3 Kum riet a’n lal kum, naupang tak a la ni laia inthok hrimin a pu Davida Pathien chu a zong tran a, kum sawm le kum hni a’n lal kumin Judai ram le Jerusalema hmunsâng hai, Asera lim thinghai, milim siem fawm le sung fawm hai po po chu an thiel fai vong a. 4 Baal maichàmhai chu a mithmua ngei an sukchim a, maichàm chunga rimtui rawna maichàmhai chu a a suksiet vong a, Asera lim thinghai chu a phûr a, milimhai le thil limhai po po chu a rawt nawi vong a, a nawihai chu chuong milim hmaa inthawituhai thlàn chungah a phul a. 5 An maichamhai chunga chun thiempuhai ru a raw a, Judai ram le Jerusalem chu a’n thien fai a. 6 Chuong ang chun Manase hai, Efraim hai, Simeon hai le Naftali hai chengna khuohai le an kawl vela hmun rausan tahai chenin a thaw vong a. 7 Maichàmhai a sukchim a, Asera lim thinghai chu a phûr a, milem siem fawmhai chu a suknawi a, rimtui rawna maichàmhai chu a vuok nawi vong a. Chuong ang chun Israel ram sung po poah a thaw a, Jerusalem tieng a kir nawk ta a.

8 Josia inlala inthoka kum sawm le kum rietnaa a ram le tempul an inthien fai trumin lal chun LALPA a Pathien Tempul siem thra dingin Azalia naupa Safan hai, khawpui optu Maaseia hai le lekha ziektu Joahaz naupa Joa hai chu a tir a. 9 Thiempu Hilkia kuomah an fe a, kotkhar vengtu Levihaiin Manase mi hai, Efraim mi hai, Israel mi hlaa la um sun po po hai, Juda mi le Benjamin mi hai le Jerusalema cheng haiin Pathien Tempula thawlawm an hung chawi an lo lak khawm chu an pèk a. 10 Chu sum chu LALPA tempul siem thratnaa inrawitu dinga ruothai kuoma chun an pèk sawng a, anni chun Tempul ripêrtuhai le cheituhai hlawah an pèk a. 11 Juda lalhaiin an lo intrawptir tah Tempul siem thratna ding lung ser sa dam, tlungpum le kalkhanga hmang ding thing dam inchawkna dingin themthiemhai le in bawltuhai kuomah an pèk a.

12 Mihai chun an sin ringum takin an thaw a. An hotuhai, sin relbawltu palihai chu Levi chia mi ngot, Merari thlaa mi Jahat le Obadia le Kohat thlaa mi Zekaria le Mesulam hai an nih. Hieng Levihai hi rimawi tum thiem vong an nih. 13 Levi danghai chu thil phurtuhai inrawitu dam le sinthawhai thaw ding iengkim relbawltu dam an na; Levi threnkhat chu lekha ziektu dam, thil rikawttu dam le kotkhar vengtu dam an nih.

14 Chun, LALPA tempula sum an sie khawmhai an hang phor lai chun thiempu Hilkia chun Mosie hmanga pek LALPA dàn bu chu a hmu suok a. 15 Hilkia chun lekha ziektu Safan kuomah, “LALPA Tempulah dan bu kan hmu suok” a ta, Safan chu a pêk a. 16 Safan chun lekhabu chu lal kuomah a chawi a, a kuomah, “I siehlawhaiin thaw dinga i ruot po po chu an thaw a. 17 LALPA Tempula tangka um po chu an bun suok a. hotuhai le sinthawtuhai an pèk suok a. 18 Chun, thiempu Hilkia-in lekhabu a mi pek” tiin lal chu a hril a. Safan chun lal hmaah lekhabu chu a hang tiem a.

19 Lalin Dan thuhai a hang hriet chun a silpuon a pot thlèr a. 20 Lal chun Hilkia hai, Safan naupa Ahikam hai, Mika naupa Abdon hai, lekha ziektu Safan hai le lal siehlaw Asaia hai kuomah thu a pek a: 21 “Fe unla, hi lekhabu in hmu suoka thu zieka umhai chungthua hin keima le Israel le Judai rama hlaa la um sunhai ta dingin LALPA mi va rawnpek ro. Ei pi le puhaiin hi dân bua inziek ang hin LALPA thu chu an lo zawm naw leiin ei chungah LALPA a lo lungsen nasa ta hlè a nih” a ta.

22 Chuongchun, lalin a tirhai le Hilkia chu silfen enkoltu Hasra naupa Tokat, Tokat naupa Salum nuhmei, zawlnei Hulda kuoma chun an fe a, chu chungthua chun an va rawn a. Ama chu Jerusalem biel hninaa um a nih. 23 Ama chun an kuomah, “LALPA Israel Pathien chun hieng hin a tih: ‘Ka kuoma hung tirtu cheu kuoma chun hieng hin hril ro: 24 LALPA chun hieng hin a tih: Ngai ta u, hi hmun le a sunga umhai chunga hin sietna intlungtir ka ta, Juda lal hmaa an tiem suok lekhabua chuong trongsie po pohai khom chu intlungtir ka tih. 25 Mi nghatsan a, pathien dang kuomah rimtui raw a, an kuta an siem fawm thilhaia ka lungsenna an cho phawk leiin, hi hmuna hin ka lungsenna chu bun thlang ka ta, sukrè ni naw nih. 26 LALPA thu indon dinga tirtu cheu Juda lal kuoma chun hieng hin hril ro: LALPA, Israelhai Pathien chun hieng hin a tih: 27 Chuong thu i hriethai chun i lungril an suknem a, hi hmun le a sunga chenghai siet ding chungchang thu chu hre a, ka hmaah inphàhnuoi a, i puon pot thlera i trap leiin kei khomin i thu ka lo ngaithlak a. 28 Ngai rawh, i pi le puhai kuomah thruoi ka ti che a, thlamuong taka vui liem ning i ta, hi hmun le a sunga chenghai chunga sietna ka hung intlun ding chu i mitin hmu ve naw ti nih’ tiin hril ro” a ta. Chu thu chu lal kuomah an intlun a.

29 Chuongchun, lal chun mi a tir a, Judai ram le Jerusalema upahai po po chu a ko khawm a. 30 Judai rama mi po po, Jerusalema mi po po, thiempuhai le Levihai le mipui po po, a chin a lien chu LALPA Tempulah a hang fepui a, LALPA Tempula an hmu suok thuthlung bua thu po po chu an hriet ngeiah a tiem suok a. 31 Lal chu a hmunah, ban hrûla chun a ngîr a, chu lekhabua chuong thuthlung thu chu suknghet dingin a lungril po po le thlarau po poin LALPA zui ding le a thupek hai, thupuong hai le thuruot hai chu pom dingin LALPA hmaa chun thu a thlung a.

32 Chu zoah Jerusalema um po po le Benjamin mihai po po chu chuong ang taka um dingin intiemkamna a’n neitir a; Jerusalema umhai chun Pathien, an pi le puhai Pathien thuthlung ang chun an thaw a. 33 Josia chun Israel thlahai hluo ram sunga inthokin milim tirdakumhai po po chu a’n thiel fai vong a, Israel rama umhai po po chu LALPA an Pathien rong a’n bawltir a. Ama dam sung po chun LALPA, an pi le puhai Pathien chu thlathlam loin an zui a.