Kum sarina
15
1 “Kum sari invoi zătin in leibattuhai leibat chu in ngaidam ding a nih. 2 In ngaidam dàn ding chu hieng ang hin a nih: leibattu nei taphotin a chipui Israel mi laka a sum inpŭktir chu a ngaidam ding a nih. LALPA ngaidamna chu puong a ni tah leiin tu khomin a unau le a chipui Israel mi leibat chu a thrǐn ding a ni ta nawh. 3 Hnam dang mihai leibat ruok chu thrîn lui thei in ta, sienkhom in unauhai leibat chu in ngaidam ding a nih. 4 LALPA in Pathienin in rochana a pĕk chêu rama hin nasa takin malsawm a ti chêu a, mi rethei hrim hrim um naw ti niu, 5 LALPA in Pathien thû chu fîp taka awi a, voisuna ka pĕk chêu a dànhai hi fimkhur taka in zawm phot chun. 6 A tiem tah angin LALPA in Pathien chun malsawmna vûr a ti chêu a, hnam danghai inpûktir in ta, nangni chun pûk ve naw ti niu. Hnam tam tak chungah ro rêl in ta, in chunga ruok chu tu khomin ro rêl naw ni hai. 7 “Chun, LALPA in Pathienin ram a pĕk chêua in umna khaw lai khuoa khom in unauhai lai mi rethei an um chun an chungah lungril sukngar naw unla, kom bok naw ro. 8 Chuong nêk hmanin an lakah inphalin, an tlăksam taphot chu phal takin inpûktir ro. 9 Ngaidamna kum, kum sarina chu a hnâi tah ti leia i unau tlasam chu hazat a, a mamaw phuhrûkpèk nuom nawna lungril rilo put lo dingin fimkhur ro; chuong naw chun in chungchăng thuah LALPA ko a ta, thiem naw changna suol thawtu ni pal hlauh rawi in tih. 10 Inphal takin, inrona lungril nei dêr loin pe ro; chuonga in thaw chun in kut sinthaw taphotah LALPA in Pathienin malsawm a ti chêu. 11 Chu rama chun mi rethei an um naw lai bo naw nih. Chuleiin, in ram sùnga in unau mi retheihai le tlasamhai lakah tiktlâi dingin thû ka pêk chĕu a nih.
Bawi insuo dàn
12 “In Hebrai chanpui, pasal amanih nuhmei amanih ama le ama in kuomah a hung inzor a, kum ruk in rong a bawl ta chun a kum sarinaah in insuo zalĕn ding a nih. 13 In insuoktir phâ leh kutbenthekin insuoktir naw ro. 14 In ran ruol laia ran dam, in hrizawla bu dam le in grêp sawrna khura uoiin dam, LALPA in Pathienin mal a sawm dàn chêu ang peiin, phal takin pe ve ro. 15 Aigupta rama khan bawi in ni a, LALPA in Pathien chun a’n tlan suok chêu a nih ti theinghil ngai naw ro. Chu lei chun a nih voisuna hienga thu ka pĕk chêu chu.
16 “Amiruokchu, nangni le in sungkuo a ngainat lei le in inngei tlăng leia in kuomah, ‘Suoksan naw ning chĕu’ a ti tlat chun, 17 thirzum làng in ta, kotkhar bulah a na ver in ta, dam sunga in bawi ni ta’ng a tih. In bawinu chunga khom chuong ang chun in thaw ve ding a nih.
18 “Bawi insuo hi thil harsaah ngai naw ro, kum ruk sunga inhlawfaa in ruoi siehlaw sin thaw lêt hnia tam a thawpĕk ta chêu a nih. Chun, LALPA in Pathienin in thilthaw iengkimah malsawm a ti chêu.
19 In bawng ruol le beram ruol laia a chal pieng hmasa tak taphot chu LALPA in Pathien chanpuola dingin sie hrang ro. In bawngchal pieng hmasa tak chu in sor ding a ni nawh; in beramchal pieng hmasa tak hmul khom in vaw ding a ni bok nawh. 20 LALPA in Pathien hmaah kum tinin LALPAN hmun a la ruot dinga chun, nangni le in sunghai leh, in făk hlak ding a nih. 21 Hmêl hemna nei a ke inbăi dam, mit indel dam le soisĕl kâi thei hrim hrim chu LALPA in Pathien kuoma thilhlânah in hmang ding a ni nawh. 22 Chuong ang chu mani inah in făk ding a nih. Inthieng le thieng naw khomin sazuk le sakhi sa chu fa thei vong an tih. 23 A thisen ruok chu in făk ding a ni nawh; tui angin hnuoiah in bun thlàk ding a nih.