Moab rama LALPA thuthlung
29
1 Horeb tlanga Israelhai kuoma thuthlung a pĕk băk khom Moab ramah thuthlung pe belsa dingin LALPAN Mosie a hril a. 2 Mosie chun Israel mipui chu a ko khawm a, an kuomah, “Mit ngeiin Aigupta rama Faraw le a hnuoia thoktu po po le a ram pum chunga LALPA thilthaw kha in hmu a. 3 In hmu angin, fiena râpthlak tak tak, inchikna mak tak tak le thil mak ropui tak tak a thaw a ni khah. 4 Amiruokchu, voisun chen hin LALPAN hriet thiemna lungril dam, hmu fie theina mit dam le hriet theina nakawr dam a la pêk naw chêu. 5 Kum sawmli hiel thlalĕra ka thruoi sung chêu khan in silfenhai in hăk chul naw a, in pheikhokhai khom in la bun triek bok nawh. 6 Bei in făk naw a, uoiin amanih zu dang amanih khom in dawn bok nawh. Hieng hi LALPA chu in Pathien a nizie in hrietna dinga ka thaw a nih.7 “Chun, hi hmun in hung tlung hin Hesbon lal Sihon le Basan lal Og hai chu mi do dingin an hung inthok a, anni chu ei lo hnè a. 8 An ram chu ei làkpèk a, Reuben hnam le Gad hnam le Manase hnam zatve hluo dingin ei pĕk a. 9 Chuleiin, in thilthaw po poa in hmuingil theina dingin thuthlung ka pĕkhai chĕu hi pom unla, zăwm ro.
10 “Voisun hin in rêngin, in hnam thruoitu luhai, upahai le hotuhai dam, 11 nu le nau, ram dang mi in umpuihai, thing phurtu le tui chawituhai dam chenin LALPA in Pathien hmaah in hung a. 12 LALPA in Pathienin in kuoma inkhâm meua a namnghet, thuthlung chu thlungpui dingin voisun hin hi taka hin in hung ngìr a; 13 in thlatu Abraham hai, Isaak hai, Jakob hai kuoma le nangni kuoma a lo tiem tah anga in Pathien a ni theina dingin, ama mi ni dingin a namghet chêu a nih. 14 Hi inkhâmna le thuthlungna hi nangni voisuna LALPA ei Pathien hmaa ngirhai le chauh siem a ni naw a, 15 voisuna ei kuoma la um ve lohai ta ding khoma siem a nih.
16 “Aigupta rama ei khawsak dan le hnam danghai pal tlanga hi hmun ei hung tlung danhai chu nangni ngeiin in hriet. 17 Anni rawi thil kol tirdakum, thing le lung le tangkaruo le rangkachaka siem milimhai khom in hmu ta kha. 18 Voisuna nangni laia mi pasal amanih, nuhmei amanih, sungkuo amanih le hnam amanih tu khom chuong hnamhai pathien chu be dinga LALPA in Pathien nghatsan in um nawna dingin fimkhur ro; chuong anga tûr khä paitu chun nangni lai zung an kei nawna dingin fimkhur bok ro.
19 “Voisuna inkhâmna thu ngaithlatuhai lai hin, lulul taka mani lampui hraw zing sia iengkim tluong dinga lungrila ngaitu an um nawna dingin fimkhur ro. Chu chun ram hnawng le ram trawl chungah sietna intlun a tih.a 20 Chuong ang mi chu LALPAN ngaidam naw ni a, a lungthîkna sosang chun hlieu a ta, hi lekhabua chuong trongsie po po chu a chungah tla’ng a ta, a hming chu vankhup hnuoia inthokin LALPAN thâi bo a tih. 21 Hi Dân Bua chuong trongsie inphurna thuthlung po po dungzuiin, ama chu Israel hnamhai laia inthokin LALPAN thlûr bing a ta, sietnain inhnottir bok a tih.
22 “In hnunga la hung zuitu in nauhai le hla taka inthoka hung ram dang mihai chun sietnain hi ram a tlàkbuok dàn le hri le hraia LALPAN a hrem dànhai chu la hmu’ng an tih. 23 A ram pum chu chi raw chang le kât ang el, ieng khom chìng thei lona, ieng khom mawng thei lona, hlobet takngiel khom a mawng nawna ramah inchang a tih. LALPA lungsen sosânga a suksiet Sodom le Gomora le Adma le Zeboim hai ang chie ni’ng a tih. 24 Hnam tinin, “Ieng leia hi ram hi hieng lawma LALPAN a thaw el am a na? Hieng lawma ieng leia a lungsen a sosâng am a na?” la ti’ng an tih. 25 Chuongchun, mihaiin, “Aigupta rama inthoka a thruoi suok laia a thuthlung, an pi le pua inthoka LALPA an Pathien thuthlung chu nghatsana, 26 pathien dang, an hriet ngai lo pathienhai, aman a ruot ni lohai rong chu bawla an biek lei a nih. 27 Chuleiin, hi lekhabua chuong trongsie po po chu hi ram chunga intlungtir dingin LALPA lungsen chu a chok a nih. 28 A lungsen nasa tak leiin LALPA chun anni chu an rama inthokin a pot suok vong a, ram dangah a dĕng lut tawl a nih, tuta an um ang hin” la ti’ng an tih.
29 “Thil inthuphai chu LALPA ei Pathien tâ a na, thil puong suoka umhai ruok chu, hieng dàn thuhai po po hi ei zawm theina dingin, kumkhuoa eini le ei thlahai tà a nih.