Solomon kuomah LALPA a’n lang nawk
9
1 Solomonin LALPA tempul le ama in a dit dàn ang taka a bawl zo hnung chun, 2 kha hmaa Gibeon-a LALPA a hung inlàr ang khan Solomon kuomah a hung inlàr nawk a. 3 LALPA chun a kuomah, “Ka kuoma trongtraia i hung hni kha ka lo ngaithlak a, hi i Tempul bawl hi kumkhuoa ka hming umna dingin ka sukthienghlim ta a, chu taka chun ka mit le ka lungril fu zing hlak a tih.4 “Nang khom i pa Davida anga lungril ringum tak le ngîl tak puta ka hmaah i khawsa ve a, ka thupêkhai po po zui a, ka thusuokhai le danhai po po i zawm chun, 5 i pa Davida kuoma, ‘Israelhai lalthrungpha hluotu ding mi invâi ngai naw ti nih’ tia ka lo tiem tah angin, Israelhai chungah i lalthrungpha chu kumkhuoin suknghet ka tih.
6 “Amiruokchu, nang le i nauhaiin in mi nghatsan a, ka thupekhai le thusuokhai zawm lo a, pathien dang rong bawla in biek chun, 7 ka pèk tah hi rama inthok hin Israelhai chu sukbo ka ta, ka hminga dinga ka sukthienghlim tah hi Tempul hi hnawl bok ka tih. Chu pha chun Israelhai chu hnam tin laia mi nuizatbûr le hmusit hung ning an tih. 8 Tu hin hi Tempul hi ropui hlein inlang sien khom, a fe pèl taphotin maktia deusawin, ‘Iengti lawm lawma LALPA an Pathienin hienga a ram le Tempul hi a thaw el am ning a ta?’ la ting an tih. 9 Mihai chun, ‘Aigupta rama inthoka an pi le puhai thruoi suoktu LALPA an Pathien chu an nghatsan a, pathien dang an chel a, an biek a, an rong an bawl leiin hieng sietna po po hi an chungah LALPAN a hung intlungtir a nih’ tiin la don an tih” a ta.
Solomon le Hiram inremna
10 Solomonin kum sawmhni sunga LALPA Tempul le lal in a bawl zo hnung chun, 11 (chu sunga sidar thing, fâr thing le rangkachak a mamaw zat po po chu Tura lal Hiramin a tumpêk vong leiin Solomon chun Galili biela khaw sawmhni a pêk a), 12 Solomonin khuo a pekhai chu en dingin Hiram chu Turaa inthokin a’n thok suok a, a hmu chun a lung a awi naw hle a. 13 Hiram chun Solomon kuomah, “Ka unaupa, khuo i mi pekhai hi ieng khuo khuo am an ta le?” a ta, a khuohai chu ‘Kabula ram’ tiin a’n bùk a, chu hming chu tu chen hin a la put zing a nih. 14 Hiram chun lal Solomon chu rangkachak kilogram sangli dang a thon nawk a.
Solomon thilthaw danghai
15 Solomonin sinthawa a sor luihai chu LALPA Tempul le ama lal in le a in thruthai bawltu ding dam, Jerusalem kul dam, Hazor khuo dam, Megido khuo dam le Gezer khuo dam bawl thra dinga a sor an nih. 16 (Gezer khuo chu Aigupta lal Faraw-in a hmain a rùn a, a lâk a, a raw a, Kanan mi chênghai po po a that vong a, chu zoah a naunu, Solomon nuhmei a’n somtir a nih) 17 Solomon chun Gezer khuo chu a'n din thar nawk a. Beth Horon thlang hnung lem dam, 18 Baalat khuo le Israel ram thlalera Tamar Khuo dam, 19 thil a siekhawmna khuohai, tawlailir le sakor a siena khuohai, Jerusalem le Lebanon le a op ram sunga bawl ding a ti po po chu a bawl bok a
20 Hieng Israel mi ni ve lo, Amor mihai, Hit mihai, Periz mihai, Hiv mihai le Jebu mi la um sunhai le 21 chuong mihai thlahai chu Israel mihaiin an sukchimit vong naw a, Solomonin a sor lui tawl a, tu chen hin chuong ang chun suokah an um ta pei a nih. 22 Israel mihai ruok chu Solomonin suokah a siem ve naw a, sipaia dam, sorkar thoktua dam, ofisar-a dam, kaptena dam, a sakor tawlailir le sakor chung chuong mi kawmandara dam a hmang thung a. 23 Chuonghai chu Solomon-in in a bawlnaa kulihai chunga hotu bik le sinthawhai vengtu mi zanga le sawmnga a ruoihai chu an nih.
24 Davida khawpuia inthoka Solomonin a bawlpek ina Faraw naunu a hung inson hnung chun a inthruthai khom chu a siem thra a.
25 Solomon chun kum tinin LALPA ta dinga maicham a siema chun pumraw thilhlân le inremna thilhlânhai chu voi thum inhlànin, LALPA hmaa chun rimtui rawin hlànbiek a thaw zie a, Tempul danin a phuthai chu a hraw kim hlak.
26 Lal Solomon chun Edom rama Tuipui Sen kam, Elath bula um Ezion Geber a chun long a’n siemtir a. 27 Hiram chun a longpu ruol, tuinfinrieta che thranghai chu longa Solomon siehlawhai chu fepui dingin a tir a. 28 Chuonghai chu Ofir-ah an fe a, rangkachak kilogram singkhat le sangli chuong an hung hawn a, Solomon kuomah an inhlàn a.