Amnon le Tamar
13
1 Chuong hun lai chun Davida naupa Amnon chun Tamar a ngaizawng a. Tamar chu Davida naupa Absalom farnu a na, nunghak hmel thra tak a nih. 2 Amnon chu a farnu Tamar lei chun damnaw khopin a beidong a; ama hlak chu nunghak thienglâm a ni si a, a chunga thil iemani hang thaw chu a ta dingin thil thei lo tlukin a’n lang a.3 Amnon chun ruol pakhat a hming Jonadab a nei a, ama chu Davida unaupa Simea naupa a na, mi dawha nei tak a nih. 4 Ama chun Amnon kuomah, “Ieng leia nang lal naupa ni si, a ni têla i hmai a zûr tiel tiel am a na? A san i mi hril nuom naw maw?” a ta. Amnon chun, “Ka unaupa Absalom farnu Tamar ka ngaizawng lei a nih” a ta. 5 Jonadab chun, “Va zâl la, damnaw tehlĕm rawh. I pain a hung en phâ che leh a kuomah, ‘Ka farnu Tamar kha hung thei sien, bei fak ding mi hung pe sien la, ka mithmua ngei fak ding mi siempek sien, a kuta mi ngei chu lo fang ka tih’ ti rawh” a ta.
6 Amnon chu a zâl a, a damnaw tehlĕm a. Lalin a hung en chun a kuomah, “Lunginsiet takin ka farnu Tamar hung sien la, ka hmua ngei hin bei inhnik tak siem sien la, a kuta mi ngei chu lo fang ka tih” a ta.
7 Davida chun Tamar kuomah, “I trapa Amnon in tieng fe la, fak ding va siempek raw khai” tia hril dingin lal ina chun mi a tir a. 8 Tamar chu a trapa Amnon ina chun a fe a, ama chu a lo zâl zing a. Tamar chun bei phit a lâk a, a hmet a, Amnon hmua chun beiper a siem a, a ur a. 9 A urna thlenga chun bei chu a va pêk a, sienkhom a fâk nuom naw a. Amnon chun, “Mi po po hin mi suoksan vong raw se” a ta, an suoksan ta vong a.
10 Amnon chun Tamar kuomah, “I kuta mi ngei ka fak theina dingin fak ding chu pindana hin hung la raw leh” a ta. Tamar chun a beiper siemhai chu a trapa pindana chun a chawi lut a. 11 Infaktir dinga a kawl hnaia a va fe chun a lo man a, a kuomah, “Ka farnu, hung zàl ve rawh” a ta. 12 Tamar chun, “Ni lo e, ka trapa. Mi tilui naw rawh. Chuong ang thil chu Israel rama hin thaw ding a ni nawh. Hieng ang thil rilo hi thaw naw rawh. 13 Kei iem chang ka ta? Vantlang hmaah iengtin am ka ngha ngam ta ding? Nang khom iem i ni ding? Israelhai laia mi rilo le mi suola ngai hung ni’ng i tih. Chuleiin, lal be lem la, i mi nei chu sêl chuong naw nih” a ta. 14 Amiruokchu, a thu a ngaithlak nuom naw a, amanu nĕkin a thâ a hrât lem si leiin a suollui a.
15 Chu zoa chun Amnon chun Tamar chu theida taktein a theida nawk si a, a ngaizawng laia a ngaizawngna nêk daiin a theidàna chu a sosâng lem a. Amnon chun, “Tho la, fe hmang dai rawh” a ta. 16 Tamar chun, “Chuong el ding chu ni lo e, hienga indik lo taka i mi’n fetir tum hi ka chunga i thaw nêk khan a thra naw lem hman a nih” a ta. Amiruokchu a thu hril chu a ngaithlàk nuom chuong nawh.
17 Amnon chun ama rongbawltu siehlaw chu a ko a, “Hi nuhmei hi ka kuoma inthokin insuoktir la, kot kal tlat rawh” a ta. 18 A siehlaw chun a’n suoktir a, kot chu a sung tieng a kal a. Tamar chun korfuol mawi taka chei a hâk a, chu chu lal naunu, nunghak thienglâmhaiin an hàk hlak hrim a nih. 19 Tamar chun a lu-ah vut a phul a, a hàk lai korfuol chei chu a pot thlĕr a, a kutin a hmai a hup a, inring taka trap pumin a suok a.
20 A trapa Absolom chun a kuomah, “I trapa Amnon kha i kuomah a hung a ni maw? Ka farnu, trap ta naw rawh, i trapa a ni si a. Hi thil hi tuor na talaw naw rawh” a ta. Tamar chu a trapa Absalom inah mal takin a’n khum hmang ta dai a. 21 Lal Davidan chuong thu a hang hriet chun a lung a sen hle a. 22 Absalom ruok chun Amnon kuomah a sie a thra ieng khom a hril nuom nawh. A farnu a sukhmingsiet lei chun Absalom chun Amnon chu a theidâ hle a.
Absalomin Amnon a that
23 Kum hni a’n voi hnungin Absalom chun a beram hmul vawtuhai umna, Efraim-hai ramri bul, Baal Hazor-a chun lal nauhai po po a fiel a. 24 Absalom chu lal kuomah a fe a, “Ngai ta, i siehlaw hin beram hmul a’n vawtir a, lal le a siehlawhai chu i siehlaw thil lawmnaa chun an hung ve thei hrăm naw ding maw?” a ta.
25 Lal chun, “Ni lo e, ka naupa, kan rêng chun ni lo e, sukrik taluo rawi kan ti che” a ta. Absalom chun a ngên raka chu a nuom chuong naw a, sienkhom mal a sawm a. 26 Absalom chun, “Chuonga i ti a ni si chun ka unaupa Amnon bek hi chu hung hràm raw se” a ta. Lal chun, “Ieng leiin am a hung bik ding?” a ta. 27 Absalom chun a ngèn tlat leiin Amnon le lal nau danghai chu a’n fetir a.
28 Absalom chun a siehlawhai kuomah, “Ngai ro, Amnonin uoiin a’n ruia a hlim lai tak, ‘Amnon kha vaw hlum ro’ ka ti phâ leh that ro. Trì dêr naw ro. Thu ka pêk cheu a ni naw am a ni? Hrat tak le huoisen takin um ro” tiin thu a pêk diem a. 29 Chuong ang chun Absalom siehlawhai chun Amnon chungah an thaw a. Lal nau danghai po chu an tho a, an sabengtung chunga seng an chuong a, an tlan hmang ta a.
30 Lampuia an la thang zing lai chun Davida kuomah, “Absalomin i naupahai po po a that a, pakhat khom hlà a nei nawh” tiin an hril a. 31 Lal chu a tho a, a silfenhai a pot thlĕr a, truongah a zâl a; a siehlawhai po po khomin an silfenhai pot thlêrin a bula chun an ngìr a. 32 Sienkhom Davida unaupa Simea naupa Jonadab chun, “Ka pu chun lal nau tlangval po po a that vong ti an hril hi ring naw raw se, Amnon chauh a nih a thi. A farnu Tamar a suolluia inthok khan hieng ang hin thaw a tum hrim a nih. 33 Chuleiin pu, lal chun lal naupahai po po an thi vong ti thuthang hi ring naw raw se, Amnon chauh a nih a thi chu” a ta.
34 Absalom ruok chu a tlân hmang a. Chuong lai chun lal vengtu tlangval chu a hang ngha vel a, a ngirna thlang tieng tlâng pang lampuia mi tam tak hung thla chu a hmu a, lal kuoma chun a zu fe a, “Horanaim tieng tlâng panga mi tam tak hung thla ka hmu” tiin a hril a. 35 Jonadab chun lal kuomah, “En ta la, i siehlawin a hril ang char khan lal nauhai chu an hung tlung ta hi” a ta. 36 A hril zo charin lal nauhai chu an hung lut a, inring takin an trap a, lal khom chu a siehlawhai le chun lung na takin an trap a.