Lung phĕka dàn ziek
27
1 Chun, Mosien Israel upahai leh, mipuihai kuomah, “Voisuna thupêk ka pĕkhai chĕu hi zawm ro. 2 Jordan vadung in kăn nia LALPA in Pathienin a pĕk chêu ram in lŭt pha chun, lung lien tak tak phun unla, lung chărnain chăr khum ro. 3 LALPA in Pathienin in pi le puhai kuoma pĕk a tiem chêu ram, nenetui le khuoizu luongna rama in lut pha chun hieng dan thuhai hi lung phĕka hai chun ziek thla ro. 4 Jordan vadung in kăn pha chun, voisuna thu ka pĕk ang chĕu hin, Ebal tlangah lunghai hi phun unla, chinaiin zût năm ro. 5 Chu taka chun LALPA in Pathien ta dingin lungin maichăm siem ro. A siemna dingin thîr hmangruo hrim hrim hmang naw ro. 6 LALPA in Pathien maichăm chu ram lung hmangin siem unla, LALPA in Pathien kuomah pumraw thilhlân inhlăn ro. 7 Inremna thilhlăn inhlăn bok unla, chu taka chun fain LALPA in Pathien hmaah hlim takin in um ding a nih. 8 Chun, lungphuna hai chun hieng dàn thu po po hi fie takin in ziek ding a nih” tiin thû a pêk a. Ebal tlànga inthoka trongsie
9 “Mosie chun, thiempu Levi thlahai leh Israel mi po po kuomah, ‘Aw Israel mihai, ngun takin ngaithla ro. Voisun hin LALPA in Pathien mihai in hung ni ta a. 10 Chuleiin, LALPA in Pathien thu chu awi unla, voisuna thupêk le dàn ka pĕkhai chĕu hi zăwm ro” a ta. 11 Chu ni chun Mosien mipuihai chu thu a pêk a:
12 “Jordan vadung in kăn phâ leh mipuihai malsawm dingin Gerizim tlangah hieng hnamhai hi an ngǐr ding a nih: Simeon, Levi, Juda, Isakar, Josefa le Benjamin. 13 Chun, trongsie inphur dingin hieng hnamhai hi Ebal tlangah an ngǐr ding a nih: Reuben, Gad, Aser, Zebulun, Dan le Naftali.
14 “Levihai chun rawl inring takin mipuihai kuomah hieng thuhai hi an insam ding a nih:
15 “Kut themthiemna hmanga LALPA ta dinga tirdakum milim kertu le sungtu le chu chu arûka betu taphot chu trongsephurin um raw se” tîng an ta, mipui po po chun “Amen” an lo ti ding a nih.
16 “A nu le pa inza nawtu taphot chu trongsephurin um raw se” tîng an ta, mipui po po chun “Amen” an lo ti ding a nih.
17 “A tuolbawm ramri sontu taphot chu trongsephurin um raw se” tîng an ta, mipui po po chun “Amen” an lo ti ding a nih.
18 “Lampuia inthoka lampui loa mitdel thruoi pêngtu taphot chu trongsephurin um raw se” tîng an ta, mipui po po chun “Amen” an lo ti ding a nih.
19 “Ram dang mihai, fahrahai le hmeithaihai ro indik lo taka rêlpêktu taphot chu trongsephurin um raw se” tîng an ta, mipui po po chun “Amen” an lo ti ding a nih.
20 “A pa khum inza loa a pa nuhmei zălpuitu taphot chu trongsephurin um raw se” tîng an ta, mipui po po chun “Amen” an lo ti ding a nih.
21 “Ran ieng khom rǐmtu taphot chu trongsephurin um raw se” tîng an ta, mipui po po chun “Amen” an lo ti ding a nih.
22 “A farnu amanih, a pa naunu amanih, a nu naunu amanih zălpuitu taphot chu trongsephurin um raw se” tîng an ta, mipui po po chun “Amen” an lo ti ding a nih.
23 “A tarpi zàlpuitu taphot chu trongsephurin um raw se” tîng an ta, mipui po po chun “Amen” an lo ti ding a nih.
24 “Arûka tuolbawm thattu taphot chu trongsephurin um raw se” tîng an ta, mipui po po chun “Amen” an lo ti ding a nih.
25 “Poi tawk lo mi thatna dinga thamna latu taphot chu trongsephurin um raw se” tîng an ta, mipui po po chun “Amen” an lo ti ding a nih.
26 “Hi dan thuhai chel nghet nawtu taphot chu trongsephurin um raw se” tîng an ta, mipui po po chun “Amen” an lo ti ding a nih.