2 “LALPA in Pathienin a pĕk chêu in umna khaw lai khom nuhmei amanih pasal tu khom Pathien thuthlung bawsetu, LALPA mithmua suol thawtu, 3 ka thupêk kala pathien danghai betu le an rongbawltu le nisa amanih, thla amanih, vana arasi amanih betu an um ti an hril chêu chun ngun takin indon chieng ro. 4 Chuong ang thil tirdakum thaw chu Israel ramah an um ngĕi ti in hriet chieng chun, 5 thil suol thawtu pasal amanih nuhmei amanih chu kul kotkhar puo tieng thruoi suok unla, lungin dêng hlum ro. 6 Hrepuitu pahni amanih pathum baua inthoka thu inchieng hnunga sukhlum ding a na, hrepuitu pakhat bau chaua inthok chun tu khom sukhlum ding a ni nawh. 7 A hrepuituhai chun sukhlum ding chungah kut thlâk hmasa’ng an ta, chu zoah mipuiin. Chuong ang chun nangni laia inthokin suol chu in inthiel fai ding a nih.

8 “Thisen insuo thua dam, inkhingna thua dam le invuokna thua dam nangni rêl dinga thu khir taluoa in hriet taphot chu LALPA in Pathienin hmun a la ruot dinga chun fepui ro. 9 Thiempu Levihai le rorêltuhai kuomah fe unla, râwn unla, anni chun thu sukthluk dan ding lo kawkhmu’ng an ti chêu. 10 LALPAN hmun a la ruot dinga an thu tlŭkna ang chu zuiin, an kawkhmu dan chêu ang chun fimkhur takin thaw ro. 11 Thu sukthlŭk dàn an lo zirtir chêu le rorêl dàn an lo hril chêu ang takin thaw unla, chang tieng amanih voi tieng amanih pètsan naw ro. 12 LALPA in Pathien hmaa rongbawl hlak thiempuhai le rorêltuhai inzà nawtu chu in sukhlum ding a nih. Israelhai laia inthokin suol chu inthiel fai ro. 13 Chu chu mi po poin hrieng an ta, trìng an ta, inzà naw ngam naw ni hai.

14 LALPA in Pathien pêk chĕu ram chu tlung a, hluo a, in va um pha, ‘Ei kawl le kienga hnamhai ang bokin lal nei ve’ng ei tiu’ in ti huna chun, 15 LALPA in Pathienin a thlang ngei chu lalah in nei ding a nih. Nangni unau laia mi a ni ngĕi ding a nih. In unau Israel mi ni lo, hnam dang mi chu nangni optu dingin in sie ding a ni nawh. 16 Chu bâkah, lal chun ama ta dingin sakor tam tak a nei ding a ni naw a, sakor zu la dingin Aigupta ramah mi a tir kir ding a ni bok nawh. LALPA chun in kuomah, “Tuta inthokin chu hmuna chun in kǐr nawk ding a ni ta nawh” a ti sâ a ni kha. 17 Nuhmei tam tak a nei ding a ni bok nawh, chuong naw chun a lungril thruoi pĕtin um rawi a tih. Tangkaruo le rangkachak a khâwl khâwm treuh ding a ni bok nawh.

18 Lalah a thrung pha chun hieng dànhai hi Levi chi thiempuhai kuoma inthoka lain a kut ngeiin lekhabu zielah a ziek thlăk ding a nih. 19 Chu chu kol a ta, a dam sung po a tiem hlak ding a nih, LALPA a Pathien chu tri a, hieng dànhai le thupêkhai hi fimkhur taka zui a, 20 a unauhai nĕka thraa inngai lo a, dàn hi voi tieng chang tieng a pètsan nawna dingin. Chuongchun ama le a thlahai chun Israel ramah sâwt tak ro rêl an tih.