Kanan ramri
34
1 LALPA chun Mosie kuomah, 2 “Israelhai chu thu pe la, hieng hin hril rawh: ‘LALPAN rochana a pĕk chêu Kanan ram in hluo pha chu hieng ang hi a ramri ding chu ning a tih: 3 Sim tieng ramri chu Zin thlalera inthokin Edom ramri zùlah fe’ng a tih. Sak tieng chu Tuipui Thi sim tawpa inthoka intran ni’ng a tih. 4 Chu taka inthok chun sim tieng pan a ta, Ainuvet Kawn tanin, Zin thlalerah, Kadesh Barnea chen fe’ng a tih. Chu taka inthok chun hmar thlang tieng inherin, Hazar Adar hrawin, Azmon chen fe’ng a ta, 5 chu taka inthok chun inher a ta, Aigupta Ruom zui a ta, Mediterranean Tuipui-ah tawp a tih.6 “‘Thlang tieng ramri chu Mediterranean Tuipui kam chin pei ni’ng a tih. Chu chu tlâk tienga in ramri ding chu a nih.
7 “‘Hmar tieng ramri chu Mediterranean Tuipuia inthokin Hor tlang chen fe’ng a ta 8 chu taka inthok chun Hamath Kawnah fe’ng a ta, Zedad tieng fe pei a ta, 9 Zifon tieng pan a ta, Hazar Enan-ah tawp a tih. Chu chu hmar tienga in ramri ding chu a nih.
10 “‘Sak tieng ramri chu Hazar Enan-a inthokin Stefam chen ni’ng a tih. 11 Chu taka inthok chun Ain sak tienga um Ribla-ah trum a ta, Galili Dil suo tieng kam pang perah fe’ng a ta, 12 Jordan vadung zui pei a ta, Tuipui Thi-ah tawp a tih. Chuonghai chu sak le thlang, sim le hmara in ramri ding chu a nih’ ti rawh” a ta.
13 Mosie chun Israelhai chu thu a pêk a, “Ram in rochung ding chu thrum vawrin insem ro. Hnam kuo le a chanve kuoma sem dingin LALPAN thu a pêk a nih, 14 Reuben pahnam, Gad pahnam le Manase pahnam zatve chun an chanvo ding chu an lo hluo ta si a. 15 Hieng hnam hni le a zatve hai hin an ram hluo ding chu ni suokna tieng Jeriko zawn Jordan ral sak tienga ram an hluo ding chu an chang dĕr tah a nih” a ta.
16 LALPA chun Mosie kuomah, 17 “Ram hluo ding thrĕpektu ding chĕu chu thiempu Eleazar le Nuna naupa Josua ning an tih. 18 Pahnam tin luhai chu a sempuitu dingin ruot rawh. 19 Chuonghai hming chu: Juda hnama inthokin Jefune naupa Kaleb; 20 Simeon hnama inthokin Amihud naupa Semuel; 21 Benjamin hnama inthokin Kislon naupa Elidad; 22 Dan hnama inthokin Jogli naupa Buki; 23 Josefa naupa Manase hnama inthokin Efod naupa Haniel; 24 Josefa naupa Efraim hnama inthokin Siftan naupa Kemuel; 25 Zebulun hnama inthokin Parnak naupa Elizafan; 26 Isakar hnama inthokin Azan naupa Paltiel; 27 Aser hnama inthokin Selomi naupa Ahihud; 28 Naftali hnama inthokin Amihud naupa Pedahel” tiin.
29 Chuonghai chu Kanan rama Israelhai ram hluo ding sem dinga LALPAN thu a pĕkhai chu an nih.