Solomonin tempul a bawl
6
1 Israel thlahaiin Aigupta ram an suoksana inthoka kum zali le kum sawmrietna, Israelhai chunga Solomon a hung inlala inthoka kum lina le a thla hnina, Ziv thlaa chun LALPA Tempul chu Solomonin a bawl tran a.2 Solomonin LALPA Tempul a bawl chu a dung meter sawmhni pasaria sei, a khang meter kuoa lien, a’n sangzie meter sawmpathum le centimeter nga a nih. 3 Tempul tuolpŭk bathlăr chu Hmun Thienghlim tieta sei, a khang meter kuoa lien a na, Tempul kota inthoka meter li le a chenvea sor dawk a nih. 4 Tempul banga chun tukver chiktê tè, a puo tieng para a sung tieng inzui chi, a siem a. 5 Tempul puo tieng, a hnung tieng le a sîr ve vea chun a huol tuokin Tempul bang ringsanin pindan sawng thum, sawng tin chu meter hni le centimeter hnia insângin a băwl a. 6 A sawng hnuoi tak pindan chu meter hni le centimeter hnia lien a na, a sawng lailung chu meter hni le centimeter saria lien a na, a sawng chung tak chu meter thum le centimeter khata lien a nih. Tempul banga a kalkhang rol ngai loa sawng tin chu a hnuoi banga innghat thei dingin sawng tina Tempul bang chu a hnuoia mi nèkin a chunga mi chu inphân lem hreta siem pei a nih.
7 Tempul an bawl lai chun an lung hmanghai chu lung lăkna hmuna ser sa vong a ni leiin an bawl sungin tubo hem ri dam, hreia thil tuk rî dam le hriemhrei hmang ri hrim hrim Tempul hmuna chun hriet ding a um nawh.
8 A hnuoi tak pindan lutna chu Tempul sim tieng sìrah a um a. A sawnga lawn kaina dingin kailawn inher kuol a um a, chuong ang bokin a sawng chunghnung tak kaina khom chu siem a nih. 9 A rurèl a bawl zo chun a chungah sidar tlungpŭm khangin chu chunga chun sidar thingphĕk a dăng a. 10 Tempul bang le insikin a vêl tuokin pindan meter hni le centimeter hni senga insang a bawl a, chuonghai chu Tempul le chun sidar tlungpuma zom a nih.
11 LALPA thu chu Solomon kuomah a hung tlung a, 12 “Tempul i bawl chungchang thua hin, ka thusuokhai zui a, ka thupêk le dànhai zăwma i kengkaw tlat chun, nangma hmangin Davida kuoma ka thu tiem chu sukpuitling ka tih. 13 Israelhai lai chêng ka ta, ka mi Israelhai chu thlàthlam ngai naw ning” a ta.
Tempul sung chei dan
14 Solomon chun Tempul chu a bawl zo ta a. 15 Tempul sung tieng bang inthuona dingin sidar thingphĕk a hmang a, a truonga inthoka a siling chenin thingphĕk a bel vong a, a truongah fâr thingphĕk a pha a. 16 A châwr tieng kil tak meter kuo-a sei chu a truonga inthoka a siling chenin sidar thingphĕkin a pìng a, chu chu Tempul sunga Hmun Thienghlimtak chu a nih. 17 Hmun Thienghlimtak hmaa pindan lien tak chu meter sawmpariet-a sei a nih. 18 Chu pindan sung tieng po po chu sidar thingphĕka inthuo khum vong a na, chu taka chun ûm lim le par vul lai lim a ker a; lung hrim hrim inlang lo dinga a rênga sidar thingphĕka inkhum vong a nih.
19 LALPA Thuthlung Bawm siena dingin Tempul sungrila chun pindan a buotsai a. 20 Chu pindan chu a dung meter kuo, a khang meter kuo le meter kuoa insang, rangkachak hlîra luon khum vong a ni a, chu taka sidar thinga siem maichàm khom chu rangkachak hlîra inluon khum a ni bok. 21 Chuong ang chun tempul sung tieng po po chu rangkachak hlîrin Solomon chun a’n luon khum vong a, pindan sungril daidanna dingin rangkachak khaidiet a thlung a, chuong khaidiethai khom chu rangkachak hlîra inluon khum vong a nih. 22 Tempul sung tieng cheina hrim hrim le Hmun Thienghlimtaka maicham khom chu rangkachaka inluon khuom vong a nih.
23 Pindan sungrila chun oliv thinga siem cherub pahnih, meter li le centimeter li ve vea insang a sie a. 24 Cherub thla khing khat chu meter hni le centimeter hni le a chenvea sei a na, a thla khing tieng khom meter hni le centimeter hni le a chenvea sei bok a na, a thla ki hmawr vé vè inkâr chu meter li le centimeter li le a chenve a nih. 25 Cherub pahnina khom chu meter li le centimeter lia insang bok a na, cherubhai insangzie le lienzie chu thuhmun char a nih. 26 Cherubhai chu meter li le centimeter li ve vea insâng an nih. 27 Cherubhai chu pindan sungril taka chun a sie a, thla an zàr a, pakhat thla chun bang khing tieng a va tawk a, pakhat dang thla khomin bang khing tieng a va tawk bok a, chu pindan lailung taka chun an thla le an thla chu an intawk a. 28 Cherubhai chu rangkachak tuia inluon vong a nih. 29 Tempul sung tieng le puo tieng banga chun a vêl tuokin cherub dam, tûm thing dam le par vul lai lim dam a ker a. 30 Sung tieng le puo tienga Tempul truong po po chu rangkachak tuiin a’n luon a.
31 Chun, Hmun Thienghlimtak lutna dinga kotkhar tuok hni chu oliv thingin a siem a, kotkhar bieng chu kil nga nei a nih. 32 Oliv thing kotkhar pahnia chun cherub hai, tûm thing hai le par vul lai lim a ker a, chuonghai chu rangkachak sut phêkin a tuom khum vong a. 33 Tempul sung lutna ding kotkhar kawm chu kil li nei, kil tin inchen vong, oliv thinga siem a nih. 34 Chun, fâr thing hmangin kotkhar pahni a siem a, kotkhar tin chu thing phek hnia siem, kopzaa zom, kei thlep thei a nih. 35 Chuong kotkhara chun cherub dam, tûm thing dam le par vul lai lim dam a ker a, chuonghai chu rangkachakin inruol takin a’n luon khum a. 36 Tempul hmaa chun kotzawl sungril lem a siem a, lung ser thuo thum le sidar thing thuo khat inthuo peiin a’n huon a.