Tempul hmangruohai
4
1 Solomon chun dâr maichàm a dung meter kuo, a khang meter kuo, a’n sangzie meter li le a chenve a siem a. 2 Chun, dâr tuizeng kuol a sung a, chu chu a laiah hol tlanga meter li le a chenve le an sangzie meter hni le centimeter hni a nih. A rei kuol chu meter sawm le pathum le centimeter hnia lien a nih. 3 A rei hnuoi chara chun meter chenve dan peia thuo hnia intlar bawngchal limin a vêt suok a. Chu bawngchal limhai chu tuizèng le sakhata sung vong a nih.4 Tuizèng chu bawngchal lim sawmpahni chunga inthrut a na, bawngchal pathumin hmar tieng, pathumin sim tieng, pathumin sak tieng, pathumin thlang tieng an ngha a. Bawngchalhai chun hnung an innghat tuo seng a, an chunga chun tuizèng chu a’n nghat a. 5 Tuizèng bang chu millimeter sawmsari le panga vela sà a na, a rei chu no rei ang, lili par vul lai ang a nih. Tuizèng chu tui litar singli keng a nih.
6 Chu zoah insawpna ding maihùn sawm a siem a, panga chu sim tieng, panga dang chu hmar tieng, a sie a. Chuonghai chu pumraw thilhlânhai sawpna dingin an hmang a, tuizènga mi ruok chu thiempuhai insawpnaa hmang ding a nih.
7 Chun, a siem dan ding ruot ang takin rangkachak khawnvar siena ding sawm a siem a, tempula chun sim tieng panga, hmar tieng panga ve ve a sie a.
8 Dawkan sawm a siem a, tempula chun sim tieng panga, hmar tieng panga ve ve a sie a. Thil thèna ding rangkachak berbu zakhat a siem bok a.
9 Chun, thiempuhai ta dingin a sung tieng tuolzawl a siem a, a puo tieng chun tuolzawl lien tak le a kotkharpui chu a siem bok a, kotkhar chu dâr tuiin a’n luon a. 10 Tuizèng chu tempul sim sak tieng kila chun a sie a. 11 Bûr le bêl dam, vutluo dam le thil thèna berbu dam a siem bok a. Chuongchun, Pathien tempula dinga lal Solomonin Huram an siemtir chu a zo ta a.
12 Chuong a siempekhai chu: dâr ban pahnih; a ban sîp thrut mum ding a hmor inbawk pahnih; ban sîp thrut mum hmor inbawk pahnihai cheina ve ve hai; 13 ban sîp thrut mum hmor bawk khei para theibufai lim zali, tlar hnia a rem hai dam; 14 maihûnhai le an innghatna thruthai; 15 tuizèng le a’n thrutna bawngchal sawmpahnihai dam; 16 bûr le bèl hai, suodur hai, sa thurna thirkut hai le chuonghai le inzom thil danghai po po. Huram-Abiin LALPA tempula ding lal Solomon a siempekhai po po chu dâr tle chi vonga siem a nih. 17 Lal chun Jordan phai Sukot le Zarethan inkarah pilin a limhai a’n sungtir vong a nih. 18 Hieng po po Solomonin a’n siemtirhai hi a tam tham êm leiin dâr an hmang zat khom bûk seng ruol lo a nih.
19 Solomonin tempul hmangruo dang a’n siemtirhai chu: rangkachak maichàm dam, hlànbei siena dawkàn dam; 20 ruot anga Hmun Thienghlim hmaa sit ding rangkachak hlîr hlaka siem khawnvar siena hai le khawnvar sit ding dam; 21 rangkachak hlîra siem parte lim hai, khawnvar hai, chaiche hai, 22 khawnvar phita chep ruolna hai, thil thèna berbu hai, thleng hai, mei lakna hai dam; Hmun Thienghlimtak pindana kotkharhai le a pindan puia kotkharhai dam a nih.