3 Juda thlahai chun an unau Simeon thlahai kuomah, “LALPAN a mi pĕk rama chun Kanan mihai mi hang dopui unla, nangni khom in ram chanpuola umhai in bei pha leh dopui ve’ng kan ti chêu” an ta, chuongchun Simeon thlahai chu an inthok suok ve a.

4 Judahai chun an hang do a, Kanan mihai le Periz mihai chu LALPAN an kutah a pêk a, Bezek khaw mihai chu mi sing khat an that a. 5 Bezeka chun Adoni-Bezek a lo um a, an bei a, Kanan mihai le Periz mihai chu an tukdol a. 6 Adoni-Bezek chu a tlanse a, sienkhom an hnot phak a, an man a, a kutpui le kepui an tanpek a. 7 Adoni-Bezek chun, “Lal sawmsari kutpui le kepui ka tanpekhaiin ka dawkan hnuoiah ka bu mal tla an rût hlak a, ka thaw ang charin Pathienin a mi thungrul ve tah a ni hih” a ta. Ama chu Jerusalem-ah an thruoi a, chu taka chun a thi a.

8 Juda thlahai chun Jerusalem an hang bei a, an lăk a, khawpui chu kawlhnâmin an sàm a, an raw bok a. 9 Chu hnung chun tlang ram le sim tieng le tlâk tieng pang tlâng thruta Kanan mihai chu bei dingin Juda thlahai chu an fe thla a. 10 Hebron (Kiriat Arba an ti bok) a Kanan mihai chu an va bei a, Sesai hai, Ahiman hai le Talmai hai chu an that a.

11 Chu taka inthok chun Debir khuo, kha hmaa Kiriat Sefer an ti hlak chu an rŭn a. 12 Kaleb chun, “Kiriat Sefer beia latú tù chu ka naunu a nuhmei dingin pe’ng ka tih” a ta. 13 Kaleb sangpa Kenaz naupa Otniel chun a lâk a, Kaleb chun a naunu Aksa chu nuhmeiah a’n neitir a. 14 Ni khat chu Otniel kuomah Aksa chu a hung a, a pa kuoma ram hni sa dingin a pasal chu a’n fùi a.^a A sabengtung chunga inthoka Aksa a hung trum chun Kaleb-in, “Iem ka thawpek thei ding che?” tiin a lo indon a. 15 Ama chun, “Thil hni che ka nuom a nih. Sim tieng ram i mi pek ta si hin chu tuikhurhai khom hi mi pe sa law law rawh” a ta. Kaleb chun tuikhur chuonchung le tuikhur chuonhnuoi chu a pêk a.

16 Mosie tarpu Ken mi thlahai chu Tûm khawpuia inthok chun Juda thlahai leh sim tienga Judai ram thlalĕr, Arad kawla chun an inson tung a. 17 Judahai chu an unaupa Simeon thlahai leh an inthok suok a, Zefat khuoa um Kanan mihai chu an hang bei a, an khawpui an suksiet vong a. Chuleiin chu khawpui hminga chun Horma^b an inbŭk a. 18 Juda thlahai chun Gaza le Askelon le Ekron khawpui, mania rambung nei seng chu, an lâk bok a.

19 LALPA chu Judahai kuomah a um a, tlangrama chênghai chu an hnot hmang vong a, phairuoma chênghai ruok chu thir tawlailir nei an ni leiin an hnot suok thei nawh. 20 Mosien thu a lo tiem tah angin, Hebron khuo chu Kaleb an pêk a, chu taka mi Anak naupahai pathum chu a hnot suok a. 21 Benjamin thlahai chun Jerusalem hluotu Jebu-hai chu an hnot suok naw leiin, Jebu-hai le Benjamin thlahai chu tû chen hin Jerusalemah an la chĕng hmunkhat zing a nih.

22 Josefa sungkuohai khom Bethel bei dingin an inthok suok a, anni chu LALPAN a umpui a. 23 Josefa sungkuohai chun enthlatu ding Bethela chun mi an tir a (Bethel hming hmasa chu Luz a nih). 24 Enthlatuhai chun khaw sunga inthoka hung suok mi pakhat hi an hmu a, a kuomah, “Khawpui sung lutna mi hril la, i chungah thra takin thaw’ng kan tih” an ta. 25 Khawpui sung lŭtna chu a hril a, chuongchun kawlhnâmin khuo chu an bei a, chu mipa le a sunghai ti chauh naw chu tu khom damin an hlà nawh. 26 Ama chu Hit-hai ramah a’n pĕm a, khuo a siem a, a hmingah ‘Luz’ a’n bŭk a, tu chen hin chu hming chu a la put a nih.

27 Khuo hieng Bet San hai, Tanak hai, Dor hai, Ibleam hai, Megido hai le an khawpera chêng Kanan mihai chun a ramah um zing an tum tlat leiin Manase hnamhai chun an hnot suok tawl nawh. 28 Israelhai an hung hràt hnung khomin Kanan mihai chu sinthawa sor dingin an inumtir a, an hnot suok fâi vong ta nawh.

29 Efraim hnamhai chun Gezer khuoa Kanan mihai chu an hnot suok naw a, Gezer khuoa chun anni lai an chĕng ve ta lem a nih.

30 Zebulun hnamhai khomin Kitron le Nahalol khuoa Kanan mihai chu an hnot suok bîk bok nawh; Kanan mihai chu sinthawa sor dingin anni lai an um ta zing a nih.

31 Aser hnamhai chun Ako, Sidon, Ahlab, Akzib, Helba, Afek le Rehob khuoa Ken mi umhai chu an hnot suok nawh: 32 hieng lei hin Aser hnamhai chu Kanan mihai lai an um ta lem a nih.

33 Naftalia hnamhai chun Bet-semes khuo le Bet-anat khuoa um hai chu an hnot suok nawh; chu rama um Kanan mihai lai chun an chĕng ve a, Bet-semes le Bet-Anat khuoa umhai chu sinthawa sorah an hmang ta lem a nih.

34 Amor mihai chun Dan hnamhai chu tlangram tieng an hnot tom vong a, phairuom tienga an hung tlăk thlăk an phal nawh. 35 Heres tlang le Aijalon le Salbim khuoa hai Amor mihai chun thrang an khaw nghet tlat a; amiruokchu Josefa sungkuo an hung hrât pei hnung chun sinthawa sor dingin an hung hmang tah a nih. 36 Amorhai ramri chu Ainuvet Kawn (Akrabim) a inthoka Sela le a khêl ram chen a nih.