Tempul bawl dinga inbuotsaina
2
1 Solomon chun LALPA hminga ding Tempul le ama ta ding lal in bawl dingin thupek a’n suo a. 2 Thil phurtu mi singsari le tlanga lung sertu ding mi singriet le anni inrawitu ding mi sangthum le zaruk a ruot a.3 Chun, Solomon chun Tura lal Hiram kuomah, “Ka pa Davidan a in a bawl laia sidar thing i lo thon hlak ang khan sidar thing mi hung thon ve raw khai. 4 LALPA ka Pathien hminga ding Tempul bawl tran ka tum mèk a. Chu chu Hmun Thienghlim, LALPA hmaa rimtui rawna ding dam, chatlak loa hlanbei kan sie zingna ding dam, zing le zan le Sabat le thla thar hun le LALPA kan Pathien hminga hunbi ruot kûthai kan hmang chànga pumraw thilhlân kan inhlân zingna ding chu a nih. Chu chu Israelhai thaw dinga kumkhaw thu ruot a ni si a.
5 “Ka Tempul bawl ding chu ropui tak a nih, kan Pathien chu pathien danghai po po nêka ropui lem a ni si a. 6 Sienkhom, van zâu tak le insang tak hmana a keng zo lo chu tuin am a Tempul ding bawlpek thei a ta? A hmaa thilhlânhai rawna ding chauh naw chu kei telul hin iengtin am a ta dingin tempul chu bawlpek thei ka ta?
7 “Chuleiin, Judai ram le Jerusalema mi themthiem, ka pa Davidan a lo ruoi hlakhai le thok tlâng ding mi pakhat, rangkachak le tangkaruo, dâr le thîr them tienga chemkal, pat senduk le sen lâr le dumpawl nam thiem le thil ker thiem mi hung tirpek raw khai. 8 Chun, Lebanon-a inthokin sidar thing, fâr thing le algum thinghai mi hung lapek bok rawh, i mihai chu thing phùr thiem an nih ti ka hriet si a. 9 Tempul ka bawl ding chu lien tak le ropui tak a ni ding a ni leiin, thing ka mamaw tawk ka hmu theina dingin ka mihai chu i mihai lai thok ve raw hai se. 10 I siehlawhai le thing phûrtuhai chu huit beiphit kilogram maktaduoi hni, barli beiphit kilogram maktaduoi hni, uoiin litar nuoi li le oliv hriek litar nuoi li pe’ng ka tih” tiin lekha a thon a.
11 Tura lal Hiram chun, “LALPAN a mihai a hmangai leiin an lalah a siem che a. 12 Lal Davida kuoma nau var tak, lungvar nei le hriet thiemnaa inthuom, LALPA Tempul le ama lal in bawltu ding petu LALPA, Israel Pathien, hnuoi le van siemtu chu inpâkin um raw se. 13 Mi themthiem tak el Huram-Abi ka hung tir ding a nih. 14 A nu chu Dan hnama mi a na, a pa chu Tura mi a nih. Rangkachak le tangkaruo, dâr le thîr, lung le thing, pat senduk le senlâr le dumpawl le zai inhmi tinrêng a ieng ieng khom them thiem a nih. Thil ker tienga chemkal le ieng ang ruongâm khom a lim an pek taphot chu ker thiem vong a nih. I mi themthiemhai le ka pu Davida mi themthiemhai lai hung thok veng a tih.
15 “Ka lalpain a siehlawhai hung thon dinga a tiem huit le barli hai, uoiin le oliv hriek hai chu hung thon sien la, 16 keinin Lebanona thing chu i dit zât zàt lo phûr kan ta, tuifinrietah Jopa khaw kai chen hung tolpek kan ti che a, chu taka inthok chun nangin Jerusalem tieng i lo tol tung pei ding annawm” tiin donna lekha a thon a.