Solomonin Tempul a bawl
3
1 Solomon chun Jerusalema Moria Muol, a pa Davida kuoma LALPA a hung inlàrna, Jebu mi Arauna hrizawl, Davidan hmun a lo buotsaia chun LALPA tempul chu a bawl a. 2 Lal a nia inthoka kum lina, thla hnina le ni hninaa chun a bawl tran a. 3 Pathien Tempul thrut dinga Solomon rem chu a dung meter sawmhni le pasari le a khang meter kuo a nih. 4 Tempul tuolpuk bathlar chu tempul khang le intiet char, meter kuo a na, a’n sangzie chu meter sawmpathum le a chenve a nih. A sung chu rangkachaka inluon vong a nih. 5 Pindan lien lem banga chun fâr thing a hmang a, chu chu rangkachak hlîr hlakin a’n luon a, chu taka chun tûm thing le khaidiet lim a’n chuongtir a. 6 Tempul chu lunghlu chi hrang hrangin a cheimawi a; rangkachak khom Parvaim rangkachak ngot a hmang a. 7 Tempul kalkhanghai, banghai, kotkhar le truong hai chu rangkachaka inluon vong a na, a banga hai chun cherub lim a ker a.8 Hmun Thienghlim Tak chu a dung le a khang meter kuo ve ve a na, a sûng chu rangkachak hlîr hlaka inluon vong a na, chu taka ding chun rangkachak kilogram singhni le sangkhat vel a hmang a. 9 A kilna khom rangkachak thirkil vong a hmang a, thirkil pakhat chu gram zanga le sawmsari peia rik a nih. Pindan siling po po khom rangkachaka inluon vong a nih.
10 Chun, Hmun Thienghlim Taka chun cherub lim pahni a siem a, chuonghai chu rangkachaka inluon vong a nih. 11 Cherubhai chun thla an zâr a, meter kuo an zàr khum a. Cherub pakhat thla chu meter hni le centimeter hni le a chenvea sei a na, tempul bang a va sun phàk a; a thla khing tieng khom chu meter hni le centimeter hni le a chenvea sei bok a na, cherub pakhat thla ki chu a va hawl phak a. 12 Chuong ang bokin cherub dang thla khom chu meter hni le centimeter hni le a chenvea sei a na, Tempul bang a va sun phak a, a thla khing tieng chu meter hni le centimeter hni le a chenvea sei bok a na, cherub pakhat thla ki chu a va hawl phak a. 13 Chuong cherubhai chun meter kuo inkhumin thla an zàr a, kea ngirin in sung tieng an ngha ve ve a.
14 Chun, puonzâr ding a dumpawl le senduk le sen lâr inpol chu pat zai inhmi takin a siem a, chu taka chun cherub limhai a zep sa a.
Dâr ban pahni
15 Tempul kota phun ding dâr ban pahni, meter riet vé vèa insang le a sîpa inchuon ding, a lu thrut mum meter hni le centimeter hni vé vèa insâng chu a siem bok a. 16 A lu thrut mum khei par chu khaidiet her thlopin a vêt kuol a, khaidieta chun theibufai lim zakhat a khai tlar bok a. 17 Chu dâr banhai chu Tempul kota chun sim tieng pakhat, hmar tieng pakhat a phun a. Sim tienga ban chu Jakin a’n bùk a, hmar tienga mi chu Boaza a’n bûk bok a.