Saltang kir nawk hai
9
1 Israel lalhai chanchin zieknaah Israelhai po po chu an sungkuo ang peia inchik vong an nih. Judahai chu an ringum nawna leiin Babulon-ah salin an thruoi a. 2 An chanpuol khuo hung hluo tran nawktuhai chu Israelhai laia a thren le thiempuhai, Levi chihai le tempula sinthawhai an nih. 3 Jerusalema Juda thla, Benjamin thla, Efraim le Manase thla umhai chu: 4 Amihud naupa Uthai, chu naupa Omri, chu naupa Bani an na, anni chu Juda naupa Perez thlahai an nih. 5 Silon thlahai laia um chu a nau upa tak Asaia le a naupahai an nih. 6 Zera thlahai laia um chu Jeuel a nih. Juda hnam um po chu an rêngin zaruk le sawmkuo an nih.7 Benjamin hnam laia um chu Mesulam naupa Salu, ama chu Hodavia naupa, ama chu Hasenua naupa; 8 Jeroham naupa Ibneia; Uzi naupa Ela, chu naupa Mikri; Sefatia naupa Mesulam, chu naupa Reuel, chu naupa Ibnija an nih. 9 An sungkuo thlatuhai suina dungzuia Jerusalema Benjamin thla um po chu zakuo le sawmnga paruk an na, chuonghai chu sungkuo lukhaitu vong an nih.
10 Thiempuhai chu: Jedaia hai; Jehoiarib hai; Jakin hai; 11 Pathien in enkoltu Hilkia naupa Azaria hai, Hilkia chu Mesulam naupa, ama chu Zadok naupa, ama chu Meraiot naupa, ama chu Ahitub naupa; 12 Jeroham naupa Adaia hai, ama chu Pasur naupa, ama chu Malkija naupa; Adiel naupa Maasai, ama chu Jazera naupa, ama chu Mesulam naupa, ama chu Mesilemit naupa, ama chu Imer naupa hai dam an nih. 13 Thiempu, sungkuo tin lukhaitu zat chu sangkhat zasari le sawmruk an nih. Anni rawi chu mi thei tak vong an na, Pathien ina rongbawl sin chu an mawphurna a nih.
14 Levihai laia mi chu: Hasub naupa Semaia, ama chu Azrikam naupa, ama chu Merari hnama Hasabia naupa hai; 15 Bakbakar hai, Heres hai, Galal hai le Mika naupa Matania, ama chu Zikri naupa, ama chu Asaf naupa hai; 16 Semaia naupa Obadia, ama chu Galal naupa, ama chu Jeduthun naupa hai; Asa naupa Berekia, ama chu Netofat-hai khuoa mi Elkana naupa hai chu an nih.
17 Kotkhar vengtuhai chu Salum hai, Akub hai, Talmon hai, Ahiman le a unauhai an na, an hotupa chu Salum a nih. 18 Anni chu tu lai chena suo tieng lal kotsuo nghaktu an na, Levihai riebuk tienga um hlak an nih. 19 Salum chu Kore naupa a na, ama chu Ebiasaf naupa a na, ama chu Kora naupa a nih. Ama le a kotkhar vengpui Kora thlahai chun an pi le puhaiin LALPA biekbuk kot an veng hlak ang bokin, Intuokna Puon in kot veng chu an mawphurna a nih. 20 Tuta hma chun Eleazar naupa Finehas chu kotkhar vengtuhai hotu a ni hlak a, a kuomah LALPA a um a. 21 Meselemia naupa Zekaria chu Intuokna Puon in lŭtna kotkhar vengtu a nih. 22 Chuong kotkhar vengtu dinga thlang po po chu mi zahni le sawmpahnih an nih. Davida le zawlnei Samuelin an thaw ding senga an lo ruothai chu an umna khuo senga an thlahai tiemna lekhabuah ziek a nih. 23 Anni le an nauhai chu LALPA biekbuk kotkhar vengtuhai an nih. 24 A kil li, sak le thlang le sim le hmara kotkhara hai chun vengtuhai chu an um hlak a. 25 Chun, khuoa um an unauhai chun trum khatah ni sari pei an sin chu an hung thrangpui hlak. 26 Vengtu hotu palihai chu Levi chia mi an na, mawphurna insang tak an chel a, tempul sunga thil po po le rosum siena pindanhai enkoltu an nih. 27 Chuongchun, enkol sin chu an sin a ni lei le tûk tina kot hongtu an ni leiin Pathien in bula chun an riek hlak.
28 A threnin rongbawlna bûr le bèl an enkol a, an lak suok le sie lut zatin an tiem zie a. 29 A thren chu in cheina hmangruo hai, Hmun Thienghlima bûr le bèl hai po po, beiphit hai, uoiin hai, hriek hai, beraw le rimtui hai enkoltu dinga ruot an nih. 30 Thiempu a threnin rimtui an siem hlak a. 31 Kora thla, Saluma naupa upa tak, Levi mi Mathithia mawphurna chu inhlàn ding bei siem a nih. 32 Chun, Kohat thlaa mi a thren chu Sabat zata hlanbei sie ding buotsaitu le sietu an nih. 33 Hla saktuhai le rimawi tumtu, Levi sungkuoa lukhaituhai chu sun le zana thok zing an ni leiin tempulah an riek a, rongbawlna sin danga khom an inawl vong a. 34 Chuonghai chu Levi sungkuoa lukhaituhai, an hnam chanchin inzieknaa lu nina cheltu, Jerusalema umhai chu an nih.
Lal Saula thlatu le a thlahai
35 Gibeonhai thlatu Jeiel chu Gibeon-ah a um a, a nuhmei hming chu Maaki a nih. 36 A nau lutir chu Abdon a na, a danghai chu Zura, Kisa, Baal, Nera, Nadab, 37 Gedor, Ahio, Zekaria le Miklot an nih. 38 Miklot chu Simeam pa a na, an laibunghai bulah Jerusalemah a um a. 39 Nera chu Kisa pa a na, Kisa chu Saula pa a na, Saula chu Jonathan, Malki-Sua, Abinadab le Esh-Baal (Is-Boshet) hai pa a nih. 40 Jonathan naupa Merib-Baal (Mefiboset) chu Mika pa a nih. 41 Mika naupahai chu Pithon, Melek, Tahrea le Ahaz an nih. 42 Ahaz chu Jada pa a na, Jada chu Alemet, Azmavet le Zimri pa a na, Zimri chu Moza pa a nih. 43 Moza chu Binea pa, Binea chu Refaia pa, Refaia chu Eleasa pa, Eleasa chu Azel pa a nih. 44 Azel nau parukhai chu Azrikam, Bokeru, Ismael, Searia, Obadia le Hanan an nih. Chuonghai chu Azel naupahai an nih.