Davida le Betsheba
11
1 Thrâl lai, indoa lalhai an suok hlak huna chun Davidan a mihai le Israel sipaihai po po chu Joab rawiin a tir a, Amon thlahai chu an va sukbohmang a, Raba khuo chu an inhuol a, Davida ruok chu Jerusalemah a um a.2 Zan tieng voi khat chu ni nêma hin Davida chu a lal in chunga chun an văk vĕl a, in chunga inthok chun nuhmei pakhat insil lai hi a hmu a, hmel thra a ti hle a. 3 Davida chun tu am a nih ti zong suok dingin mi a tir a. Mi chun, “Eliam naunu Batsheba, Hit mi Uria nuhmei a nih” a ta. 4 Chu phing leh Davida chun mi a tir a, an hung thruoi a, a lo zălpui a (nuhmei inthieng nawnaa inthoka a’n sukthieng zo hlim a na), a in tieng a fe nawk ta a. 5 Chun, nuhmei chu a hung inrai a, “Nau ka pai” tiin Davida chu a’n hriltir a.
6 Davida chun Joab kuomah, “Hit mi Uria chu ka kuomah hung tir rawh” tiin a’n cha a, Joab chun Uria chu Davida kuomah a’n fetir a. 7 Uria a hung tlung chun Davidan Joab le sipaihai chu iem an chang a, indona iengtin am a fe pei ti thuhai a lo indon a. 8 David chun Uria kuomah, “I inah fe la, i ke zu sawp rawh” a ta. Uria chu lal ina inthok chun a suok a, lal chun thilpek a thon zui nghal a. 9 Amiruokchu, Uria chu lal in kotkhar bula chun a pu siehlawhai lai a riek a, in tieng chun a fe nawh.
10 Uria chu a in tieng a’n lawi nawh ti Davida an hril chun Uria kuomah, “Hla taka inthoka hung i ni naw am a ni? Iem a ta i in tieng inlawi loa i um?” a ta. 11 Uria chun Davida kuomah, “Pathien Bawm le Israelhai le Judahai chu bûkah an um a; ka hotupa Joab le ka pu mihai chu ramah an inkul a, kei ka inah inlawiin, faa dawnin, ka nuhmei kuomah ka zal bîk ding maw? I hringna le i thlarau hringna salin ka hril, chu chu thaw naw top ka tih” a ta. 12 Davida chun Uria kuomah, “Voisun khom hi takah la châm la, zingah i fe chauh ding a nih” a ta, chu ni le a zing chu Jerusalemah a la châm a. 13 Davida chun Uria chu a ko a, a hmaa chun fain a dawn a, a’n ruitir dĕr a. Zan tieng chun a in tieng inlawi loin a pu siehlawhai laia zâl dingin a suok ta a.
14 A zinga chun Davidan Joab ta ding lekhathon a ziek a, Uria chu a’n chawitir a. 15 Chu lekhathona chun Davidan, “Uria hi râl zuolna takah a hmatâwngah inthrangtir unla, an lo that ngei dingin hnung intawlsan ro” tiin a ziek a. 16 Joab-in khuo a’n huol lai chun an ralhai tienga mi huoisen sen umna nia a hrieta chun Uria chu a’n thrangtir a. 17 Khaw sunga mihai chu Joab mihai do dingin an hung suok a, an bei a, Davida mihai ngei khom an thi a, Hit mi Uria khom chu a thi a.
18 Joab chun indo chanchin chu a kimin Davida kuomah a thon a. 19 A mi tir kuoma chun, “Indo chanchin i ripawt zo pha lal a lungsen thut a, 20 ‘Iengti dana chuong anga hnaia chun in va bei am a na? Kula inthokin an lo kăp ding chĕu ti khom in hriet naw maw? 21 Jerubeset naupa Abimelek kha tuin am a that kha? Nuhmeiin bu rawtna lung sǐn kula inthokin a lu chungah a zuk thlăk a, Thebez-ah khan a thi a ni naw am a ni? Iengti dana kul bul ela chun in fe am a na?” a ti chun, “I siehlaw Hit mi Uria khom a thi ve’ ti rawh” tiin a hril a.
22 Chuongchun, a mi tir chu a fe a, a tlung chun Davida kuomah Joab-in hril dinga a ti po po chu a hril a. 23 A mi tir chun Davida kuomah, “Mihai chun an mi hung nor phei a, phŭla chun an mi hung bei a, keinin an khaw lutna kotkhar tlung rakin kan nor kir a. 24 Thal kaptuhai chun i siehlawhai chu kula inthokin an lo kăp a, lal siehlaw threnkhat an thi a, Hit mi Uria khom kha a thi ve a nih” a ta. 25 Davida chun zuolko kuomah, “Joab kuoma chun, ‘Hi hin i lung sukhnuol naw raw se. Kawlhnâm chun a tu el khom a thlei naw a, nasa nawk zuolin khuo chu bei unla, sukse vong ro’ tiin infùi phûr rawh” a ta.