2 Sim tienga an ramri chin chu Tuipui Thi sim tienga litengsawl a na, 3 chu taka inthok chun Ainuvet Kawn (Akrabim) ah a tan tung a, Zin thlalèrah fe peiin Kadesh-barnea sim tieng a va tan a. Chu zoah Hezron fe thlengin Adar-ah a kai a, Karka a hêl kuol a. 4 Chu zoa chun Azmon tieng fein Aigupta ruomah a lut a, tuifinrietah a tawp a ni. Chu chu sim tienga an ramri chin ding chu a nih.

5 Sak tieng ramri chu Jordan vadung suo, Tuipui Thi chen a nih.

6 Hmar tieng ramri chu Jordan vadung suoa intranin Bet Hogla-ah a kai tung a, Bet Araba hmar tieng a pan pei a, Reuben naupa Bohan lungphun tieng a kai tung a, 7 Akor ruoma inthokin Debir-ah a fe tung a, hmar tieng inherin Gilgal-ah a lut a, chu chu sim tieng panga ruom Adumim Kawn epa um a nih. Chu taka inthoka fe peiin Ensemes tuikhurah a tan a, Enrogel-ah a suok a. 8 Ramri chu Hinom ruomah fe tungin Jebu-hai ram sìr sim tieng, Jerusalem chu fe thlengin a kai tung a, Hinom thlang tieng ruom bula um tlang sipa chun a kai a, hmar tieng Refaim ruom tawp chen a fe a. 9 Tlang sîpa inthok chun ramri chu Neftoa tuikhurah a fe thla a, Efron tlanga khawpuihai a va paw a, chu taka inthok chun Bala (Kiriat Jearim) tieng a kawi thla a. 10 Chu zoah tlâk tieng inherin Bala-a inthokin Seir tlang a pan a, Jearim tlang (Kesalon) hmar tieng pangpêr hrawin, Bet Semes ah a fe thlak a, Timna a tan tlang a. 11 Chu taka inthok chun Ekron hmar tieng pangpêr chu hrawin Sikeron tieng a’n her a, Bala tlang a hraw a, Jabnel a tlung a, tuifinrietah a tawp.

12 Thlang tieng ramri chu Mediterranean Tuipui kam zar zar a nih. Chuong ang chu an sungkuo zir peia Juda thlahai ramri huom sung chu a nih.

13 A kuoma LALPAN thu a pĕk angin, Josua chun Jefune naupa Kaleb chu Juda thlahai lai chun chanpuol a siempek a, chu chu Kiriat Arba, Hebron an ti bok chu a nih. Arba chu Anak pu a nih. 14 Kaleb chun Anak naupasal pathum Sesai, Ahiman le Talmai hai chu Hebrona inthokin a hnot suok a. 15 Chu taka inthok chun Debir khuo, kha hmaa Kiriat Sefer tia an ko hlaka mihai chu a rŭn a. 16 Kaleb chun, “Hi khuo latú tù chu ka naunu Aksa inneitir ka tih” a ta. 17 Kaleb unaupa Kenaz, chu naupa Otniel chun a lâk a, Kaleb chun a naunu Aksa chu a’n neitir ta a. 18 Otniel inah Aksa a hung inlawi chun, a pa kuoma ram hni dingin a pasal chu a’n fui a. A sabengtung chunga inthoka Aksa a hung trum chun Kaleb-in, “Iem ka thawpek ding che?” tiin a lo indon a. 19 Ama chun, “I ditsakna vochuom ka hni a nih. Sim tieng ram i mi pĕk ta si hin chu tuikhur khom mi pe sa ve rawh” a ta. Chuongchun, tuikhur chuonchung le tuikhur chuonhnuoi chu a pêk sa a.

20 An sungkuo dungzui peia Juda thlahai rochan chu hieng ang hin a nih:

21 Edom ramri hrŭl, sim tawp monga Juda hnamhai khawpui chang chu Kabzel, Eder, Jagur, 22 Kina, Dimona, Adada, 23 Kedes, Hazor, Itnan, 24 Zip, Telem, Bealot, 25 Hazor Hadata, Keriot Hezron (chu chu Hazor), 26 Amam, Sema, Molada, 27 Hazar Gada, Hesmon, Bet Pelet, 28 Hazar Sual, Beerseba, Biziothia, 29 Bala, Iim, Ezem, 30 Eltolad, Kesil, Horma, 31 Ziklak, Madmana, Sansana, 32 Lebaot, Silhim, Ain le Rimon, a rêngin khaw sawmhni pakuo le an khawperhai an nih.

33 Thlang tieng tlâng thruta khuohai chu: Estaol, Zora, Asna, 34 Zanoa, En Ganim, Tapua, Enam, 35 Jarmut, Adulam, Soko, Azeka, 36 Saraim, Adithaim le Gedera (Gederothaim), khaw lien sawm le pali le an khawperhai;

37 Zenan, Hadasa, Migdal, Gad, 38 Dilean, Mizpa, Joktheel, 39 Lakis, Bozkat, Eglon, 40 Kabon, Lahmas, Kitlish, 41 Gederot, Beth Dagon, Nama le Makeda, khaw lien sawm le paruk le an khawperhai;

42 Libna, Ether, Asan, 43 Ipta, Asna, Nezib, 44 Keila, Akzib le Maresa, khaw lien pakuo le an khawperhai;

45 Ekron le a sevela lobuk le khawper hai: 46 Ekron thlang tieng chu Asdod hnaia mi po po le an khawper hai; 47 Asdod khaw sevela lobuk le khawper hai; Gaza le a sevela lobuk le khawper hai, Aigupta Ruom chen le Mediterranean Tuipui kam chenin a nih.

48 Chun, tlang ram tieng chu Samir, Jatir, Soko, 49 Dana, Kiriat Sana (chu chu Debir), 50 Anab, Estemo, Anim, 51 Gosen, Holon, le Gilo, khaw lien sawm pakhat le an khawperhai;

52 Arab, Duma, Esan, 53 Janim, Bet Tapua, Afeka, 54 Humta, Kiriat Arba (chu chu Hebron) le Zior, khaw lien pakuo le an khawperhai;

55 Maon, Karmel, Zip, Juta, 56 Jezreel, Jokdeam, Zanoa, 57 Kain, Gibea le Timna, khaw lien sawm le an khawperhai;

58 Halhul, Bet Zur, Gedor, 59 Marat, Bet Anot le Eltekon, khaw lien paruk le an khawperhai;

60 Kiriat Baal (chu chu Kiriat Jearim) le Raba, khaw lien pahni le an khawperhai a nih.

61 Thlalĕr tieng chu Bet Araba, Midin, Sekaka, 62 Nibsan, Chi Khawpui le En Gedi, khaw lien paruk le an khawperhai a nih.

63 Juda hnamhai chun Jerusalema um Jebuhai chu an hlu suok vong naw a, tu chen hin Jebuhai chu Judahai leh an la chèng hmunkhat zing a nih.