3 Israel upahai an hung tlung chun thiempuhai chun Bawm chu an zawn a. 4 LALPA Bawm ruol chun Intuokna Puon in le a hmangruo le bûr le bêl po po chu thiempuhai le Levi chia mihai chun an zawn sa bok a. 5 Lal Solomon le a kuoma Israel mi pungkhawm po po chu Bawm hmaa chun an fe a, beram le bawng tamtak, a zât inchik seng lo le tiem seng lo chun an hlànbiek a.

6 Thiempuhai chun LALPA Thuthlung Bawm chu a umna ding, Tempul sungril, Hmun Thienghlim Taka chun an lak lut a, cherub thla zàr hnuoia chun an sie a. 7 Cherubhai chun bawm chungah thla an zàr a, an thla chun bawm le a zawnfung chen chu a hlie khum a. 8 A zawnfung chu sei tak a na, Hmun Thienghlim Tak kotkhar hma zawna inthokin hmu thei a na, puo tienga inthok ruok chun a’n lang phak nawh; chuong ang chun tu chen hin a la um zing. 9 Aigupta rama inthoka an suok hnunga LALPAN Horeb tlanga Israel thlahai kuoma thu a thlung laia Mosien lungphek pahni a sie chauh naw chu Bawm sunga chun ieng dang khom a um nawh. 10 Chun, thiempuhaiin Hmun Thienghlim Tak an suoksan charin sûmin a hung inkhum ta mup a. 11 Sûm lei chun thiempuhaiin rong khom an bawl thei ta naw hiel a, LALPA ropuinain a tempul chu a sip si a.

12 Solomon chun, “LALPA chun sûm sà mupah hung cheng ka tih i lo ti ta hrim a. 13 A nih, kumkhuoa i chengna ding, i ta dingin tempul mawi tak el ka bawlpek ta che ie” a ta. 14 Chun, a ngha kîr a, a hmaa ngir Israel mi pungkhawmhai po po chu mal a sawm a: 15 “LALPA, Israelhai Pathienin bau ngeia ka pa Davida kuoma thu a lo tiem tah chu ama kut ngeia a hung hlen suok tah leiin inpâkin um raw se. 16 Ama chu, ‘Aiguptaa inthoka ka mi Israelhai ka thruoi suoka inthok khan Israel hnamhai khuo laia a ieng khom hi ka hming umna ding tempul bawlna dingin ka la thlang ngai naw a, amiruokchu ka mi Israelhai chunga roreltu dingin Davida hi ka thlang a” titu a nih. 17 Ka pa Davida khan Israel Pathien, LALPA hminga ding Tempul bawl chu a tum lungril zing a. 18 Sienkhom ka pa kuomah LALPAN, ‘Ka hminga ding Tempul bawl nuomna lungril i nei hi i thaw thra ngot el. 19 Amiruokchu, nang chu ka Tempul bawltu ding i ni nawh, i naupa, i thràlbea inthoka suok ngei chu ka hminga ding Tempul bawltu ding chu a nih’ tiin a lo hril a. 20 LALPAN a thutiem chu a hung suknghet a, a tiem tah ang ngeiin kei chun ka pa Davida chu ka hung thlàk a, tu hin Israelhai lalthrungphaah ka hung inthrung ta a, LALPA Pathien, Israelhai Pathien hminga ding Tempul chu ka lo bawl ta ngei bok a. 21 Chu taka chun Bawm siena ding hmun ka ruot a, chu Bawma chun LALPAN Aigupta rama inthoka ei pi le puhai a thruoi suok hnunga an kuoma thu a thlung, LALPA thuthlung chu a um a nih” a ta.

22 Solomon chu Israel mi pungkhawm po po hmuah LALPA maichàm hmaa chun a ngîr a, van tieng banin kut a phar a, 23 hieng hin a trongtrai a: “Aw LALPA, Israelhai Pathien, lungril po poa i lampui hrawtu i siehlawhai kuoma i hmangaina thuthlung vong tlattu, nangma ang hi chung tieng vana le hnuoi tieng leihnuoiah Pathien dang hrim an um nawh. 24 Ka pa, i siehlaw Davida kuoma bau ngeia thu i tiem chu i hung hlen a, chu chu voisuna kan hmu hi a nih.

25 “Tu hin aw LALPA, Israelhai Pathien, ka pa Davida kuoma, ‘Ka mithmua i um dan anga i thlahai khom ka mithmua fimkhur taka an um vé phot chun, Israel lalthrungpha hluotu ding mi chu invâi ngai naw ti nih’ tia thu i lo tiem kha vong ngei dingin ka ngèn che. 26 Aw Israelhai Pathien, ka pa Davida kuoma thu i tiem kha hung intlungtir ngei rawh.

27 “Amiruokchu, Pathien meu chu hnuoiah i chêng nuom tak tak ding am a ni? Vànhai, van insâng tak hmanin an dawl zo naw che a na, hi ka Tempul bawla lem hin chu i va hang inleng naw nasa zuol awm de aw! 28 Chuong sa khom chun aw LALPA Pathien, zangaina hnia i siehlaw trongtraina hi lo ngaisak la, voisuna i hma ngeia trongtraia i siehlaw hung kona che hi lo ngaithlapêk hràm rawh. 29 ‘Chu taka chun ka hming chu um a tih’ i lo tìna hmun tieng hi ngha a, i siehlaw hung trongtraina chu i lo ngaithlak theina dingin, hi Tempula hin sùn le zànin mit inlèn zing hlak rawh. 30 Hi hmun tieng hi nghaa i siehlaw le i mi Israelhai dawvan hung kaina chu lo ngaithlapek rawh. I chèngna vana inthok chun lo ngaithla la, i hriet pha leh lo ngaidam hlak rawh.

31 “Mi tu khomin a tuolbawm poi a tawk a, inkhàm hiel a lo ngai a, hi tempula i maicham hmaa thu inkhâm dinga a hung pha chun, 32 vana inthokin lo ngaithla la, che nghal la, i siehlawhai chungah ro hung rêl la, a thiem naw lem lu chunga chun a thil suol thawna maw chu intlaktir la, poi tawk nawtu chu thiem inchangtir la, a thiemzie chu namnghet rawh.

33 “Nangma lakah an suol leia hmêlmahaiin i mi Israelhai an hnè changin, nangma tieng hung ngha a, i hming lam a, hi tempula hin ngaidam an hung inhni phâ chun, 34 vana inthokin lo ngaithla la, i mi Israelhai suolna chu ngaidampek la, an pi le puhai kuoma ram i peka chun thruoi kîr nawk rawh.

35 “I mihaiin i lakah thil suol an thaw leia vanin ruo hrim a’n surtir ta naw chângin, hi hmun tieng hi nghaa hung trongtrai a, i hming lam a, i hrem leia an suolhai an sim pha chun, 36 vana inthokin lo ngaithla la, i siehlaw, i mi Israelhai suolna chu lo ngaidam la, an khawsak dan ding lampui indik kawkhmu la, i mihai rochana i pèk rama chun ruo hung insùrtir rawh.

37 “A ramah tràm tla a, hripui dam, inlawngna dam le hmonna hri dam inlêng a, khauthrikthri le tuktulung dam intâm a, an khuo khaw lai khom hmêlmahaiin inhuol a, sietna le hri le hrai iengkhoma a tlàk buok chângin, 38 i tempul tieng kut hung phar a, hrem an tuor dan chit chu mani lungril sengah pai a, i mi Israelhai laia mi tu khomin i kuomah trongtraia hnìna an hung intlun châng chun, 39 i chengna vana inthokin lo ngaithla la, ngaidam la, che la, an ngaituona seng i hriet leiin an nina ang peiin thaw rawh, nangma chauh hi mihriem po po lungril hretu i ni si a. 40 Kan pi le puhai kuoma ram i pèka hin an um sung chun ieng lai khomin nangma tri nachang hung hre pha ta’ng an tih.

41 “Ram dang mi, i mi Israel mi ni ve lo, sienkhom i hming leia ram hla taka inthoka hung pantuhai che khom, 42 (i hming ropui tak le kut hrat tak phara i thawpekzie hi mihaiin an la hung hriet pei ding a ni si leiin) tempul tieng nghaa an hung trongtrai pha chun, 43 i chèngna vana inthokin lo ngaithla la, ram dang mi thil hnî chu lo thawpek la, chuongchun i mi Israelhai ang bokin khawvela hnam tinin i hming hung hrea triin, hi ka tempul bawl hin i hming a put ngeizie hung hre thei an tih.

44 “I mihaiin hmêlmahai an bei pha, i tirna hmun chu khaw tieng khom ni sien, i khawpui thlang le i hminga ding Tempul ka bawlna hmun tieng hi nghaa LALPA kuoma an hung trongtrai chun, 45 i chèngna vana inthokin an trongtraina le hnina chu lo ngaithlapek la, an hnina chu lo pompèk rawh.

46 “I lakah thil suol an thaw a, (tu khom suol lo an um bok si naw a), an chungah i lung a sen a, hmêlma kutah i pêk a, an ram tieng, hnâi tè amanih hla tak amaniah sala an thruoi phâ, 47 sala an thruoina hmunah hung inngaituo suok a, insîr a, an intàngna rama inthokin hung ngèn a, ‘Thil suol kan lo thaw a, poi kan lo tawk a, rilo takin kan lo khawsa a nih’ an ti phâ, 48 an hmèlmahai, sala thruoituhai rama inthoka lungril le thlaraua nangma tieng hung ngha kìr a, an pi le puhai i pèk ram tieng, i khawpui thlang le i hming dinga ka bawl Tempul tieng hi nghaa an hung trongtrai pha chun, 49 i chèngna vana inthokin an trongtraina le hnìna chu lo ngaithlapek la, an hnìna chu lo pompek la, 50 i mipuihai thil suol thaw chu lo ngaidam la, an poi tawkna po po chu ngaidam la, sala mantuhai chu inlunginsiettir rawh; 51 i mi, i rochanhai, Aigupta rama inthoka rawtuina pûma inthoka i hung thruoi suokhai an ni si a.

52 “I siehlaw hnìna le i mi Israelhai hnìna lakah i mit insîm ngai naw la, an hung ko pha che lo ngaithlapêk hràm rawh. 53 Aw LALPA Chunghnungtak, Aigupta rama inthoka kan pi le puhai i thruoi suok laia i siehlaw Mosie hmanga i puong tah ang khan, i rochan dinga khawvel hnam po po laia i ser hrang bik an ni si a” tiin.

54 LALPA kuoma a trongtraina le hnìna po po Solomonin a’n sam zo chun van tieng kut phara a dingthrathruonna hmun, LALPA maicham hmaa inthok chun a tho a. 55 A ngîr a, rawl inring takin Israel mi pungkhawm po po chu mal a sawm a: 56 “A thutiem anga chawldamna Israelhai petu LALPA chu inpâkin um raw se. A siehlaw Mosie hmanga thil thra a lo tiem po po chu pakhat khom a’n khèl nawh. 57 Ei thlatuhai kuoma LALPA Pathien a um hlak ang bokin ei kuoma khom um sien la, mi thlathlamin mi maksan ngai naw raw se. 58 Ei thlatuhai kuoma thu a pèk hai, ruot hai le dàn hai chu zawm a, lungril po poa a lampuihai ei hraw theina dingin ei lungrilhai chu ama tieng innghattir raw se. 59 Ni tina ei mamaw ang peia a siehlaw chungthu le a mi Israelhai chungthua kut a rol theina dingin LALPA kuoma hnìna ka’n tlunhai po po hi sùn le zànin LALPA ei Pathien kuoma chun châm zing raw se. 60 Chuongchun, hnuoia mi po poin LALPA chu Pathien a nizie le ama naw chu tu khom an um nawzie hung hre thei ta’ng an tih. 61 Amiruokchu, voisun ang hin a thuruothai le thupekhai chu nunpuia zawm tlat dingin in lungrilhai chu LALPA ei Pathienah a kop tlat ding a nih” tiin.

62 Lal le Israel mihai po po chun LALPA hmaah hlànbiek an inhlàn a. 63 Solomon chun LALPA kuomah inremna thilhlan bawngchal singhni le sanghni le beram nuoi khat le singhni a’n hlan a. Chuong ang chun lal le Israel mihai po po chun LALPA tempul chu an inhlàn a nih.

64 LALPA hmaa dâr maichàm chu pumraw thilhlân dam, bu le bâl thilhlân dam le inremna thilhlâna a thauhai inhlànna dingin a chin taluo leiin, chu ni ma chun LALPA tempul hma zawna tuolpuk lailung chu lalin a’n hlàn thienghlim a, chu taka chun pumraw thilhlânhai, bu le bâl thilhlânhai le inremna thilhlâna a thauhai chu a’n hlàn a.

65 Chu trum chun Israel mipui pungkhawm, Hamath kotsuoa inthoka Aigupta ruom chena mi fe khawmhai chun kût chu lal rawiin an hmang a. LALPA ei Pathien hmaah ni sari an hmang phot a, ni sari dang an hmang zom nawk a, a rêngin ni sawm le ni li sung zet an kût tlàng a. 66 A trumtriek tûk chun mipui chu lalin a’n trintir a. Mipui chun lal chu mal an sawm a, LALPAN a siehlaw Davida le a mi Israelhai chunga a thratna chuong ang zozai a’n langtir lei chun lungril hlim tak le lawm takin an in tieng an kir tawl ta a.