Jordan thlang tieng an insem dan
14
1 Thiempu Eleazar le Nuna naupa Josua le Israel pahnam tin luhaiin Israel thlahai kuoma an rochan dinga pek Kanan ram an sempek dan chu hieng ang hin a nih. 2 Mosie kuoma LALPAN thu a lo pĕk tah angin, hnam kuohai rochan ding seng chu thrum vawrin an sem a. 3 Mosie chun hnam hni le hnam zatve ta dingin Jordan suo tieng rochan a lo pêk ta a, Levi chihai ruok chu anni lai chun rochan ding a pêk ve nawh. 4 Josefa nauhai chu hnam hniin an hung um ta a, chu chu Manase le Efraim an nih. Khawpuia umhmun khuorna ding le khaw kawla ran tlatna ding hmun ti chauh naw chu Levi chihai chun rochan an nei ve nawh. 5 LALPAN thu Mosie a pĕk ang tak khan Israel thlahai chun ram chu an insem a nih.Kaleb-in Hebron a chang
6 Juda thlahai chu Gilgal khuoah Josua kuomah an fe a. Keniz mi, Jefune naupa Kaleb chun a kuomah, “Kades-Barnea LALPAN Pathien mi Mosie kuoma eini pahni chungchang a hril kha i hriet a. 7 LALPA siehlaw Mosien Kades-barnea inthoka ram enthla dinga a mi tir khan kum sawmli mi ka ni ta a, ka lungril char chu a kuomah ka ripawt a. 8 Amiruokchu, ka fepui ka unau danghai khan mipui lungril an sukhnuolpek a, kei ruok chun LALPA ka Pathien chu lungril takin ka pom tlat a. 9 Kha ni khan inkhâm meuin Mosie chun ka kuomah, ‘LALPA ka Pathien chu lungril taka i zui leiin, i kea i sir ram taphot chu kumkhuoa nang le i nauhai rochan ni ngêi ngĕi a tih’ tiin a mi hril a.
10 “Ngai ta, hi thu hi Mosie kuoma a hril hnungin, thlalĕra Israelhai an invăk sung po po khan LALPA chun thu a tiem angin, kum sawmli le panga damin a mi la hla a, tu hin kum sawmriet pangaa upa ka lo ni ta hi. 11 Chuong sa khom chun, Mosien a mi tir suok ni ang khan voisun khom hin ka la hrât zing a, râl beia suok ding khomin kha hma ang bok khan thahrui ka la nei zing a nih. 12 Kha nia LALPAN pĕk a mi tiem, hi tlangram hi tu hin mi pe ta la. Nang khoma kha truma i hriet ang ngei khan, an khawpuihai chu Anakhai chêngna, kul ropui taka inhuon khup a ni kha. Amiruokchu, aman a ti angin, LALPA thrangpuinain anni chu hnot suok ka tih” a ta.
13 Josua chun Jefune naupa Kaleb chu mal a sawm a, Hebron khuo chu a rochanah a pêk a. 14 Chuongchun, Keniz mi Jefune naupa Kaleb chun LALPA, Israel Pathien chu lungril taka a zui tlat leiin, chu nia inthok chun Hebron khuo chu a rochan a hung ni tah a nih. 15 Hebron chu Anak mihai laia mi ropui tak Arba hming chawiin Kiriat Arba ti a ni hlak. Chu taka inthok chun a ram chu indona laka inthokin a hung ralmuong ta a.