Solomon thu hril
6
1 Solomon chun, “Aw LALPA, ‘Sûm sà mupah chêng ka tih’ i ti a. 2 Tu hin kumkhawa i chengna ding, i ta dingin tempul mawi tak ka bawlpek ta che ie” a ta. 3 Chun, a ngha kîr a, a hmaa ngîr Israel mi pungkhawmhai po po chu mal a sawm a: 4 “LALPA, Israelhai Pathienin ama bâu ngeia ka pa Davida kuoma thu a lo tiem tah chu ama kut ngeia a hung hlen suok tah leiin inpâkin um raw se. 5 Ama chun, ‘Aigupta rama inthoka ka mihai ka thruoi suok nia inthok khan Israel hnamhai laia a ieng khuo khom hi ka hming umna ding Tempul bawlna dingin ka la thlang ngai naw a; ka mi Israelhai chunga lukhaitu ding tu khom ka la thlang ngai bok nawh. 6 Amiruokchu, ka hming umna dingin Jerusalem hi ka lo thlang ta a, ka mi Israelhai chunga rorêltu dingin Davida hi ka lo thlang ta bok a nih’ tiin a lo hril a.7 “Ka pa Davida chun LALPA Israelhai Pathien hminga ding Tempul bawl a lungril hlak a. 8 Amiruokchu LALPAN a kuomah, ‘Ka hminga ding Tempul bawl nuomna lungril i nei hi i thaw thra ngot el. 9 Sienkhom, nang chu ka Tempul bawltu ding i ni nawh, i naupa, i thràlbea inthoka suok ngei chu ka hminga ding Tempul bawltu ding chu a nih’ tiin a lo hril a. 10 LALPAN a thutiem chu a hung suknghet a, a tiem tah ang ngeiin kei chun ka pa Davida ka hung thlàk a, tu hin Israelhai lalthrungphaah ka hung inthrung ta a, LALPA Pathien, Israelhai Pathien hminga ding Tempul chu ka lo bawl ta ngei bok a. 11 Chu taka chun Israel thlahai kuoma a lo thlung, LALPA Thuthlungna Bawm chu ka sie tah a nih” a ta.
Solomon trongtraina
12 Israel mi pungkhawmhai chu hma sonin LALPA maicham hmaa chun Solomon chu a ngîr a, kut a phar a. 13 Dâr dawkan, a dung meter hni le centimeter hnia sei le a khang meter hni le centimeter hnia lien, a’n sangzie meter khat le centimeter thuma siem, Tempul tuolzawl laili takah a’n thrut chunga chun a lawn kai a, Israel thla pungkhawm po po hmaa chun a dingthrathruon a, van tieng nghain bân a phar a. 14 Hieng hin a trongtrai a: “Aw LALPA, Israelhai Pathien, lungril po poa i lampui hrawtu i siehlawhai kuoma i hmangaina thuthlung vong tlattu, nangma ang hi chung tieng vana le hnuoi tieng leihnuoiah Pathien dang hrim an um nawh. 15 Ka pa, i siehlaw Davida kuoma bau ngêia thu i tiem chu nangma kut ngèiin i hung hlen a, chu chu voisuna kan hmu hi a nih.
16 “Tu hin aw LALPA, Israelhai Pathien, ka pa Davida kuoma, ‘Ka mithmua i um dan anga i thlahai khom ka mithmua fimkhur taka ka dàn an zawm ve phot chun, Israel lalthrungpha hluotu ding mi chu invâi ngâi naw ti nih’ tia thu i lo tiem kha vong ngei dingin ka ngèn che. 17 Aw Israelhai Pathien, ka pa Davida kuoma thu i tiem kha hung intlungtir ngèi rawh.
18 “Amiruokchu, LALPA chu hnuoiah mihriemhai lai a chêng tak tak ding am a ni? Vanhai, van insang tak chen khomin an dawl zo naw che a na, hi ka Tempul bawla lem hin chu i va hang inleng naw nasa zuol awm de aw! 19 Chuong sà khom chun aw LALPA Pathien, zangaina hnia i siehlaw trongtraina hi lo ngaisak la, voisuna i hmâ ngêia trongtraia i siehlaw hung kona chè hi lo ngaithlapêk hràm rawh. 20 ‘Chu taka chun ka hming chu um a tih’ i lo tìna hmun tieng hi ngha a, i siehlaw hung trongtraina chu i lo ngaithlak theina dingin, hi Tempula hin sùn le zanin mit inlèn zing hlak rawh. 21 Hi hmun tieng hi nghaa i siehlaw le i mi Israelhai kan hung trongtrai phâ chun mi lo ngaithlapêk hràm rawh. A nih, i chèngna vana inthok chun lo ngaithla la, i hriet pha leh lo ngaidam hlak rawh.
22 “Mi tu khomin a tuolbawm poi a tawk a, hi tempula i maichàm hmaa a thiem thu inkhâm meua a hung intlun pha chun, 23 vàna inthokin lo ngaithla la, che nghal la, i siehlawhai chungah ro hung rêl la, a thiem naw lem lu chunga chun a thil suol thawna maw chu intlâktir la, poi tawk nawtu chu thiem inchangtir la, a thiemzie chu namnghet rawh.
24 “Nangma lakah an suol leia hmêlmahaiin i mi Israelhai an hnè chàngin, nangma tieng hung ngha kìr a, i hming lam a, hi tempula hin ngaidam an hung inhni pha chun, 25 vana inthokin lo ngaithla la, i mi Israelhai suolna chu ngaidampèk la, an pi le puhai kuoma ram i pèka chun thruoi kîr nawk rawh.
26 “I mihaiin i lakah thil suol an thaw leia vanin ruo hrim a’n surtir ta naw chângin, hi hmun tieng hi nghaa hung trongtrai a, i hming lam a, i hrem leia an suolhai an sim pha chun, 27 vana inthokin lo ngaithla la, i siehlaw, i mi Israelhai suolna chu lo ngaidam la, an khawsak dan ding lampui indik kawkhmu la, i mihai rochana i pek rama hin ruo hung insurtir rawh.
28 “A ramah tràm tla a, hripui dam, inlawngna dam le hmonna hri dam inlêng a, khauthrikthri le tuktulung dam intâm a, hmêlmahan an khuohai inhuol a, sietna le hri le hrai ieng khoma a tlàk buok chângin, 29 i Tempul tieng kut hung phar a, hrem an tuor dân chit chu mani lungril sengah pâi a, i mi Israelhai laia mi tu khomin i kuomah trongtraia hnìna an hung intlun châng chun, 30 i chèngna vana inthokin lo ngaithla la, ngaidam la, che la, an ngaituona seng i hriet leiin an nina ang peiin thaw rawh, nangma chauh hi mihriem po po lungril hretu i ni si a. 31 Chuongchun, kan pi le puhai kuoma ram i peka hin an um sung chun ieng lai khomin nangma tri nachâng hung nei pha ta’ng an tih.
32 “Ram dang mi, i mi Israelhai ni ve lo, sienkhom i hming leia ram hla taka inthoka hung pantu che khom, (i hming ropui tak le kut hrat tak phara i thawpekzie hi mihaiin an la hung hriet pei ding a ni si leiin) Tempul tieng nghaa an hung trongtrai pha chun, 33 i chengna vana inthokin lo ngaithla la, ram dang mi thil hnî chu lo thawpèk la, chuongchun i mi Israelhai ang boka khawvela hnam tinin i hming hung hrein, triin, hi ka Tempul bawl hin i hming a put ngèizie hung hre thei an tih.
34 “I mihaiin hmêlmahai an bei pha, i tirna hmun chu khaw tieng khom ni sien, i khawpui thlang le i hminga ding Tempul ka bawlna hmun tieng hi ngha a, LALPA kuoma an hung trongtrai chun, 35 i chengna vana inthokin an trongtraina le hnìna chu lo ngaithlapek la, an hnìna chu lo pompèk rawh.
36 “I lakah thil suol an thaw a, (tu khom suol lo an um bok si naw a), an chungah i lung a sen a, hmêlma kutah i pêk a, an ram tieng, hnâi tè amanih hla tak amaniah sala an thruoi pha, 37 sala an thruoina hmunah inngaituo suok a, insîr a, an intàngna rama inthokin hung ngèn a, ‘Thil suol kan lo thaw a, poi kan lo tawk a, rilo takin kan lo khawsa a nih’ an ti pha, 38 an hmèlmahai, sala thruoituhai rama inthoka lungril le thlaraua nangma tieng hung ngha kîr a, an pi le puhai i pèk ram tieng, i khawpui thlang le i hming umna dinga ka bawl Tempul tieng hi nghaa an hung trongtrai pha chun, 39 i chengna vana inthokin an trongtraina le hnìna chu lo ngaithlapèk la, an hnìna chu lo pompèk la, i laka i mipuihai thil suol thaw chu lo ngaidam rawh.
40 “I siehlaw hnîna le i mi Israelhai hnìna lakah i mit insîm ngai naw la, hi hmuna inthoka an hung ko pha che chun lo ngaithlapêk hràm rawh.
41 Tuhin hung tho la LALPA Pathien,
I thilthawtheina Thuthlung Bawm leh,
I Tempula hin hung cheng ta rawh.
I thiempuhai chu LALPA Pathien,
Sandamnain inthuom tawl la,
An chunga i thratna leiin,
I mi thienghlimhai chu hlim raw se.
42 I hriek nàl hi LALPA Pathien,
Hnawl hmang ngai hrim hrim naw la,
I siehlaw Davida kuoma
I tiem hmangaina ropui kha,
Theinghil ngai hrim hrim naw rawh”
a ta.