Tempul inhlànna
7
1 Solomon trongtrai zo chun vana inthokin mei a hung tla a, pumraw thilhlân le thilhlân dang po po chu a kàng hmang ta vong a, LALPA ropuinain Tempul chu a hung hluo sip a. 2 LALPA ropuinain LALPA Tempul a hluo sip lei chun thiempuhai chu an lût thei naw a. 3 Israel thlahai po poin vana inthoka mei hung tla le Tempul chunga LALPA ropuina inzâm an hmu chun Tempul tuolzawl lungrema chun bawka hnuoi sikin an bokkhup a,“Ama chu a thra si a,
A ngilneinan kumtluong a dai”
tiin lawmthu an hril a, LALPA chu an chawibiek a.
4 Lal le mipuihai chun LALPA hmaah hlànbiek an inhlàn a. 5 Lal Solomon chun bawngchal singhni le sanghni le beram le kel nuoikhat le singhni a’n hlàn a. Chuong anga lal le mipuihai chun thawin Pathien Tempul chu an hong a nih. 6 Thiempuhai chu an hmun sengah an ngìr a, Levi-hai khom, “A hmangainan kumtluong a dai” tia LALPA an chawibiek changa an tum hlak dinga Davidan LALPA rimawi hmangruo a’n siemtirhai chu chawiin an ngìr a. Levihai epa chun thiempuhaiin tawtawrawt an mùt a, Israel mipui po po chu an ngîr thrup a.
7 Dâr maichàm a siem chun pumraw thilhlân dam, bu le bâl thilhlân dam le sathau an inhlànhai chu a keng naw leiin Solomon chun LALPA tempul kota tuolzawl inhuon sung khom chu a’n hlàn thienghlim a, chu taka chun pumraw thilhlân le inremna thilhlâna a thauhai chu an raw a.
8 Chu trum chun Solomon le Israel mi po po, Hamath Kawna inthoka Aigupta Varuom chena mi pungkhawmhai chun ni sari sung kût an hmang a. 9 A ni riet ni chun inkhawmpui ropui an hmang a, chuong ang chun ni sari sung tempul inhlàn lawmna an hmang bakah ni sari dang kûta an hmang bok a. 10 Thla sarina ni sawmhni le ni thum ni chun mipui chu a’n trìntir a, LALPAN Davida le Solomon le a mi Israelhai chunga a thratna a’n langtir lei chun hlim tak le lawm takin mihai chu an in tieng an kìr nawk ta a.
Solomon kuomah Pathien an lang nawk
11 Solomonin LALPA tempul le ama in chu a nuom ang taka bawl zo a, LALPA tempula ding le ama ina dinga thaw ding, lungrila a lo phan po po a hlen suok zo chun, 12 zanah Solomon kuomah LALPA a hung inlàr a, a kuomah “I trongtraina ka lo hriet a, hi hmun hi ka kuoma hlànbiek in hung inhlànna ding Tempulah ka ruot tah. 13 Vanhai ka khâr leia hnuoiah ruo hrim a sûr naw chàng amanih, khau hon ka hung tir leia a ram an fàk ram chàng amanih, ka mihai laia hripui ka hung inlengtir chàng amania, 14 ka hming puttu ka mihaiin inpha hnuoia ka kuomah an hung trongtrai a, an mi zong a, an um dàn suolhai an nghatsan chun, vana inthokin lo ngaithlang ka ta, an suolhai ngaidam ka ta, an ram chu thawi dam nawk ka tih. 15 Hi hmuna trongtraia in hung hnina laka chun ka mit inlĕn ka ta, ka na sit bok ka tih. 16 Kumkhuoa ka hming umna dingin hi Tempul hi ka ruot a, ka sukthienglim ta a, chutaka chun ka mit le ka lungril fu zing hlak a tih.
17 “Nang khom i pa lungril ang put a, ringum tak le ngîl taka ka hmaah i khawsa ve a, ka thupêkhai po po zui a, ka thusuokhai le dànhai po po i zawm ve chun, 18 i pa Davida kuoma. ‘Israelhai lalthrungpha hluotu ding chu mi invâi naw ti nih’ ti a ka lo tiem tah angin, Israelhai chungah i lalthrungpha chu kumkhuoin suknghet ka tih.
19 “Amiruokchu, nangnin mi nghatsan a, ka thupêkhai le thusuokhai zawm lo a, pathien dang rong bawla in biek chun, 20 ka pek tah hi rama inthok hin Israelhai chu phawi hmang ka ta, ka hminga dinga ka sukthienghlim tah hi Tempul hi hnawl bok ka ta, hnam tin nuizatbûr le hmusit hung ni’ng a tih. 21 Tu hin hi Tempul hi ropui hlein inlang sien khom, a fe pèl taphotin pangzatin, “Iengti lawm lawma hienga LALPA an Pathienin a thaw el am a na?” la ti’ng an tih. 22 Mihai chun, ‘Aigupta rama inthoka an pi le puhai thruoi suoktu LALPA an Pathien chu an nghatsan a, pathien dang an chel a, an biek a, an rong an bawl leiin hieng sietna po po hi an chungah LALPAN a hung intlungtir a nih’ tiin la don an tih” a ta.