Solomon lal in
7
1 Ama in ruok chu Solomonin kum sawm le kum thum sungin a bawl zo chau a. 2 A lal in, ‘Lebanon Ramngaw Rûn’ tia a ko chu a dung meter sawmli pali, a khang meter sawmhni pahni le meter sawmpathum le centimeter ngaa insang a na; sidar thing ban tlar thuma a phun chunga chun sidar thing tlungpum, at le nawt nam chu a ban zawn peiah an khang a. 3 Tlar khatah tlungpum sawm le panga pei a um a, a rêngin tlungpum sawmli le panga a na, chu chunga chun sidar thingphèk a dàng a. 4 A bang tieng tlar ve vea chun insang takah tukver pathum seng inhma tonin a hong a. 5 Kotkhar le tukver bienghai chu kil li neia siem vong a na, a banga tukver pathumhai chu a khing tieng tlara tukver pathumhai le inep tuo vong a nih.6 Ban phunin hulhliep,b a siem a, a dung chu meter sawmhni pahni le a khang meter sawmpathum le centimeter nga a nih. A do kàngtu banhai chu a tlarin a phun a, ban le bang inkarah a lutna ding kailawn a siem bok a, chu ban khel chu dithlafarfemin a hung inkhum a. 7 Chun, rorelna pindan a siem a, chutaka chun lalthrungpha a sie a, chu chu rorêlna hmun a nih. A truonga inthoka siling chen sidar thingphek a bel vong a. 8 Chuong ang char chu chu taka inthoka iemani chena hlaah ama umna dingin in a bawl a. Chuong ang bok chu a nuhmei Faraw naunu umna dingin in a bawl bok a. 9 In inhuonna tuol kot lien taka inthok le a inthruta inthoka dithlafarfèm chenin lung man tam, a huntawk ding chara ser, a sung tieng le a puo tienga dawk hai khom tan ruol hmar vong chu a pha a. 10 A inthrut lungphùmhai chu lung thra le lien tak tak, a thren meter thum le centimeter nga, a thren meter lia sei a nih. 11 Chu chunga chun lung thra tak tak, a huntawk ding ang chara ser le sidar thing tluon a rem a. 12 LALPA tempul kota tuolpûk le in bathlàrhai ang bokin in inhuonna sung tuol zawl lien tak chu lung insersuon thuo thum le sidar thingphèk thuo khata inhuon a nih.
Huram a ruoi
13 Lal Solomon chun Tura khaw mi Huram a va’n thruoitir a. 14 Ama chu Naftali hnama mi hmeithai naupa a na, a pa chu Tura mi, dâr sut le ser thiem a nih. Huram chu dâr sut le ser tienga chemkal le thiem tak el a ni leiin lal Solomon kuomah a hung a, a sin po po chu a thawpek a.
Dar ban pahni
15 Huram chun dâr ban meter riet a insang le meter nga le centimeter thum biela lien pahni a sung a. 16 Dar ban sìpa inthrut ding a lu kheipar, dâr bokin meter hni le centimeter hnia insang vé vè pahnih a sung bok a. 17 Chu lu kheipara chun khaidiet inher thlop chìt chét lim pasari a um a. 18 Khaidiet inher thlophai inhuoltu dingin theibufai lim tlar hniin a’n huoltir a, chu chun ban lu kheipar chu a cheimawi a, chuong ang chun a pakhat dang khom chu a siem a. 19 Hulhliep ban sìpa dar lu kheipar a siemhai chu lili par lim anga mawi vong a na, meter khat le centimeter rieta insang a nih. 20 Chun, dâr ban pahni sîpa a lu kheipara khaidiet inher thlop chunga chun theibufai lim zahni a vêl tuokin a sie bok a. 21 Chuong dar banhai chu tempul hulhliepa chun a phun a, sim tienga ban chu Jakinc a’n bûk a, hmar tienga ban chu Boaz a’n bûk bok a. 22 A ban sîpa a lu kheiparhai chu lili par ang an nih. Chuongchun, ban siem sin chu zo a ni ta a.
Dâr tuizêng
23 Chun, dâr tuizèng lien tak el, meter hni le centimeter hni a insâng, hol tlanga meter li le centimeter lia lien, a rei kuol meter sawmpathum le centimeter hnia lien, a sung a. 24 A rei kuol hnuoi chara chun tuiûmd lim zathumin tlar hniin a vel tuokin a’n huoltir a, chuonghai chu tuizèng le a ruola sung nghal vong a nih. 25 Tuizèng chu bawngchal lim sawmpahni chunga innghat a na, bawngchal pathumin hmar tieng, pathumin sim tieng, pathumin sak tieng, pathumin thlang tieng an ngha a, tuizèng chu an chunga chun a’n nghat a, an mei chun sung tieng a ngha a. 26 Tuizèng bang sàzie chu milimeter sawmsari le panga a na, a rei chu lili par ang le no rei iner ang a na, tui litar singli keng a nih.
Dâr tawlailir
27 Chun, dâr bokin nor lir thei bawm sawm a siem a, pakhat pei chu meter khat le centimeter rieta sei, meter khat le centimeter rieta lien le meter khat le centimeter thuma insang a nih. 28 Bawm tin chu kil li neia siem a nih. 29 A kawm banga chun sakeibaknei lim dam, bawngchal lim dam le cherub lim dam a ker a. Sakeibaknei le bawngchal limhai chung le hnuoia chun par thri lim, a suta sut a um a. 30 Bawm thrut kil lia chun dâr tawlailir ke pali le a kei virtu dâr kalkhang a um a. Bawm sung kil tinah dâr maihùn innghatna a um a, chu innghatna ban palihai chu par thri lim hriela siem, a sunga sung vong a nih. 31 Bawm sina chun a kuolin tuibèl siena ding a um seng a. A chung tieng chun tuibèl chu centimeter sawmli pangain a hung lor suok a, a hnuoi tieng chu centimeter sawmpariet a tlum thung a. A vêl chun mi lim ker a um a. A kawm innghatna chu inkuol loin kil li neia siem a nih. 32 A ke pali chu dâra siem, centimeter sawmruk paruka insang, a bawm bang hnuoia inbûk a na, a ke inbukna kalhai le tawlailir bawm chu sung kop vong a nih. 33 A kè chu tawlailir kè ang a na, a kal hai, a ke kuol tlang hai, a kuol do nghettu zai hai le a laivir po po chu thîra sung vong a nih.
34 Chun, a bawm kil tina chun bawm le inzomin a dotu thrut a um seng a. 35 A tlâng vêttu centimeter sawmhni pahni a sei thil kuol a um a. A dotu banhai chu a bawm bang le sung zom vong a nih. 36 A dona le a bawm banga chun hmun ruokna taphotah cherub lim dam, sakeibaknei lim dam le tûm thing lim dam a sie sip vong a, thil lim chuong nawna a tlânghai chu par thri lim inher chietin a chei a. 37 Chuong ang chun nor lir thei bawm sawm a siem a, an inang vong a, an intiet vong bok.
38 Chun, insawpna ding dâr maihùn sawm a siem bok a. Maihùn tin chu hol tlanga meter khat le centimeter rieta lien, litar zariet inleng vong a nih. 39 Tempul sim tieng chun thil thrut panga a sie a, hmar tieng chun panga a sie bok a; tuizêng ruok chu sim sak kilah a’n thrut a.
Tempul hmangruohai
40 Huram chun insawpna bèl dam, vutluo dam le maihùn dam a siem bok a. LALPA Tempula dinga Lal Solomon a siempek po po chu a zo fel ta vong a. 41 Chuonghai chu dâr ban pahni dam; a ban lu bawk, no rei anga inkûm dam; ban lu bawka khaidiet lim tlar hnia inkuol dam; 42 ban lu bâwka theibufai lim zali, ban tinah tlar hnih, tlar tin zakhata rem kuol hai dam; 43 nor lir thei bawm sawm le maihùn sawm hai dam; 44 dâr tuizêng le a thrut bawngchal lim sawmpahni dam; 45 bêl dam, vutluo dam le berbu dam chu a nih. Huramin LALPA tempula dinga lal Solomon a siempek hai hi dâr tle chi vonga siem a nih. 46 Hieng thilhai hi Jordan phaizawla Sukot le Zarethan inkara belsungna hmuna lalin a’n sungtir a nih. 47 A tam tham êm leiin hienghai hi Solomon chun bûk chuong loin a sie a, a zât hriet a ni nawh.
48 Solomon chun LALPA Tempula hmang ding hmangraw dang khom tam tak a’n siemtir a, chuonghai chu: rangkachak maicham dam; hlànbei siena rangkachak dawkan dam; 49 Hmun Thienghlim Tak hma tienga sie ding khawnvar siena sawm, chang tieng panga le voi tieng panga, rangkachak hlîr hlaka siem dam; rangkachak parte lim dam, khawnvar dam le chaiche dam; 50 rangkachak maihun hai, khawnvar hup hlumna dam, rimtui rawna berbu dam, mei luokna dam; Hmun Thienghlim Tak le hmun thienghlim indaidannaa kotkhar kalna le kopza po po, rangkachak hlîr vonga siem, dam chu a nih.
51 Solomonin LALPA Tempula dinga hmangruo an siemtir po po chu zo a ni ta a. Chuongchun, a pa Davida lo inhlàn tah tangkaruo le rangkachak le bûr le bêlhai chu a lâk a, LALPA tempula ro siekhawmnaa chun a sie a.