6 “Levihai in pek ding laia khaw ruk chu tuolthathai tlàn lutna ding, inhumhimna khuoah in siem ding a nih. Chu bâk chu khaw sawmli le khaw hni in pêk bok ding a nih. 7 Levihai in pĕk ding khuo po po chu khaw sawmli le pariet ni’ng a ta, a khaw sê vĕla ram rizâp leh in pĕk ding a nih. 8 Israelhai ram hluoa mi Levihai umna ding khuo in pĕk dan ding chu, in ram nei ang dungzuiin ni’ng a ta, a nei lien deuin pe lien in ta, a nei chîn deuin pe chîn in tih” a ta.

9 LALPA chun Mosie kuomah, 10 “Israelhai inbiekpui la, hieng hin hril rawh: ‘Jordan vadung kâna Kanan ram in lut phâ leh, 11 păngpala tuol thattuhai tlan lut theina dingin inhumhimna khuo iemani zàt siem ro. 12 Pungkhawm hmaa a chungthu rĕlpêk dinga a ngìr hmaa tuolthattu chu a thi nawna dingin, chuong khuohai chu phubalatuhai laka in tuoltlànna ding ni’ng a tih. 13 Chuong khaw ruk in pekhai chu in ta dinga inhumhimna khuo ni’ng a tih. 14 Jordan sak tieng chuong ang inhumhimna khuo chu pathum siem un la, Kanan ram tieng pathum siem bok ro. 15 Hieng khaw rukhai hi Israelhai le hnam danghai le an kuoma chênghai ta dinga inhumhimna khuo ni’ng a ta, chu taka chun tu khom păngpala mi that taphot tuoltlân thei an tih.

16 “‘Tu khomin thîr hriemhreia mi a vuok a, a thi chun tuolthat a na, ama chu sukhlum ngei ding a nih. 17 Tu khomin a kutin lungtum a chawi a, mi a suk a, a thi chun tuolthat a na, ama chu sukhlum ngei ding a nih. 18 Tu khomin a kutin mi that theina thing tum a chawi a, mi a zei a, a thi chun tuolthat a na, ama chu sukhlum ngei ding a nih. 19 Phubalatu chun tuolthattu chu a hmu phâ leh sukhlum nghal a tih. 20 Mi tu khomin theidăna leia mi a nam rak amanih, thil iengin amanih tum hrima a dĕng a, a thi chun, 21 an naw leh an innghirnghona leia kuttuma a chum hlum chun, a sukhlumtu chu sukhlum ngei ding a nih, tuolthat a ni leiin. Phubalatu chun a hmu hun hunah sukhlum thei a tih.

22 “‘Intheidàna um loa mi dang a nam thut amanih, tum lei ni loa thila mi a dèng amanih a ni ruok chun, 23 an naw leh hmu loa lung inthlakkhum leia mi a lo thi chun, a hmêlma a ni naw lei le poi tawk tum khom a ni bok naw leiin, 24 pungkhawmhaiin a sukhlumtu le thisen phuba latu chungthu chu hieng danhai ang hin an rèl ding a nih. 25 Pungkhawmhai chun thisen phuba latu lakah tuolthattu chu hum an ta, tuoltlânna ding khuoa chun intlântir an ta, hriek thienghlim năl thiempu laltak ni lai a thi hmâ khat chu taka chun a um ding a nih.

26 “‘Amiruokchu, tuolthattu chu a tuoltlânna khaw puoah a fe a, 27 thisen phuba latuin a hmu a, a that chun tuolthat ni naw nih. 28 Thiempu lal a thi hmâ khat chu a tuoltlânnaah tuolthattu chu a um zing ding a nih; thiempu a thi hnung ruok chun a in le loah kir nawk thei a tih.

29 “‘Hieng dànhai hi khaw lai khom um inla, in thlahai chena ro in inrel dan ding chu a nih. 30 Tu khomin tuol a that chun, hrepuituhai baua inthoka thu suokin ama chu sukhlum ngei ding a nih; amiruokchu, hrepuitu pakhat chauh bausuok chu mi sukhlumna dingin a huntawk nawh. 31 Tuolthattu chu thi tlâk a ni leiin suma intlan suok ding a ni nawh; sukhlum ngĕi ngêi ding a nih. 32 Inhumhimna khuoa tuoltlân chu chuong hun laia thiempu lal a thi hmâ chun a umna khaw hluia kir nawk dinga intlan suok phal a ni nawh.

33 “‘In umna ram chu sukporchĕ naw ro. Thisen insuona chun ram a sukporchè. Thisen insuo leia sukporchè ram chu thisen insuotu thisen chauh naw chun sukthieng thei a ni nawh. 34 In umna ram, ka chĕngna hmun hi sukporchè naw ro, kei hi LALPA, Israelhai laia chêng chu ka ni si a’ tiin hril rawh” a ta.