Efraimhai chan ding
16
1 Josefa thlahai chanpuol chu Jeriko zawn, Jordan vadunga inthoka thlalĕr hnai tieng, sak tieng Jeriko tuihmunah a suok a, Jerikoa inthok chun tlang ramah Bethel (chu chu Luz) chenin a kai tung a, 2 Bethela inthok chun Atarot-a Ark-hai ram a fe thleng a, 3 chu taka inthok chun Jaflet-hai ram tieng panin thlang tieng a’n her thla a, Bet Horon chuonhnuoi chen a fe a, chu zoah Gezer tieng a fe a, tuifinrietah a suok a. 4 Chu po chu Manase le Efraim, Josefa thlahai chun an chanpuola an rochung chu a nih.5 An sungkuo tam dan zir peia Efraim thlahai ramri chu hieng ang hi a nih: sak tienga an chanpuol ramri chu Atarot Adar-a inthokin Bet Horon chuonchungah, 6 tuifinriet chenin a fe a. Chun, Mikmethat hmar tieng fein, Tanat Silo panin sak tieng an her a, sak tienga Janoa chu a tan tlang a. 7 Janoat-a inthok chun Atarot le Naara-ah a fe thlàk a, Jeriko a hraw a, Jordan vadungah a suok a. 8 Tapua-a inthokin ramri chu thlang tieng Kana Korruomah a fe thlak a, tuifinrietah a suok a. Chu chu an sungkuo tam dan zir peia Efraim thlahai chanpuol ram chu a nih. 9 Manase thlahai chanpuol sunga Efraim thlahai chanpuol dinga ruot hrang khawpuihai le an khawperhai khom a thrang sa bok.
10 Chun, Gezer-a um Kanan mihai chu an hnot suok vong naw leiin, tu chen hin sinthawa sor lui dingin Efraim mihai lai an la um zing a nih.