Athalia-in lalna a’n chu
11
1 Ahazia nu Athalia-in a naupa thi thu a lo hriet chun, lal naupahai po po chu that vong dingin thu a pêk a. 2 Ahazia naupa Joas ruok chu Israel lal Jehoram naunu Jehoseba, Ahazia farnu chun that dinga ruot lal nauhai laia inthok chun a lak suok a, Athalia hmu lo dingin khum pindanah a enkoltu leh a thup a, that a ni ta naw a. 3 Athalia-in ram rorelna a chel sung, kum ruk chu LALPA tempul sungah a enkoltu leh an inbi hmang a.4 A kum sarinaa chun tempula thiempu Jehoiada chun lal vengtu Keret mihai le sipai zakhat pawl pei inrawitu kawmandarhai chu a’n kotir a, LALPA tempul sungah a kuomah a hung inthruoi luttir a. Anni chu thu thlungpuiin, LALPA tempula chun inkhàm meuin thu an tiemtir a. Chu zoah lal naupa chu a’n hmutir tawl a. 5 Ama chun an kuomah, “Sabat nia diutia in hung pha leh hmun thuma threa hmun khatin lal in vêng in ta; 6 hmun thuma threa hmun khatin kula Sur Kotkhar vêng in ta; hmun thuma threa hmun khat dang chu kul kotkhar vêngtuhai hnungah in diuti ding a nih. 7 Pawl hni dang, Sabat nia diuti ve lo poin lal ta dingin LALPA tempul hi in vèng ding a nih. 8 Mi tinin hriemhrei chawiin lal chu sir tinah vêng in ta, tu khom in vèng himna huol sunga hung lut hrim hrim chu that pei ro. Lal lut le suok chu in zui pei ding a nih” tiin thu a pêk a.
9 Sipai za pawl peia kawmandarhai chun thiempu Jehoiada hril ang tak chun an thaw a, mani rawihai po, Sabat nia diuti ding pawl le awl ding pawl chu an thruoi a, thiempu Jehoiada kuomah an fe a. 10 Kawmandarhai kuoma chun LALPA tempula um Davida feihai le phawhai chu Jehoiada chun a pêk a. 11 Vêngtu sipaihai chun hriemhrei chawi sengin, tempul sim tieng panga inthoka hmar tieng chenin, maicham le tempul hrûla chun lal chu an ngir huol mup a. 12 Jehoiada chun lal naupa chu a hung thruoi suok a, lallukhum a’n khumtir a, lalhaiin thuthlung le dan le thupêk an kengkaw ding hai inziekna bu chu a pêk a, lalah a puong a, hriek a nàl a, mipuihai chun kut ben dur durin, “Lal chu dam sawt raw se” tiin an khèk a.
13 Vêngtu sipaihai le mipuihai ri Athalia-in a lo hriet chun LALPA tempula mipuihai lai chun a va fe a. 14 A hang en a, lal Joas chu dàn angin ban hrûlah a lo ngir a, sipai kawmandarhai le tawtawrawt mûttuhai chu lal bula chun an ngìr a, chu rama mihai chu an hlim êm êm a, tawtawrawt an mût an mût a. Athalia chun a puonhai a pot thler a, “Phierrûkna! Phierrûkna!” tiin a khêk a. 15 Thiempu Jehoiada chun ama chu man dingin kawmandarhai chu thu a pêk a, “LALPA ina chu that lo ding” a lo ti ta leiin, an kuomah, “Sipaihai kara khan hung thruoi suok unla, a zuitu taphot chu that ro” a ta. 16 Lal in huonga sakor lutna kot a tlung chun an man a, chu taka chun an that a.
Jehoiada’n thuthlung a siem thar
17 Mipuihai chu LALPA mihai hung ni dingin Jehoiada chun lal Joas le mipuihai chu LALPA hmaah thu a’n tiemtir a, lal le mipuihai inkarah thuthlung a siem bok a. 18 Chu rama mipuihai chu Baal tempulah an fe a, an sukchim a, maichàmhai le milimhai chu an vuok nawi vong a, Baal thiempu Matan chu maicham hmaa chun an that a. Thiempu Jehoiada chun LALPA tempul vêngtu dingin vêngtu sipai a sie a.
19 Lal vengtu Kerit mi sipai za ruol hotuhai, lal in vengtu sipai hotuhai le chun lal chu LALPA Tempula inthokin thiempu Jehoiada chun a thruoi thlak a, mipuiin an zui a, vengtu sipaihai lutna kota chun lutin lal inah an fe a, lal chu lalthrungphaah an inthrungtir a. 20 Chuongchun, chu rama mi po po chu an lawm a, Athalia chu lal inah kawlhnâma an that tak leiin khawpuia chun buoina a rè ta a. 21 Ro a hung rèl tran chun Joas chu kum sari mi a nih.