RORELTUHAI
Thuhma
Rorêltuhai lekhabu hi Thuthlung Hlui Baibul ei hmang laia bu sarina, bung 21 le châng 618-a sei a nih. Judahai ‘Talmud’-a chun Samuel ziek nia a hril laiin, threnkhat chun Aron tupa Finehas amanih Hezekia amanih ziek ni dingin an ring a, threnkhat ruok chun Samuel thu lak khawm, Nathan le Gad siem rem niin an ngai bok. A thren nawk chun Josua-a inthoka Lalhai 2 chen ziektu, Deuteronomist-hai ziek niin an ngai. Hi lekhabuin a huop sung chu kum zathum chuong a nih.
Israelhai chu Kanan ramah Josua-in a thruoi lut a. Kum 1375 B.C vela Josua a thi chun (kum 1200 B.C vela thi ni dinga sût pawl khom an um) ram lak ding tam tak la um sien khom thruoitu lien an nei ta naw leiin Israel pahnam tin chun mani ning ningin hma an nor a, an hung hmuingil met leh Pathien an theinghil a, suolnaah inhnelin hnam dang pathienhai an biek a. An suolna leiin Pathienin a nghatsan a, hnam dang hnawchĕpna hnuoiah an lŭt a. An bei a dong tawpkhawk phâ leh Pathien an ko a, sansuoktu ding mi a pêk a. Chuonga sansuoktu mi a pek- Otniel, Ehud, Samgar, Debora le a thrangpuitu Barak hai dam, Gideon le a thrangpuitu Abimelek hai dam, Tola, Jair, Jeftha, Ibzan, Elon, Abdon le Samson-hai dam chu ‘Rorêltuhai’ tia ko an ni a, chu chu a bu hmingah a hung put ta pei a nih. ‘Thruoituhai’ tiin Baibul inlet thar threnkhata chu an sie. Hi lekhabua hin Josua thia inthoka Samuel hung inlang hun chena Israelhai khawvel inlumlet dan chanchin tlangpui thu a chuong.
Hieng hun laia an ngirhmun chieng le tawi fel taka hrilna chu bung 17:6, “Chuong lai chun Israel ramah lal an la um naw a, mi tinin mani thra tizawng zawngin an thaw seng a” ti hi a nih. Rorêltuhai lekhabua hin mi mal le hnam kalchawina kawngah inchûk ding a tam êm êm a, Pathien nghatsan le Pathien mi nghatsan triumzie chieng taka hmu thei a nih.
A thu tlângpui
Josua thi chena thil tlunghai (1:1-2:10)
Rorêltuhai chanchin (2:11-16:31)
Thil tlung dang dang (17:1-21:25)