Davidan Raba a lâk
20
1 Thrâl lai, indo dinga lalhai an suok lai chun Joab-in a sipaihai a thruoi a, Amonhai ram chu a suksiet a, Raba-ah a fe a, a’n huol a, Davida ruok chu Jerusalemah a um a. Joab chun Rabat chu a bei a, a suksiet vong a. 2 Davida chun an rangkachak lallukhum kilogram sawmthum le palia rik, lunghlua chei chu a lâk a, chu chu Davida an inkhumtir a, khawpuia mi râllâk sum tam tak a lâk bok a. 3 A khaw mipuihai chu a man a, thing âttua dam, lei inlettua dam le thing phûrtua dam a sor tawl a. Chuong ang chun Amon thlahai khuo po poah Davida chun a thaw a. Chu zoah Davida le a sipaihai chu Jerusalem tieng an kir nawk ta a.Filistinhai le indo
4 Chuong hun lai chun Filistinhai leh Gezer-ah an indo nawk a. Chu trum chun Husat mi Sibekai chun mi lien Rafahai thla lai a mi Sifai (Safa) chu a that a, Filistinhai chu an tukdol ta a. 5 Chuong laia an indonaa bok chun Jair naupa Elhanan chun Git mi Goliatha unaupa Lahmi, a fei ngul khom puonkhawngtu tlangkhang tiet zet chawitu chu a that bok a. 6 Chun, Gath hmuna an indonaa chun Rafahai thlaa mi bok, pa lien tak el, kut khing hni ve vea kutpar paruk ve ve le ke khing hnia kepar paruk ve ve, arêngin sawmhni le pali nei, a um a. 7 Ama chun Israelhai a deusaw a, Simea naupa Jonathan, Davida unaupa chun a that a. 8 Chuonghai chu Gath-a Rafa thlahai an na, Davida le a mihai kutah an thi ta vong a nih.