41
1 Favang lailung velah Elisama naupa Nethania naupa Ismael, lal chia mi le lal khawnbawl laia pakhat chun mi sawm thruoiin Mizpa khuoa Ahikam naupa Gedalia kuoma chun a hung a, chu taka chun bu an fàk tlàng a. 2 Nethania naupa Ismael chu a mi thruoi sawm le chun an tho thut a, Safan naupa Ahikam naupa Gedalia, Babulon lalin ram optua a siem chu kawlhnâmin an that a. 3 Ismael chun Mizpa khuoa Gedalia kuoma Juda um po po le chu khuoa Babulon sipai um ve hai chu a that bok a.
4 Gedalia an that ni zinga chun, an that tì tu khomin an la hriet hmain, 5 Sekema inthok dam, Siloa inthok dam le Samaria inthok damin mi sawmriet, khakhmul vaw a, silfenhai kei thler a, mani inât pop neng nungin, LALPA ina inhlàn ding bu le bal thilhlân le rimtui chawiin, an hung a. 6 Nethania naupa Ismael chu Mizpa khuoa inthokin anni hmuok dingin a suok a, lampui intluonin a trap a. Anni a hmu chun an kuomah, “Ahikam naupa Gedalia kuomah hung ro” a ta. 7 Khawpui sung an lut chun Nethania naupa Ismael le a mi thruoihai chun anni chu an that a, khuorkhurumah an pei a. 8 Anni laia sawm ruok chun, “Mi that naw ro, ram hnuoiah bu hai, buman hai, hriek hai le khuoizu hai kan thuprûk treu si a” an ti leiin an hla a, an unauhai ruol chun an that sa ve ta naw a.
9 Ismaelin Gedalia ruola a thathai ruong a peina khuorkhurum chu lal Asa-in Israel lal Baasa laka inhumhimna dinga khur a siem a nih. Nethania naupa Ismael chun chu chu mithi ruongin a vur sip a. 10 Ismael chun Mizpa khuoa mi a dam um sun lal naunuhai le Ahikam naupa Gedalia hnuoia vengtu kawmandar Nebuzaradanin a’n koltir, Mizpa khuoa la um po pohai chu salah a thruoi vong a, chuonghai le chun Amon mihai ram panin a suok a.
11 Karea naupa Johanan le a kuoma um sipai hotuhaiin Nethania naupa Ismael thil suol thaw po po an lo hriet chun, 12 mi po po chu an thruoi a, Nethania naupa Ismael bei ding chun an fe a, tui tamna hmun Gibeon-a chun an va hmu a. 13 Ismael kuoma umhai po po chun Karea naupa Johanan le a kuoma um sipai hotuhai an hmu chun an lawm hle a. 14 Chuongchun, Ismaelin Mizpaa inthoka sala a thruoi po po chu an ngha kìr a, an kìr a, Karea naupa Johanan tieng chun an pakai ta vong a. 15 Nethania naupa Ismael ruok chu mi pariet leh Johanan kuta inthok chun an tlan suok a, Amon mihai kuomah an tlàn lut a.
Aiguptaah an tlan
16 Ahikam naupa Gedalia-in Gibeon-a inthoka a hung thruoi sipaihai, nu le nauhai le thoktuhai chu Nethania naupa Ismaelin Gedalia a that hnung chun a chang ta vong a, chuonghai laia a dam la um sun, Johananin Ismael kuta inthoka a san suokhai chu Johanan le a sipai hotuhai chun an rêngin Mizpa khuoa inthok chun an thruoi suok a, 17 Babulon mihai laka tlan suok tumin Aigupta an panpui a, Bethlehem khaw bula Gerut Kimhama chun an chawl a. 18 Babulon lalin ram optu dinga a ruot Ahikam naupa Gedalia chu Nethania naupa Ismaelin a that lei chun an tri êm êm a nih.