Solomon thilthawhai
8
1 LALPA Tempul le ama in ding kum sawmhni sunga Solomonin a bawl zo hnung chun, 2 Hiramin khuo a pekhai chu a bawl thra a, chuong khuoa hai chun Israelhai chu hmun a’n khuortir a. 3 Chu zoah Solomon chun Hamath Zoba a bei a, a lâk a. 4 Thlalera khuo Tadmor chu a bawl thra a, Hamath biela hmangruo siekhawmna khuo po po khom a’n din thra bok a. 5 Beth Heron chuonchung le Beth Heron chuonhnuoia khuohai chu a bawl thra a, kul bang nei, kotkhar le a kalna nei vongin a siem a. 6 Chuong ang bokin Baalat khuo le Jerusalem le Lebanon le a’n lalna ram sung po poa hmangruo sie khawmna le tawlailir le sakor sie khawmna khawpui po po hai chu a’n din thar vong bok a.7 Israel mi ni lo hnam danghai, Israelhaiin sukbohmang loa an hlà Hit hai, Amor hai, Periz hai, Hiv hai le Jebu hai thlahai chu Solomonin suoka neiin sinthawah a sor lui a, 8 tu chen hin chuong ang chun an la um a. 9 Israel thlahai ruok chu Solomonin siehlaw anga sor ve loin, sipaia dam, sipai hotua dam, tawlailir le sakor chungchuong mihai hotua dam a sie lem a. 10 Chuonghai chu mipuihai inrawitu, Solomon thoktu luhai an na, an rêngin zahni le sawmnga an nih.
11 Solomon chun “Ka nuhmei chu Israel lal Davida inah a um ding a ni nawh, LALPA Bawm lutna hmun taphot chu hmun thienghlim a ni si a” a ta, Faraw naunu chu Davida Khawpuia inthokin ama puola a chengna dinga a bawlpek ina chun a thruoi tung a.
12 Solomon chun tempul hulhliep hmaa LALPA maichàm a siema chun hlanbiek a thaw hlak a. 13 Mosie thupek anga ni ser bik Sabat hai, thla thar lawmna nia hai, kût bi nei huna hai, kum khata kût pathum- chol thrang lo bei kûta dam, chawlkar kûta dam le bawkte kûta dam pumraw thilhlân inhlàn dinga bitukhai chu a’n hlàn a. 14 A pa Davida lo ruot tah angin thiempu pawl le Levi pawlhai chu an chanpuol seng ni tina thaw trûl ang peia thaw ding, hlaa inpâkna thruoitu pawl dam le ni tina an mamaw ang peia thiempuhai thrangpuitu ding dam a ruot a. Kotkhar hrang hrang vengtu ding a pawl pawlin a ruot bok a. Chuong anga an thaw ding seng chu Pathien mi Davidan a lo ruot sa diem a nih. 15 Lal Davidan thiempuhai le Levi-hai thaw ding le rosum siena an enkol dan dinga thu a pek iengkim chu a pek ang thlapin an thaw vong a.
16 Solomonin bawl dan dinga a riruong ang thlapin LALPA Tempul chu a thrut an rema inthoka an zo fel chenin an bawl a, chuongchun LALPA Tempul chu zo fel a lo ni ta a.
17 Chu zoah Solomon chu Edom rama tuifinriet suo, Ezion Geber le Elath a chun a fe a. 18 Chu taka chun Hiramin a longpuhai, tuinfinrieta che thrang mihai chu long leh a tir a, Solomon siehlawhai leh Ofir-ah an fe a, chu taka mi chu rangkachak kilogram singkhat le sangruka laia tam an va phur a, lal Solomon kuomah an inhlàn a.