Nathanin Davida a zil
12
1 LALPA chun Davida kuomah Nathan a tir a. A hung chun a kuomah, “Khaw pakhata hin mi pahni an um a, pakhat chu mi hausa a na, pakhat chu mi rethei a nih. 2 Mi hausa chun beram ruol le bawng ruol a hau ĕm êm a, mi rethei chun beram la chikte an chawk chauh chu a nei a. 3 Chu chu a vâi a, a nauhai leh a chawm tlei a, a fak le dawn ang ang chu an intrawm a, a ângsungah a pom in a, a naunu ang hielin a cheibawl a. 4 Chun, mi hausa chun mikhuol a nei a, a beram ruol le bawng ruol laia mi chu thata thlaithleng siempek nêkin mi rethei beram la tuoi chu a lâkpĕk a, a ina mikhuol hmê ding chun a thatpek a” a ta.5 Chu mipa chunga chun Davida chu nasa takin a lung a sen a, Nathan kuomah, “LALPA hring zing hmingin ka hril, chu thil thawtu chu thi tlâk a nih. 6 Hieng ang thil a thaw lei le lunginsietna a nei naw leiin a beram tuoi chu a lêt liin a rul ding a nih” a ta.
7 Nathan chun Davida kuomah, “Chu pa chu nang hi i nih. LALPA, Israelhai Pathien chun hieng hin a hril: ‘Israelhai lal dingin hriek ka năl che a, Saula kuta inthokin ka san suok che a. 8 I pu in le lohai ka pêk che a, a nuhmeihai chu i ângsungah ka sie a. Israel sunghai le Juda sunghai chu ka pêk che a. Chuonghai chu a tlawm taluo i ti a ni chun a dang khom ka pêk belsa ding che annawm. 9 Ieng dinga LALPA thu chu ngainêp a, a mithmuah thil thra lo i thaw am a na? Hit mi Uria chu kawlhnâmin i sukhlum a, a nuhmei i neipek a. Amon mihai kawlhnămin i that a nih. 10 I mi ngainĕp a, Uria nuhmei chu i nuhmei dinga i lakpĕk leiin tuta inthok hin i inah kawlhnâm inlêng ta’ng a tih’ tiin.
11 “Hi hi LALPA thu chu a nih: ‘Nangma sungkuoa inthok ngeiin i chungah sietna hung intlungtir ka tih. I mithmua ngei i nuhmeihai chu làkpêk ka ti che a, i tuolbawm kuomah pe’ng ka ta, i hmua ngei sŭn pachangah i nuhmeihai chu zàlpui a tih. 12 Nang chun a rûkin i thaw a, kei ruok chun Israelhai po po mithmua ngei sŭn varah ka thaw ding a nih” a ta.
13 Davida chun Nathan kuomah, “LALPA lakah thil suol ka thaw a nih” a ta. Nathan chun, “LALPAN i suolna a lâk hmang ta a, thi naw ti nih. 14 Amiruokchu, hi thil i thaw hin Pathien hrilsietna remchang tak LALPA hmĕlmahai ta dingin i siempek leiin, i laka pieng naupang chu thi ngéi ngèi a tih” a ta. Nathan chun a in tieng a fesan a.
15 In tieng Nathan a’n lawi hnung chun Uria nuhmeiin Davida a hringpek naupa chunga chun LALPAN kut a thlâk a, a hung dam naw a. 16 Naupang ta dingin Davida chun a ngĕnpĕk a. Bu a nghei a, a inah a lût a, zankhuoin truongah a zâl a. 17 A sungkuoa upahai chun kei tho tumin an ngir huol a, sienkhom a tho nuom naw a, an kuomah bu khom a fâk bok nawh. 18 A ni sarinaa chun naupang chu a thi a, Davida siehlawhai chun naupang thi thu Davida kuoma hril an rin a, “Ngai ta u, naupang dam lai hman khan a kuomah thu ei hril a, a ngaithlak nuom naw a, tuhin naupang thi thu chu iengtin am ei hril ngam ta ding? Ama le ama iengtin amanih inlaw el a tih” an ta.
19 A siehlawhai inbiekruk vel dana inthokin Davida chun naupang chu a thi tah ti a hriet a, “Naupang chu a thi ta maw?” a ta, anni chun “A thi tah” an ta. 20 Chu phing leh Davida chu truonga inthokin a tho a, a’n sil a, hriek a’n năl a, a silfen a thlâk a, LALPA inah a fe a, Pathien chibai a bûk a, a in tieng a kir nawk a, fak ding a lam a, an hung thur a, a fâk a. 21 A siehlawhai chun a kuomah, “I thilthaw dan hi iengtizie am a na? Naupang damnaw lai khan bu i nghei a, i trap a, sienkhom naupang a thi a, i tho a, bu dam i fâk ta lem tlat si a!” an ta. 22 Ama chun, “Naupang damnaw lai khan bu ngheiin ka trap hrim kha. Ka lungrilin, ‘Naupang a hung dam ding le LALPAN a mi lunginsiet ding tu am hre thei?’ ka ti a nih. 23 Tu ruok hin chu a thi ta a, ieng leiin am bu ka nghei ta ding? Ka ko kir thei nawk ding am a ni? A kuomah kei chu la fe’ng ka ta, ama chu ka kuom tieng hung kir ta naw nih” a ta.
Solomon a pieng
24 Davida chun a nuhmei Bathseba chu a thlamuon a, a kuomah a lût a, a zălpui a, naupa a hring a, a hmingah Solomon a sak a, ama chu LALPAN a hmangai a. 25 LALPAN a hmangai leiin zawlnei Nathan kuomah a hminga Jedadia saka dingin thu a pêk a.
Davidan Raba a lâk
26 Chuong lai chun Joab-in Amon thlahai khawpui Raba a rŭn a, lal kul chu a lâk a. 27 Joab chun Davida kuoma mi a tir a, “Raba ka rŭn a, an tui lakna hmun khom ka lâk ta a. 28 Tu hin sipai dang po po hung khawm la, a khawpui chu hung inhuol inla, hung la rawh. Chuong naw chun keiin lang ka ta, hming thrat hlaw hlauh rawi ka tih” a ta. 29 Davida chun a mihai po po chu a khâwm a, an inthok suok a, an va rŭn a, an lâk ta a. 30 Amon thlahai milim biek Milkom an inkhumtir rangkachak lallukhum chu an lâk a, chu taka chun lunghlu khom a thrang sa a, a rikzie chu kilogram sawmthum pali lai a nih. Chu chu Davida an inkhumtir a, khawpuia inthok chun râllâk sum tam tak an lâk bok a. 31 A khaw mipuihai chu an man a, thing ăttu dam, lei inlettu dam, thing phŭrtu dam le trêklei siemtu damin a sor a. Chuong ang chun Amon thlahai khuo po poa chun Davidan a thaw a, a sipaihai leh Jerusalem tieng a kir nawk ta a.